الماتى وبلىسىندا وگەي اكەسى ءۇش جاسار قىزىنىڭ دەنەسىن تىستەلەپ، مۇرنىن جۇلىپ العان. بۇل تۋرالى جۋرناليست گۇلميرا ءابىقاي ءوزىنىڭ Instagram پاراقشاسىنا جازدى دەپ حابارلايدى Qamshy.kz اقپارات اگەنتتىگى.

"فوتوداعى ءۇش جاسار قىزدىڭ ۇستىنەن ساۋ تامتىق جوق. باسىنان باشپايىنا دەيىن اياۋسىز تىستەلەپ، ءبىر ۋىس توبە شاشى مۇلدەم جوق. ەڭ سوراقىسى ۇيىقتاپ جاتقان بوپەنىڭ مۇرنىن 1986ج.ت. رينات قوڭقابايەۆ تىستەپ جۇلىپ العان. الدە جەپ قويدى ما، كىم ءبىلسىن،مۇرىن ەتى سول كۇيى تابىلمادى"،- دەيدى گۇلميرا ءابىقاي.

ونىڭ ايتۋىنشا، 20 كۇن اۋرۋحانادا جاتقان جانسايا بۇگىن اناسىمەن ۇيگە قايتۋى كەرەك. الايدا، باسار تاۋ، بارار جەرى جوق ەكەن.

"پاتەرگە ورالسا ازاماتتىق جارى رينات كۇتىپ وتىر. بۇل ماسەلەگە قاتىستى بالاعا شابۋىل دەپ ارىز جازىلعانىمەن كۇدىكتى يزولياتوردا ءبىر كۇن وتىرىپ، بوساپ شىقتى. شىرىلداپ ەندى ارىز جازعانىمدى بىلسە ءوزىمدى دە ولتىرەدى دەپ جىلايدى اياۋلىم ماتايەۆا. ول (رينات) بۇرىن سوتتالعان ازامات. ادام بولمايتىنىن بىلگەن تۋىستارى تەرىس اينالعان جىگىتتى نەگە تاڭدادىڭىز؟ بىرگە تۇرعان ءبىر جىل ىشىندە بىرنەشە رەت قول كوتەرگەنىن نەگە جاسىردىڭىز؟ ول ءىشىپ العاندا «بەلايا گورياچكا» ەكەنىن بىلە تۇرا 3 جاسار قىزدى قاۋىپكە نەگە يتەرمەلەدىڭىز؟ بۇل ساۋالدارعا اياۋلىم جاۋاپ تاپپادى. ءسىز ازاماتتىق جارىڭىز ولەردەي ماس ەكەنىن بىلە تۇرا، مۇنداي كەزدە كوزىنە تۇسكەن جاندى وڭدىرمايتىنىن (تىستەيدى) بىلە تۇرا تۋعان قىزىڭىزعا اراشا ءتۇسۋ ورنىنا تاستاپ قاشتىڭىز. ەكەۋىڭىز دە قىلمىسكەرسىزدەر! ال، نە بولدى؟ ءبىر قىز بالا ماڭگىلىك ۋرود بولدى. وعان قانشا جەردەن وتا جاسالعانىمەن ءوز مۇرنىنداي بولمايدى. 3 جاسار بالانىڭ پسيحيكاسىنا ماڭگىلىك سىزات ءتۇستى"، -دەيدى جۋرناليست.

الماتى وبلىستىق ءىىد باسپا ءسوز قىزمەتىنىڭ وكىلى كوبەيحان نۇراحمەتوۆ اتالعان وقيعانى راستادى.