ءححىىى قىسقى وليمپيادا ويىندارى 2018 جىلدىڭ 9–25 اقپان ارالىعىندا وتەدى. الەمنىڭ 80-گە جۋىق ەلىنەن 5000-نان استام سپورتشى مەن رەسمي تۇلعالار قاتىسادى دەپ جوسپارلانعان.

15 سپورت تۇرىنەن 102 مەدالدار جيىنتىعى ويناتىلادى (بياتلون — 11، بوبسلەي — 3، سكەلەتون — 2، كەرلينگ — 3، كونكيمەن جۇگىرۋ سپورتى — 14، مانەرلەپ سىرعاناۋ — 5، شورت-ترەك — 8، تاۋ شاڭعى سپورتى — 11، شاڭعى قوسسايىسى — 3 ، شاڭعى جارىسى — 12، شاڭعىمەن ترامپليننەن سەكىرۋ — 4، فريستايل — 10، سنوۋبورد — 10، شانا سپورتى — 4، شايبالى حوككەي — 2).

ارىستانبەك مۇحامەدي ۇلى اتاپ وتكەندەي، ۇلتتىق قۇرامانىڭ الداعى وليمپيادا ويىندارىنا 9 سپورت ءتۇرى بويىنشا 57 ليسەنزياسى بار: بياتلون — 10، شورت-ترەك — 12، كونكيمەن جۇگىرۋ سپورتى — 12، شاڭعى جارىسى — 7، مانەرلەپ سىرعاناۋ — 3، فريستايل موگۋل — 4، فريستايل اكروباتيكا — 5، تاۋ شاڭعى سپورتى — 2، شاڭعىمەن ترامپليننەن سەكىرۋ — 1، شانا سپورتى — 1.

«1994 جىلدان 2010 جىلعا دەيىنگى ارالىقتا وتكەن قىسقى وليمپيادا ويىندارىمەن سالىستىرعاندا، قازاقستاندىق دەلەگاسيا 2018 جىلى وتەتىن وليمپيادا ويىندارىنا كوبىرەك ليسەنزياعا يە بولدى»، — دەدى ارىستانبەك مۇحامەدي ۇلى.

بۇدان وزگە، مينيستر وليمپيادا ويىندارىنىڭ باستالۋىنا دەيىن قىسقى سپورت تۇرلەرى بويىنشا ۇلتتىق كوماندالار وقۋ-جاتتىعۋ جيىنىمەن جانە ليسەنزيالىق جارىستارعا قاتىسۋمەن قامتاماسىز ەتىلگەنىن ايتىپ ءوتتى.

جوعارى ناتيجەگە قول جەتكىزۋدىڭ ماڭىزدى فاكتورى رەتىندە سپورتشىلاردى ساپالى قۇرالدارمەن جانە جابدىقپەن قامتاماسىز ەتۋ ماسەلەلەرى شەشىلدى. سونداي-اق، دۇنيەجۇزىلىك دوپينگكە قارسى اگەنتتىك ۇسىناتىن قاجەتتى شارالاردى ۋاقىتىلى جانە ساپالى باقىلاۋعا ءارى جۇزەگە اسىرۋعا ەرەكشە نازار اۋدارىلادى.

«وليمپيادالىق دەلەگاسيا الدىنداعى مىندەت — سوچيدەگى وليمپيادا ويىندارىنىڭ قورىتىندىسىنان تومەن ناتيجە كورسەتپەۋ»، — دەپ قورىتىندىلادى ارىستانبەك مۇحامەدي ۇلى.

اتالعان ماسەلەنى قاراۋ بارىسىندا ۇلتتىق وليمپيادا كوميتەتىنىڭ باس حاتشىسى دانيار ءابىلعازين دە ءسوز سويلەدى.

پرەمەر-مينيستر باقىتجان ساعىنتايەۆ ۇلتتىق قۇراماعا وليمپيادا ويىندارىندا جاقسى ناتيجە كورسەتۋدى تىلەدى.

«قىسقى وليمپيادا ويىندارىنىڭ باستالۋىنا از ۋاقىت قالدى، ونىڭ اشىلۋىن اسىعا كۇتەمىز جانە سپورتشىلارىمىزعا ساتتىلىك پەن جەڭىس تىلەيمىز. سپورتشىلارىمىز ەل ءۇمىتىن اقتاپ، مەدالدارمەن ورالادى دەپ ۇمىتتەنەمىز»، — دەپ تىلەدى باقىتجان ساعىنتايەۆ.