جامباسى ويىلعانشا بەسىكتە جاتقان بالانىڭ اكەسى سوت الدىندا جاۋاپ بەرۋدە. Mاڭعىستاۋ وبلىسىندا 40 گرادۋس ىستىقتا، كۇننىڭ استىندا تىرىدەي شىجعىرىلىپ جاتقان بەكنۇردى باسقۇدىق اۋىلىنىڭ تۇرعىندارى كەزدەيسوق كورىپ قالعان.

سكرينشوت كتك ارناسىنان

ءسويتىپ ءتيىستى ورگاندارعا حابار بەرگەن ەدى. سول بالانىڭ اكەسىنە ەندى اتا-انالىق مىندەتىن دۇرىس اتقارمادى دەگەن ايىپ تاعىلىپ وتىر. قارشاداي ۇلدى قالدىرىپ، توركىنىنە كەتكەن اناسىنىڭ دا قۇقى شەكتەلگەنىن ايتا كەتەيىك.

ءبىر جارىم جاستاعى بالانى بەسىككە تاڭىپ تاستاپ، قاراۋسىز قالدىرعان وسى ادامدار. اتا-اجەسى، اعا-اپاسى، وگەي شەشەسى دە وسىندا. باستاپقىدا بەكنۇردى ءولىمشى حالگە تۇسىرگەن اجەسى دە قىلمىستىق جاۋاپقا تارتىلادى دەلىنگەن. كەيىن ايىپتالۋشى ورىندىعىندا اكەسى عانا قالدى. 31 جاستاعى جىگىتكە اتا-انالىق مىندەتىن دۇرىس اتقارمادى دەگەن ايىپ تاعىلىپ وتىر. بەكنۇردىڭ اۋىر ءحالىن اۋىلداستارى كەزدەيسوق كورگەن. ءسويتىپ ءتيىستى ورگانعا حابارلاپتى. ال، دارىگەرلەر بالانىڭ اۋرۋحاناعا وتە اۋىر حالدە تۇسكەنىن ايتادى. جاتا-جاتا جامباسى ويىلىپ، ىرىڭدەپ كەتكەن. اۋىز، مۇرىن قۋىسى ءقاۋىپتى ينفەكسياعا تولى، كىر-قوجالاق كۇيدە الىپ كەلگەن. بەكنۇر سول كەزدە ءبىر جارىم جاستا بولسا دا قيمىلداي المادى. بالا ىلعي اش جاتقاندىقتان قانى دا ازايىپ كەتكەن.

وتكەن كۇننىڭ ەلەسى جادىندا ساقتالىپ قالدى ما ەكەن، بەكنۇر بۇگىندە تاماقتى تويىپ جەۋگە تىرىسادى. اۋرۋحانادا ءبىر اي ەمدەگەن سوڭ بالالار ۇيىنە اۋىسقان. بالا بۇگىندە ءال جيناپ، ءتىسى شىعا باستاپتى.

"ءقازىر بالا وتىرىپ، جايلاپ تۇرىپ، جار جاعالاپ ءجۇرىپ، ەندى ءوزى ءجۇرىپ كەتۋگە  جاقىن ءجۇر. تاماقتى جاقسى جەيدى. ۇيقىسى تىنىش. اناسى ءاردايىم كەلىپ تۇرادى. جاقسى قارايدى. بالاسى كۇتىپ وتىرادى. ماماسىن تانيدى..."، - دەيدى ماڭعىستاۋ وبلىستىق بالالار ءۇيىنىڭ ديرەكتورى سۆەتلانا جۇبانتۇرلييەۆا،

اناسىنىڭ بەكنۇردى ىزدەپ جۇرگەنى ءقازىر عانا. جادىرا مىرزايەۆا ەنەسى كۇن كورسەتپەگەن سوڭ بالانى تاستاپ شىمكەنتكە توركىنىنە كەتىپ قالعان. پوليسەيلەر ونى ەكى اي ىزدەپ، تاپقان سوڭ سوت انالىق قۇقىن جارتى جىلعا شەكتەگەن بولاتىن. وسى ۋاقىت ارالىعىندا مەيىرىم، قامقورلىعىن كورسەتسە، بالا اناسىنا بەرىلمەك. بەكنۇردىڭ اكەسىنە تاعىلعان ايىپ وتە سيرەك قولدانىلادى. ەندى 31 جاستاعى الماس سادىقوۆتىڭ ايىبى سوتتا دالەلدەنسە، وعان ايىپپۇل سالىنادى نەمەسە 2 جىلعا دەيىن باس بوستاندىعىنان ايىرىلادى.

الايدا، ونىڭ جازاسىن جەڭىلدەتەتىن جايتتەر دە بار: ونىڭ ءۇشىنشى ايەلى ءتورتىنشى بالاسىن بوسانعالى وتىر.

"كتك"