ق ر اقپارات جانە كوممۋنيكاسيا ءمينيسترى داۋرەن ابايەۆ 1،7 ملرد تەڭگە بولىنگەلى وتىرعان قازاقستاندىق باق-تىڭ مونيتورينگى جايىندا ايتىپ بەردى. بۇل تۋرالى tengrinews.kz پورتالىنىڭ مالىمەتىنە سۇيەنىپ حابارلايدى Qamshy.kz اقپارات اگەنتتىگى.

«بۇل جۇيەنىڭ بىزگە اۋاداي قاجەت ەكەنىنە سەنىمدىمىن. بۇل باقىلاۋ ەمەس، مونيتورينگ. ماسەلەن، مەملەكەتتىك تىلدە شىعىپ وتىرعان اقپاراتتاردىڭ سانىن انىقتاۋعا مۇمكىندىك بەرەتىن مونيتورينگ ول. ءارى بىزگە زاڭناماعا سايكەس جۇمىس ىستەۋگە مۇمكىندىك بەرەتىن مونيتورينگ»، - دەدى ابايەۆ.

ءمينيستردىڭ ايتۋىنشا، قازاقستاننىڭ اقپاراتتىق ايماعى تۇگەل قامتىلادى. مونيتورينگكە باسىلىمدار، راديو، تەليەۆيدەنيە جانە ينتەرنەت-باق-تار تۇگەل كىرەدى. سونداي-اق ابايەۆ ءار باسپا باسىلىمىندا زاڭ بويىنشا جاريالانعان اقپاراتتان كەيىن مينيسترلىككە تاپسىرۋعا ءتيىستى ەلەكتروندى نۇسقانىڭ بارىن ايتتى.

«1،7 ملرد تەڭگە ءتيىستى اقپاراتتىق ءونىم جاساپ شىعارۋ ءۇشىن قاجەت. ول ارنايى ءارى ەرەكشە باعدارلاما»، - دەپ اتاپ ءوتتى مينيستر.

ايتا كەتەيىك، ق ر اقپارات جانە كوممۋنيكاسيا مينيسترلىگى ۇلتتىق اقپاراتتىق كەڭىستىكتىڭ اۆتوماتتاندىرىلعان مونيتورينگ جۇيەسىن جاساۋدى ءوز موينىنا الدى. ونى 2018 جىلدىڭ سوڭىنا دەيىن اياقتاۋ جوسپارلاندى. وسى ماقساتتا رەسپۋبليكالىق بيۋدجەتتەن 1،7 ملرد تەڭگە بولىنگەن.