قىرعىزستاننىڭ ەكس-پرەزيدەنتى قۇرمانبەك باكييەۆ پەن ونىڭ تۋعان اعاسى جانىبەك باكييەۆتى بىشكەكتەگى وكتيابر اۋدانىنىڭ سوتى سىرتتاي 10 جىلعا سوتتادى. بۇل تۋرالى تاسس اگەنتتىگى سوت كانسەليارياسىنا سىلتەمە جاساپ حابارلايدى، دەپ جازادى Qamshy.kz اقپارات اگەنتتىگى.
«ولارمەن قوسا ءتۇرلى مەرزىم مەن ايىپپۇل تولەۋگە اۋىلشارۋاشىلىق جەردى زاڭسىز پايدالانعان بىرنەشە شەنەۋنىك مىندەتتەلدى»، - دەلىنگەن كانسەلياريادا.
ۇلتتىق پارلامەنتتىڭ ەكس-دەپۋتاتى قارعانبەك ساماكوۆتىڭ دۇنيە مۇلكى تاركىلەنىپ، ءوزى 10 جىلعا سوتتالدى. الايدا ول راقىمشىلىققا ءىلىنىپ، جازا مەرزىمى ءۇش ەسەگە قىسقارعان. بۇرىنعى ۆيسە-پرەمەر ەسكەندىر ايدارالييەۆ، سونداي-اق ەكس-پرەمەر جانە قازىرگى پارلامەنت دەپۋتاتى يگور چۋدينوۆ قىلمىسى ءۇشىن 5 ملن قىرعىز سومى مولشەرىندەگى ايىپپۇل تولەۋگە مىندەتتەلدى. بۇدان وزگە، اتالمىش قىلمىستىق ارەكەت اياسىندا بىرنەشە مەملەكەتتىك قىزمەتكەرلەردىڭ ۇستىنەن ءىس قوزعالعان.
بۇل توپقا قاتىستى قىلمىستىق ءىس 2 جىل بۇرىن قوزعالعان. ولارعا قاتىستى 262 گەكتار اۋىلشارۋاشىلىق جەردى تۇرعىن ۇيلەر سالۋعا ارنالعان اۋماققا اينالدىرعانى ءۇشىن ايىپ تاعىلعان.
