«قامشى» پورتالى ءبىراز ۋاقىت بۇرىن «ماڭگىلىك ساعىنىش» اتتى ماقالا جاريالاپ، شەتتەگى قانداستاردىڭ قازاق ەلىنە دەگەن كۇيمەن جولداعان سالەم ساعىنىشىن جەتكىزگەن ەدى. ءپاتىقان ايجاقسى اقساقالدىڭ بۇل كۇيى ءبىراز وقىرماننىڭ كوڭىلىن تولقىتىپ، جۇرەك تۇكپىرىنەن ورىن تاپقان. ەندى مىنە ءپاتىقان اقساقالدىڭ ونەرپاز ۇلى قاميتقانمەندە اڭگىمەلەسۋدىڭ ءساتى ءتۇستى.
- ءوزىڭدى قىسقاشا تانىستىرا كەتسەڭ...
- مەن ءۇرىمجى قالاسىنداعى ءتاڭىرتاۋ مال فەرماسى دەگەن ۇلكەن اۋىلدا ءتۋىپ-وستىم. كىشكەنتايىمنان ونەرگە قىزىققانىما ەڭ باستى سەبەپكەر بولعان مەنىڭ اكەم، ول ماعان التى جاسىمنان باستاپ قازاقتىڭ ۇكىلى دومبىراسىن ۇستاتتى. كۇي تارتۋعا، ءان سالۋعا باۋلىدى. مەكتەپ وقۋشىسى بولعان كەزدە مەكتەپ ىشىندە وتەتىن قانداي دا ءبىر ءىس-قيمىلدان قالعان ەمەسپىز. سول كەزدە اۋىلداعى ۇلكەن كىسىلەردىڭ، ۇستازداردىڭ اق باتاسىن الىپ جۇردىك. 2002 جىلدان باستاپ ۇلكەن ساحنالارعا اقىرىنداپ اياق باسىپ، كولەمدى كونسەرتتەرگە قاتىسا باستادىم. 2006 جىلى «جاڭا اۋەن» ۇجىمىنىڭ ونەر مەكتەبىنىڭ شاكىرتى بولدىم. احمەتجان رابجان ۇلى سياقتى اعالارمەن بىرگە ءان ساباعىنان ءدارىس الدىق. سول جىلى ەربوسىن نۇرمۇقان ۇلى اعانىڭ قولداۋىمەن ناۋرىز مەرەكەسىندە العاش رەت ولكەلىك ۇلكەن ساحنادا ءان ايتتىم.
- ءوزىڭنىڭ ايتىپ جۇرگەن اندەرىڭنىڭ اراسىندا «بوتەن قىز» دەگەن ءان حالىققا جاقسى تانىس، وسى انگە توقتالا كەتسەڭ؟
- مەن سول جىلدان باستاپ جەكە شىعارماشىلىق باعىتتا جۇمىس ىستەي باستادىم، جەكە اندەرىمدى جازىردىم. ول جاقتا ءوزىڭىز بىلەتىندەي ەش پونوگرامماسىز ءان ايتىلادى. سوندىقتان دا كوپ ەڭبەك ەتۋىڭىز كەرەك. دوسىم جانات نۇرسۇلتان ۇلىنىڭ ءانى «بوتەن قىز» 2007 جىلى ورىندالدى. بۇل ءاندى شىمكەنت قالاسىنان جامبىل دەيتىن ازامات ۇرىمجىگە ارنايى كەلىپ اتتاي قالاپ الىپ كەتتى.
- سەنىڭ كومپوزيتورلىق قىرىڭ بار دەپ ەستىدىك، ءان جازىپ ءجۇرسىڭ بە؟ بۇگىندە نەمەن اينالىسىپ ءجۇرسىڭ؟
- العاشقى تۋىندىمدى بىلتىر عانا جازدىم، جاراس دالەلقان اعامىزدىڭ سوزىنە جازىلعان «جامالىم- اي» ءانى. تەلەارنادا دۋبلياج جاساپ قوسىمشا جۇمىس ىستەپ جۇرگەن جايىم بار. سوڭعى ءۇش- ءتورت جىلدا اسابالىق ونەردى دە جۇرگىزىپ كەلەم. اسابالىق وتە ءبىر قيىن، جاۋاپكەرشىلىگى مول جۇمىس، ازداپ قىزىعۋشىلىعىم دا بار بۇل كاسىپكە، سوندىقتان دا سوڭعى جىلداردا ۇرىمجىدە تويلارعا شىعىپ ءجۇرمىن.
- اكەڭ ءپاتىقان ايجاقسى ۇلى تاڭجارىق جولدى ۇلىنىڭ بۇكىل ولەڭدەرىن جاتقا بىلەتىنىن بىلەمىز. سەنىڭ اسابالىق ونەرىڭ وسىمەن بايلانىستى دا شىعار، ۇيىڭدە باسقا ونەرلى ادامدار بار ما؟ اسابالىق ونەرگە كىمدەردى ۇلگى ەتتىڭ؟
- ءبىزدىڭ وتباسى نەگىزىنەن ونەرلى وتباسى دەسەم دە بولادى. ۇيدەگى اپكەلەرىم بولسىن، باۋىرلارىم بولسىن قولىنان دومبىراسىن تاستامايدى. توي ءتاڭىردىڭ قازىناسى دەيدى. توي دەگەنىمىز الىستى جاقىنداتىن، جاقسىلىقتىڭ جارشىسى. اسابالىق ونەرگە مەنى ناعاشى اعام، شەشەمنىڭ باۋىرى ماكىباي نۇقنابي ۇلى باۋلىدى.
- ول جاقتاعى قازاقتاردىڭ قازاقستانعا دەگەن، اتاجۇرتقا دەگەن اڭسارى مەن ماحابباتى قالاي؟
- ءاربىر شەتتە جۇرگەن قازاقتاردىڭ قازاقستان دەسە ەلەڭدەمەيتىنى جوق دەپ بىلەمىن. دوستارىمىز بولسىن، ءبىز بىلەتىن جاستاردىڭ قاي- قايسىسى بولسا دا ەلگە بارساق، جۇرتتى كورسەك دەپ جاتادى.
- ءوزىڭ قازاقستانعا قاشان قونىس اۋداراسىڭ؟
- مەن شەتتە جۇرسەم دە ءارقانداي ۋاقىتتا قازاق ەلىندە بەيبىتشىلىك بولسا ەكەن، قازاق ەلى دامي بەرسە، گۇلدەنگە بەرسىن دەپ ىشتەن تىلەپ جۇرەتىن قازاقتاردىڭ ءبىرىمىن. سوڭعى جىلداردا ءجيى كەلىپ ءجۇرمىن، اللا اماندىق بەرسە جاقىندا ءبىرجولا كوشىپ كەلەمىن.
- تىڭدارماندارىڭا، ەلىڭە قانداي تىلەك ايتاسىڭ؟
- الدىمەن ونەردى ارداقتاي بىلەتىن، سالماقتاي بىلەتىن ەل جۇرت امان بولسىن، ونەرگە قولداۋ ءبىلدىرىپ جۇرگەن اعالاردىڭ ءىسى ورگە باسسىن. ەلىمىز امان بولسىن، جۇرتىمىز تىنىش بولسىن! وسىنداي سۇحبات ۇيىمداستىرىپ وتىرعان «قامشى» پورتالىنا دا ءوز اتىمنان ايرىقشا العىس بىلدىرەمىن.
سۇحباتتاسقان ەرلان تولەۋباي
