جاقىندا دۇنيەگە ۇشەم اكەلگەن قاراعاندىلىق وتباسى "بيلىكتىڭ نازارىنان تىس قالدىق، زارىمىزدى اكىم تىڭداماي وتىر" دەپ نارازىلىعىن بىلدىرۋدە.

بوسانعان كۇننەن-اق كومەكتەسۋگە ۋادەنى ءۇيىپ توككەن جەرگىلىكتى اتقامىنەرلەر، ءتىپتى كەلىپ قۇتتىقتاۋعا دا جاراماعان دەپ حابارلايدى "31 ارنا".

توعىز ادامنان تۇراتىن كوپبالالى وتباسى ءقازىر ەكى بولمەلى پاتەردى پانالاۋعا ءماجبۇر. بىردەن كوپبالالى انا اتانعان لەيلا ەيۋپوۆا ۋاقىتىنان ءبىر اي بۇرىن بوسانعان. ءقازىر ءوزىنىڭ دە، ۇشەمدەردىڭ دە جاعدايى جاقسى.

سوزدەرىنشە تەك ۇزاققا سوزىلعان جوقشىلىقتان وتباسىنىڭ ءۇش بىردەي سابيگە توسەك الۋعا قاۋقارى جەتپەي تۇر. ال مەملەكەتتەن بولىنەتىن جالعىز جاردەماقى قۇنارلى تاماقپەن جورگەكتەرگەدە جەتپەيدى.

"ءۇش بالامدى دا ءبىر كەرەۋەتكە جاتقىزۋعا ءماجبۇرمىز. سەبەبى ءۇش كەرەۋەت، ءۇش كولياسكا الۋعا ءبىزدىڭ قاراجاتىمىز جوق. ال اكىمشىلىك كومەكتەسپەك تۇگىلى ءتىپتى قۇتتىقتاعان دا جوق"، - دەيدى ۇشەمنىڭ اناسى لەيلا ەيۋپوۆا.

توعىز ادامنىڭ ەكى بولمەلى پاتەردى پانالاۋدان باسقا امالى جوق. تار پاتەرلەرىن كەڭەيتۋدى سۇراپ كوپبالالى وتباسى اكىمشىلىككە دە بارعان. ءبىراق بىر-بىرىنە سىلتەگەن شەنەۋنىكتەردەن اقىرى قايران بولماپتى. بۇعان دا كوندىككەن ولار تىم قۇرىعاندا قارجىلاي كومەك كورسەتسە ەكەن دەيدى.

"بالالاردىڭ اكەسى استاناعا اقشا تابۋ ءۇشىن كەتتى. ءۇيدىڭ جالعىز اسىراۋشىسى سول عانا. بالالارىن كورمەگەنىنە ەكى اي بولدى. اكىمدىكتەگىلەر كومەكتەسەمىز دەگەن"، - دەدى ۇشەمنىڭ اجەسى نيسا ايۋپوۆا.

ال ۇشەمدەردى ۇمىت قالدىرعان جەرگىلىكتى اتقامىنەرلەر باسپانا جوق دەپ، وتباسىعا كەزەكتەن تىس پاتەر تيمەيتىنىن ايتتى. تويىپ ىشەر تاماعى دا جوق جانۇياعا، ءتىپتى الەۋمەتتىك كومەكتىڭ دە كورسەتىلمەيتىنىن ەسكەرتەدى.

"ءوزىنىڭ تۇرعىن ءۇي ماسەلەسىن جاقسارتۋ، كەڭەيتۋ دەيمىز عوي، ول تەك قانا قاتتى جۇقپالى اۋرۋمەن اۋىراتىن ادامدارىن ۇكىمەتتىڭ بەكىتىلگەن تىزىمدەردىڭ ىشىندەگى اۋرۋلارعا عانا بولادى"، - دەيدى "قاراعاندى قالاسىنىڭ تۇرعىن ءۇي قاتىناستار ءبولىمى" مم باسشىسىنىڭ ورىنباسارى دارىن بۇلقايىر.

دەگەنمەن ۇشەمدەردى دۇنيەگە اكەلگەن وتباسى پاتەر كەزەگىنە تۇرۋعا دا دايىن. تەك حالىق سانىن كوبەيتىپ، كوپبالالى وتباسى اتانعانىمدى ۇكىمەت ەلەسە يگى ەدى دەيدى. "31"