اۋعانستان استاناسىنداعى قوناق ۇيلەردىڭ بىرىنە شابۋىل جاسالىپ، ناتيجەسىندە 30-دان ادام قازا تاپتى. كوز جۇمعان ادامداردىڭ اراسىندا ءبىر قازاقستان ازاماتى مەن التى ۋكراينا ازاماتى بولعان، دەپ حابارلايدى Qamshy.kz اقپارات اگەنتتىگى ازاتتىق راديوسىنىڭ مالىمەتىنە سۇيەنە وتىرىپ.

وقيعا ورنىنان 150 ادام قاشىپ قۇتىلعان، ولاردىڭ 41ء-ى شەتەل ازاماتتارى ەكەن. بۇل جايىندا اۋعانستان ءسىم نادجيب دانيش مالىمدەدى. قۇتقارىلعان ادامداردىڭ ىشىندە 10-ى جاراقاتتانعان، ال ولاردىڭ التاۋى قاۋىپسىزدىك قىزمەتىنىڭ وكىلدەرى.

نادجيب دانيشتىڭ ايتۋىنشا، قازا تاپقان 14 شەتەلدىكتىڭ 11ء-ى KamAir اۋە كومپانياسىنىڭ قىزمەتكەرلەرى بولعان. KamAir اۋە كومپانياسىنىڭ باسشىلىعى كابۋلدەگى قوناق ۇيگە جاسالعان شابۋىلدىڭ سالدارىنان ءبىرشاما رەيستەر كەيىنگە قالدىرىلعاندىعىن مالىمدەدى.

قازاقستان ءسىم رەسمي وكىلى ءانۋار جايناقوۆ ءوزىنىڭ الەۋمەتتىك جەلىدەگى پاراقشاسىندا قازا تاپقان ادامداردىڭ اراسىندا ءبىر قازاقستاندىق ازاماتتىڭ بار ەكەندىگىن جازدى. ءاتى-جونى كورسەتىلمەگەن، 1978 جىلعى ەر ادام ەكەن. «قازاقستان ديپلوماتتارى اۋعانستاننىڭ قاۋىپسىزدىك قىزمەتى مەن سىرتقى ىستەر مينيسترلىگىمەن بايلانىسىپ وتىر. جاقىن ارادا قازا تاپقان ەر ادامنىڭ ءمايىتىن ەلگە جەتكىزۋ ماسەلەسى شەشىلەدى»، - دەپ جازادى ءانۋار جايناقوۆ.