الماتىدا ش.ايمانوۆ اتىنداعى «قازاقفيلم» كينوستۋدياسىندا قازاقستان رەسپۋبليكاسى ءماجىلىس پارلامەنتى دەپۋتاتتارى قازاقستان كينەماتوگرافيستەرى، كينوستۋديا قىزمەتكەرلەرى جانە زيالى قاۋىم وكىلدەرىمەن كەزدەسۋ وتكىزدى دەپ حابارلايدى Qamshy.kz اقپارات اگەنتتىگى. 

وتاندىق كينويندۋستريا وكىلدەرىمەن كەزدەسۋگە قازاقستان رەسپۋبليكاسى ءماجىلىس پارلامەنتى دەپۋتاتتارى، «نۇر وتان» پارتياسى فراكسياسىنىڭ مۇشەلەرى: گۇلنار يقسانوۆا، كارىباي مۇسىرمان، بەيبىت مامرايەۆ، سونداي-اق، الماتى قالالىق ماسليحاتى دەپۋتاتى يسلام بايرامۋكوۆ، الماتى قالاسىنىڭ بوستاندىق اۋدانى اكىمىنىڭ ورىنباسارى مارجان بالبايەۆا كەلدى.

- كينەماتوگرافيا سالاسىن قۇقىقتىق تۇرعىدا رەتتەۋ، ۇلتتىق كينووندىرىسكە قولداۋ جانە دامۋىنا ىڭعايلى ورتا قالىپتاستىرۋ مەن ۇلتتىق فيلمدەردىڭ پروكاتى جانە ديستريبۋسياسىن قاداعالاۋ، وتاندىق كينومىزدىڭ ساپاسىن كوتەرىپ، باسەكەگە قابىلەتتىلىگىن ارتتىرۋ ءۇشىن زاڭ قاجەت.  وسى ورايدا، ورتاقتاسىپ وڭ ناتيجە شىعارۋ ءۇشىن ءبىز سىزدەرمەن ارنايى كەزدەسۋگە كەلىپ وتىرمىز، - دەگەن گۇلنار يقسانوۆا ءسوزىن بىلاي دەپ جالعاستىردى، – جانە ەڭ باستىسى، بۇل زاڭ جوباسىن تالقىلاۋعا ءبىزدىڭ سايت ارقىلى، ەلىمىزدىڭ كەز-كەلگەن ازاماتى قاتىسا الادى.

– وتكەن جىلدىڭ اياعىندا مادەنيەت جانە سپورت مينيسترلىگى پارلامەنت وتىرىسىندا كينەماتوگرافيا تۋرالى زاڭ جوباسىن ۇسىنعان ەدى. ءقازىر ءبىز ونى جان-جاقتى تالقىعا سالىپ وتىرمىز. ءبىز سىزدەر – كينەماتوگرافيستەردى – وسى تالقىلاۋعا ەكسپەرت رەتىندە قاتىسۋعا شاقىرامىز. قاتىسساڭىزدار، ءبىز تەك قۋانامىز، ويتكەنى زاڭدا وتاندىق كينەماتوگرافيا تۋرالى بارلىق ماسەلەلەر قاراستىرىلعانىن قالايمىز، - دەدى بەيبىت مامرايەۆ.

كەزدەسۋ بارىسىندا دەپۋتاتتار «ءقازاقفيلمنىڭ» كۇندەلىكتى جۇمىسى جانە تەحنيكالىق جابدىقتارىمەن، دەكوراسيالارىمەن، كوستيۋمدەرىمەن، رەكۆيزيتتەرىمەن تانىستى.

كەزدەسۋدىڭ باستى تاقىرىبى پارلامەنتتە تالقىلانىپ جاتقان، وتاندىق كينويندۋستريانىڭ بولاشاقتاعى دامۋىنداعى نەگىزگى باعىتتارى كورسەتىلگەن «كينەماتوگرافيا تۋرالى» زاڭ جوباسى بولدى. سونداي-اق، كەزدەسۋدە ەلىمىزدىڭ الەۋمەتتىك-مادەني ومىرىندە وتاندىق كينەماتوگرافيانىڭ الاتىن ورنى مەن ماقساتتارى، بۇگىنگى جاعدايى مەن وتاندىق كينوونەردىڭ كەلەشەگى ءسوز ەتىلدى.

وتىرىستا تانىمال رەجيسسەرلەر، اكتەرلەر جانە پروديۋسەرلەر قاجەتتى وزگەرىستەر تۋرالى ءوز ويلارىن ورتاعا سالدى. دالىرەك ايتاتىن بولساق، رەجيسسەر رۇستەم ءابدىراش سوسياليستىك ەلدەر قاتارىندا بولعان ۆەنگريا مەن بولگاريانىڭ ۇلتتىق كينەماتوگرافياسىن ساقتاپ قالا وتىرىپ، گولليۆۋدتىق ستۋديالارمەن قارىم-قاتىناس ورناتا العانىن مىسالعا كەلتىردى. اكتەر نۇرجۇمان ىقتىمبايەۆ «قازاقفيلم» كينوستۋدياسىن ءبىرىڭعاي جانە بىرەگەي كينەماتوگرافيالىق كومپلەكس رەتىندە ساقتاپ قالۋ كەرەكتىگىن ايتتى. ال كينورەجيسسەر ساتىبالدى نارىمبەتوۆ پەن جازۋشى، كينودراماتۋرگ سماعۇل ەلۋباي وتاندىق الەۋمەتتىك ماڭىزى بار كينونىڭ كوپتەگەن ەلدەردە مەملەكەتتىك دەڭگەيدە قولداۋ كورسەتىلەتىنى تۋرالى جانە يدەولوگيالىق ماڭىزى بار فيلمدەردىڭ وسكەلەڭ ۇرپاقتى تاربيەلەۋدە ماڭىزى زور ەكەنىن باسا ايتتى.

– بۇگىندە «قازاقفيلم» كينوستۋدياسى  – ۇلتتىق برەند جانە قازاقستان كينويندۋسترياسىنىڭ قوزعاۋشى كۇشى. ءبىز – قازاقستاننىڭ كينەماتوگرافيستەرى ەلىمىزدىڭ «كينەماتوگرافيا تۋرالى» زاڭىن كۇتىپ جۇرگەنىمىزگە كوپ بولدى. بۇل زاڭ: كينەماتوگرافيستەردىڭ، كينو وندىرۋشىلەردىڭ، پروكاچيكتەردىڭ، ديستريبيۋتورلاردىڭ جۇمىسىن رەتتەپ وتىرادى، كينو يندۋستريانىڭ ەكونوميكالىق تەتىكتەرىنىڭ دامۋىن قالىپتاستىرۋعا مۇمكىندىك بەرەدى. سونىمەن قاتار سالىقتىق ارتىقشىلىقتار، كەدەندىك جەڭىلدىكتەر جانە مەملەكەتتىك سۋبسيديالاۋ مەحانيزمى سياقتى نارىقتىق مەحانيزمدەر ارقىلى جاعىمدى ينۆەستيالىق كليمات قالىپتاستىرادى، - دەدى جيىننىڭ سوڭىندا ءسوز العان ش.ايمانوۆ اتىنداعى «قازاقفيلم» كينوستۋدياسىنىڭ پرەزيدەنتى باقىت قايىربەكوۆ.