الەمدەگى ەڭ كونە كىتاپحانالاردىڭ ءبىرى قايتا اشىلدى، دەپ جازادى Qamshy.kz اقپارات اگەنتتىگى.

24.kz پورتالىنىڭ مالىمەتىنە سۇيەنسەك، مىسىرداعى اۋليە ەكاتەرينا موناسترىنە تيەسىلى بۇل مەكەمە 2014 جىلى جوندەۋ جۇمىستارىنا جابىلعان بولاتىن. مۇندا 6 مىڭعا جۋىق ءدىني قولجازبالارمەن قاتار، مىڭداعان كونە كىتاپ ساقتالعان.

ولاردىڭ اراسىندا ەجەلگى گرەك دارىگەرى ءارى فيلوسوفى گيپپوكراتتىڭ مەديسينالىق رەسەپتەرى مەن شىعىس-ارامەي ديالەكتىندە جازىلعان بيبليانىڭ كونە كوشىرمەلەرى بار.

جالپى اۋليە ەكاتەرينا ءموناستىرى – ەڭ ەجەلگى حريستياندىق ەسكەرتكىشتەردىڭ ءبىرى. ول VI عاسىردا سالىنعان.

2002 جىلى يۋنەسكو-نىڭ دۇنيەجۇزىلىك مۇرالار تىزىمىنە ەندى. ال ونىڭ ىشىندەگى كىتاپحانا ءتاريحي-دىني ادەبيەت سانى بويىنشا الەمدە ەكىنشى ورىندا تۇر. ەڭ ءىرىسى ۆاتيكاندا ورنالاسقان.

– موناستىردە سونداي-اق الەمدەگى ەڭ ەجەلگى ءارى ەڭ ءىرى موزايكالاردىڭ ءبىرى بار. ول 12 جىلعا سوزىلعان قالپىنا كەلتىرۋ جۇمىستارىنان كەيىن كوپشىلىك نازارىنا ۇسىنىلادى. جارتى ميلليون تاستان تۇراتىن موزايكا شامامەن 1400 جىل بۇرىن جاسالعان، - دەدى ءدىني قىزمەتكەر توني كازامياس.