بۇل ءومىر قىسقا، قۇستىڭ تۇمسىعىنداي،
جاستىعىڭ جارا بەرمەس بۇرشىك ىڭعاي.
وكىنىپ وتكەن كۇنگە وكسىگەنمەن،
جۋارسىڭ كوڭىلىڭنىڭ كىرشىگىن قاي؟
بۇل ءومىر – ويناپ ءجۇرىپ وت باسۋلار.
كەزدەيسوق كەزدەسۋلەر، قوشتاسۋلار.
تاۋسىلعان تاعدىرلاردى تەڭدەپ الىپ،
كەلمەسكە كەتكەن سوناۋ كوپ عاسىرلار.
بۇل ءومىر – جاۋابى جوق، سۇراعى بار،
الدامشى ارزان باقتان كىم ارىلار؟
قاڭتاردا كوبەلەك بوپ جاۋعان قاردىڭ،
كوكتەمدە كوز جاسىنا كۋا قىلار.
بۇل ءومىر – كىمگە ءماندى، كىمگە ءمانسىز؟
(ساعىمداي بىردە جوقسىز، بىردە بارسىز).
«قار جاۋماي، قازان ۇرماي سولىپ قالار»،
قايتەيىن عۇمىرىمدى گۇلدەن ءالسىز.
بۇل ءومىر – بىزگە ءمالىم وتكەل سىندى،
وتەم دەپ سول ولكەلدى كوپ تەر ءسىڭدى.
جازعىرىپ جاراتقاندى جىلايمىز-اۋ،
جۇرگەندەي قاتار كەشىپ وت پەن سۋدى.
بۇل ءومىر وتپەس، وتسەك ءبىز وتەرمىز،
قىس، كوكتەم، جاسىل جاز بەن كۇز ەكەنبىز.
تۇنشىعىپ جاسىنا ابدەن كوزىمىزدىڭ
ءبىر كۇنى ەرىپ كەتەر مۇز ەكەنبىز.
قالقامان سارين
پىكىر قالدىرۋ