تۇڭعىش رەت قازاق اكتەرلەرىنىڭ ىشىنەن م.اۋەزوۆ اتىنداعى اكادەميالىق دراما تەاترىنىڭ اكتەرى، ق ر ەڭبەك سىڭىرگەن ءارتىسى، «قۇرمەت» وردەنىنىڭ يەگەرى ايدوس بەكتەمىر گولليۆۋدتتىق كينوعا ءتۇستى. تەاتر اكتەرى «ماركو پولو» فيلمىندە نەگىزگى رولدەردىڭ ءبىرىن سومدادى. فيلم اتاقتى ساياحاتشى-جيھانكەز ماركو پولو جايىندا. اكتەر شىڭعىسقاننىڭ سەنىمدى سەرىگى، گەنەرال ارۋكانىڭ رولىندە وينادى. فيلم مالايزيادا تۇسىرىلگەن.

وسىعان دەيىن ايدوس بەكتەمىر «جاۋجۇرەك مىڭ بالا»، «اعايىندىلار» فيلمدەرىندە دە بىرنەشە ءرولدى سومداعان. كەزەكتى فيلمگە اكتەر ويلاماعان جەردەن تۇسكەن. بۇل جونىندە ايدوس بەكتەمىر سۇحباتىندا «كوكتەمدە ارتيستەر اراسىندا «گولليۆۋدتان ارنايى توپ كەلىپ، كاستينگ وتكىزەدى ەكەن» دەگەن اڭگىمە ءجۇردى. كينوعا ءوز باسىم كوپ تۇسپەگەندىكتەن، اسا ءمان دە بەرمەدىم. ءبىر كۇنى ويدا جوقتا ناتاشا ەسىمدى قىز حابارلاسىپ: «ماركو پولو» سەريالىنا ارتيس تاڭداپ جاتىرمىز. ءسىزدىڭ تەاترىڭىز-دان دا اكتەرلەر قاتىسۋدا. ەرتەڭ كەلىڭىز» دەدى. ەرتەسىنە بارعانىمدا، شەتەلدىك رە-جيسسەر مەن فوتوگراف قابىلداپ، سۋرەتكە ءتۇسىرىپ الدى. فوتوسىنامادان كەيىن رەجيسسەر ماعان جۇدىرىعىن كورسەتتى. ونىسىن قالاي تۇسىنەرىمدى بىلمەي، توسىلىپ قالسام كەرەك، مەنى شاقىرعان ناتاشا: «رەجيسسەر ءسىزدى ۇناتىپ جاتىر» دەدى كۇلىپ. ودان كەيىن دە شاقىردى. ىرىكتەۋ وتەتىن بولمەسىندە رەجيسسەرى، سۋرەتشىسى، وپەراتورى، تاعى دا باسقالارى بار، ۇزىن سانى جيىرما شاقتى ادام وتىر ەكەن. مۇنداي كاستينگتى ءبىرىنشى كورۋىم، قاتتى تاڭعالدىم. «قازاقفيلمدە» ەكى-ۇش ادامنىڭ عانا قابىلداۋىنان وتسەڭ، بۇلار تۇتاس شىعارماشىلىق توپپەن بىرگە وتىرىپ، اكتەر ىرىكتەيدى ەكەن. ەسىكتەن ەنە بەرگەنىم سول ەدى، ءبارى ورىندارىنان اتىپ تۇرىپ، ءوز تىلدەرىندە امانداستى، ساسقانىمنان «ۋاعالەيكۋماسسالام! راقمەت، راقمەت…» دەپ جاتىرمىن. شىڭعىس حاننىڭ سەنىمدى سەرىگى، گەنەرال ارۋكانىڭ وبرازىنا ەنۋ كەرەكتىگىن ءتۇسىندىرىپ، قولىما ءماتىن بەردى. ءوزىمدى اتتىڭ ۇستىندە وتىرعانداي سەزىنىپ، اعىلشىنشا ءماتىندى وقىپ بەردىم. ءبارى ريزا بولىپ، قول شاپالاقتاپ شىعارىپ سالدى. كوپ ۇزاماي، گولليۆۋد كينوسىنا تۇسۋگە مۇمكىندىك العانىمدى ايتتى. سەنەر-سەنبەسىمدى بىلمەي، ابدىراپ قالدىم. العاشىندا، ءتۇسىرىلىم كۇزدە باستالاتىنىن ەسكەرتكەن. الايدا، ۋاقىتى وزگەرىپ، جازدا مالايزياعا ۇشىپ كەتتىك. تاجىكستان، قىرعىزستان، وزبەكستاننىڭ اكتەرلەرى وتپەي قالعان ارۋكانىڭ رولىنە، اللا بۇيىرتىپ، قازاق ەلىنەن مەن ءوتىپ كەتتىم»،-دەپ ايتىپ كەتتى.

"Baistars.kz"