وقىماعاننىڭ كەسىرى-اۋ. زامان كوشىنەن ىلعي قالام دا جۇرەم. كەز كەلگەن جاڭالىق، كەز كەلگەن وسەك مەنى اينالىپ ءوتىپ كەتەدى. كەيدە ءبىر ۇيقى كەشىگىپ جاتقاندا ايەلىمنەن الدەنە ەستىپ قالام. ونىڭ ءوزىن قازبالاپ سۇراپ الۋعا مي قۇرعىر اسا جەتە بەرمەيدى.
ەرتە جارىقتا اۋىلعا بارىپ، سوعىم سويىپ كەلەيىك دەپ، جان-جارىمدى، ەكى ۇل، ءبىر قىزىمدى الىپ جولعا شىقتىم. قالادان ۇزاپ شىقپاي-اق ماي قىزمەتكەرى توقتاتتى. نەدەن ساسام؟ قۇجات تاستاي. - جۇرگىزۋشى كۋالىگىڭىز! - مىنە! - تەحپاسپورت! - مىنە! - ساقتاندىرۋ... - مىنە! ءسوزىن اياقتاتپاي تاق، تاق ەتىپ تۇرمىن. تاعى دا سۇراي تۇسسە ەكەن دەپ. - كولىكتە كىمدەر بار؟ بولمايتىن جەردە جىن قىساتىنى بار. سول قۇرعىر پايدا بولا كەتىپ: - كوڭىلدەسىم بار. دەمالىپ قايتايىق دەپ سول... - راس پا؟ - راس! - وندا سىزگە ايىپپۇل جازامىز. بەرى ءجۇرىڭىز. - ە، نە ءۇشىن؟ جول ەرەجەسىن بۇزدىم با؟ بىرەۋدى قاعىپ كەتتىم بە؟ - ءسىز نە؟ جاڭا زاڭدى بىلمەيسىز بە؟ زاڭ بويىنشا، كوڭىلدەسىمەن قولعا تۇسكەن كولىك جۇرگىزۋشى ون ءبىر مىڭ ەكى ءجۇز قىرىق ءبىر تەڭگە توعىز تيىن تولەيدى. - ال، ءوز ايەلىمەن كەلە جاتسا شە؟ - وندا تولەمەيدى. - باستىق مىرزا، مەن ءوز ايەلىممەن كەلە جاتىرمىن. - وتىرىك ايتپاڭىز، ءسىز كوڭىلدەسىڭىزبەن كەلە جاتسىز. - سىزگە ءجاي قالجىڭداعام. راس، ءوز ايەلىممەن كەلە جاتىرمىن. - قالجىڭداساتىنداي مەن ءسىزدىڭ قۇراسىڭىزبىن با، جەزدەڭىزبىن بە؟ - جوق، ەندى... كولىكتە كىم بار دەگەن سوڭ... نەتىپ... ازىلدەپ... - مەملەكەتتىك قىزمەتكەردى ءاجۋالاعانىڭىز ءۇشىن جاۋاپ بەرەسىز. ءجۇرىڭىز بەرى. قۇجات تولتىرامىز. - اۋىلعا اسىعىپ بارا جاتىر ەدىك. ىشتە كىشكەنتاي بالا بار دەگەندەي. توڭىپ قالاتىن بولدى. ءبىر جولعا جىبەرە سالىڭىزشى. - ا، كولىگىڭىزدە جاس بالا دا بار ما؟ - ءيا، ءيا، ءبىر ەمەس ءۇش بالا بار. جول ۇزاق. جۇرە بەرەيىنشى. - بالالارىڭىز نەشەدە؟ - ۇلكەنى التىدا، ورتانشىسى تورتتە، كىشىسى ەكىگە ەندى كەلدى، باسەكە... - ولار قايدا وتىر؟ - كولىكتە عوي، باسەكە. كولىكتە وتىر... - كولىكتە وتىرعانىن ءوزىم دە بىلەم. اۆتوكرەسلودا ما دەيمىن؟ - قان-داي كرەسلو؟ - اۆتوكرەسلو! اۆتو! - ءيا، اۆتودا وتىر عوي. اۆتودا... كولىكتە... - تۋۋ، نە دەگەن ۇقپايتىن ادامسىز! ءجۇرىڭىز كورەيىك. - كىمدى؟ - اۆتوكرەسلوڭىزدى! - وسىننان-اق كورىنىپ تۇر ەمەس پە؟ انە، انا جامان سارى ماشينا مەنىكى... - كرەسلونى كورەم دەيمىن سىزگە. كرەسلونى! - ا، بىزدە قاي ءبىر كرەسلو دەيسىز؟ استىڭا بىردەڭە توسەمەسەڭ باتىپ كەتەتىن، سۇيەنسەڭ شالقايىپ كەتە بەرەتىن ەكى ورىندىق الدىندا... - ءسىز نە ايتىپ كەلە جاتسىز؟ ەسىگىڭىزدى اشىڭىز! - مىنە، ءبىزدىڭ كولىك وسى! - ءۇش بالاڭىزدا دا اۆتوكرەسلو جوق! - ويباي-اۋ، باسەكە-اۋ، قارشاداي ءۇش بالادا اۆتوكرەسلو قايدان بولسىن؟ مەنىڭ ءوزىم تىربانىپ ءجۇرىپ، وسى اۆتونى زورعا الدىم نەسيەگە... - ءسىز مەنى تاعى دا مازاق قىلىپ تۇرسىز با؟ - جوعا. باعانا ءبىر بايقاپ كورىپ ەم، بولمادى. ەندى وعان شاما قايدا؟ - قىسقاسى، ءۇش بالادا دا اۆتوكرەسلو جوق. ءارقايسىسىنا جەكە ايىپپۇل تولەيسىز. ايتپاقشى، كوڭىلدەسىڭىزگە جەكە قۇجات تولتىرامىز. وسى كەزدە سوزگە بالالاردىڭ اناسى ارالاستى. - كوڭىلدەسى نەسى؟ قايداعى كوڭىلدەس؟ - ءقازىر، ءقازىر، جانىم، سوسىن تۇسىندىرەم... - سوسىن ەمەس، ءقازىر ءتۇسىندىر! - سوسىن، سوسىن دەيمىن. ءقازىر مىنا پالەدەن قۇتىلىپ الايىقشى. - ءسىز نە دەدىڭىز؟ - ا، جوق، سىزگە ەمەس. ءقازىر مىنا ماسەلە شەشىلسىن دەگەنىم عوي... - ول ماسەلەدە مەنىڭ شارۋام جوق. قانە، جاۋاپ بەر. قايداعى كوڭىلدەس؟ مىنا كىسى نە ايتىپ تۇر؟ - توقتاڭىزدار! جەكە شارۋالارىڭىزدى سوسىن شەشەسىزدەر. ءسىز بەرى ءجۇرىڭىز! - توقتامايمىن. نەگە توقتايدى ەكەم؟ مىنانىڭ كوڭىلدەسى كىم؟ ءسىز ونى قايدان بىلەسىز؟ - مەن ەشتەڭە بىلمەيمىن، ازاماتشا. اي، ازاماتشا دەپپىن عوي، نە ەدى؟.. - قالايشا ەشتەڭە بىلمەيسىز؟ ءسىز جاڭا عانا كوڭىلدەسىڭىزگە جەكە قۇجات تولتىرامىز دەدىڭىز عوي. مەنەن نە جاسىرىپ تۇرسىزدار؟ - تۋۋ، نە دەگەن ادامسىز؟ بولدى عوي ەندى. مەن ءسىزدى مىنا كىسىنىڭ كوڭىلدەسى ەكەن دەپ قالدىم... - قالاي كوڭىلدەسى ەكەن دەپ قالاسىز؟ نە، بۇل ىلعي كوڭىلدەسىمەن ءجۇرۋشى مە ەدى؟ كوڭىلدەستەن ساداعا كەتكىر، كوڭىلدەستە باسىڭ قالعىر، ودان دا بالا-شاعاڭدى باعىپ المايسىڭ با؟ قىسقاسى، ماي قىزمەتكەرىنىڭ دە باسى بالەگە قالىپ، ەكى جاقتاپ ءجۇرىپ ايەلىمە ءبارىن تۇسىندىردىك. الدە، ول تۇسىنگەندەي بولدى. ءبىراق، «اتتىڭ سىرى يەسىنە ءمالىم» دەمەكشى، كوزىندە ءبىر كۇمان قالدى. الداعى ايقاستاردىڭ بىرىندە ول وسى قارۋدى مىندەتتى تۇردە قولداناتىن بولادى. سونىمەن قويشى، قاتىن سابىرعا كەلگەننەن كەيىن جاڭا ساۋدا قىزدى. - ءۇش بالادا ءۇش كرەسلو جوق. بۇل دەگەنىڭىز توعىز مىڭ ءبىر ءجۇز ەلۋ التى تەڭگە جەتى تيىننان ەسەپتەگەندە... ۇشكە كوبەيتكەندە... - ويباي، ەڭ بولماسا بىرەۋ دەپ كورسەتشى. توعىز مىڭنىڭ ءوزى از اقشا ەمەس قوي، باسەكە... - ءۇشتى قالاي ءبىر دەپ كورسەتەم. ءسىز ماعان زاڭدى بۇز دەپ تۇرسىز با؟ - ەڭ بولماسا ەكەۋ دەشى وندا. بىرەۋى اناسىنىڭ الدىندا وتىر عوي. ءيا، ءتىرى كرەسلونىڭ ءوزى وتىر عوي بالاسىن قۇشاقتاپ... - جارايدى، ەكەۋ دەيىن. تەك، كەلەسى جولى اۆتوكرەسلوسىز بالالاردى الىپ جۇرمەڭىز. زاڭ قاتال. - ا، زاڭ دەمەكشى. تاعى قانداي زاڭدار بار؟ بىلە جۇرەيىك، شەكەگە ءتيدى عوي. - ەگەر كولىكتە كوڭىلدەسىڭىزبەن كەلە جاتساڭىز... - جوق، ول قۇرسىن، ونى بىلدىك قوي. - ا، ءيا. ەگەر كولىكتە ەكى ەركەك قانا كەلە جاتسا، ولاردىڭ كوگىلدىر ەمەس ەكەنىن راستايتىن كۋالىك كەرەك. ال، ەگەر كوگىلدىر بولعان جاعدايدا باسقالاردىڭ كوزىنە ءشوپ سالىپ جۇرگەن جوق پا؟ ءوز جۇبى ما؟ سونى راستايتىن كۋالىك كەرەك. ەكى ايەل عانا كەلە جاتسا دا سولاي. سوسىن، ەركەك پەن كىشكەنتاي بالا نەمەسە قىز عانا كەلە جاتسا، جۇرگىزۋشىنىڭ پەدوفيل ەمەس ەكەنىن راستايتىن كۋالىك قاجەت. - نە بوپ كەتتى ءوزى؟ ماسەلەن، مەن اۋىلعا سوعىم الىپ قايتۋعا بارا جاتىرمىن. وعان باياعى «ۇرلىق مال ەمەس» دەگەن انىقتاما جاراي بەرە مە؟ - جوق. ول دا وزگەرگەن. ءقازىر قوي سوياسىز با، وگىز سوياسىز با؟ سول مالدىڭ ءوزىنىڭ جازباشا كەلىسىمى كەرەك. ول قاعاز بولماسا جولعا شىقپاي-اق قويىڭىز. ءسىزدى دەرەۋ ۋاقىتشا قاماۋ يزولياتورىنا جىبەرەدى. - ؟؟؟
(قاناعات ءابىلقايىردىڭ فەيسبۋكتەگى پاراقشاسىنان)
