تەكەلى قالاسى اربات ماڭىنداعى كوپ قاباتتى ءۇي الاڭىندا ايازعا قاراماستان قارا قۇرىم ادام. كوشەگە ويناۋ ءۇشىن بالالار، قارت كىسىلەر مەن كىشكەنتاي بالالارى بار انالار شىققان. بۇعان دەيىن وسىندا ءتيىستى بالالار الاڭى مەن اباتتاندىرۋ بولماعان.

ءبىراق بۇل جەردى جەرگىلىكتى كاسىپكەر قۋانىشبەك ەرعوجانوۆ ادام تانىماستاي وزگەرتتى.

الماتى وبلىسى كاسىپكەرلەر پالاتاسى باسپا ءسوز قىزمەتىنىڭ مالىمەتىنە سۇيەنسەك، جەكە قاراجاتىنا ول اۋماقتى اباتتاندىرىپ، قۇمسالعىش، اتكەنشەكتەر مەن تۋرنيكتەر سالىپ بەرگەن. بۇل يگى ىسىنە ءۇي تۇرعىندارى عانا ەمەس، جالپى تەكەلىلىكتەر مەن قالا باسشىلىعى ءدان ريزا. بالالار الاڭىنىڭ قۇرىلىسىن كاسىپكەر پرەزيدەنتتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىن جۇزەگە اسىرۋعا باعىتتالعان «اتامەكەنىم» رەسپۋبليكالىق اكسياسى اياسىندا باستادى.

«وزدەرىڭىز بىلەتىندەي، وتكەن جىلى مەملەكەت باسشىسى «رۋحاني جاڭعىرۋ» باعدارلامالىق ماقالاسىن جاريالاپ، بيزنەسمەندەردى قوعامعا پايدا اكەلۋگە، ەڭ الدىمەن تۋعان جەرىنە كومەك كورسەتۋگە شاقىردى. بۇگىنگى تاڭدا الەۋمەتتىك جاۋاپكەرشىلىك كاسىپكەرلىك قىزمەتتىڭ اجىراماس بولىگىنە اينالۋ كەرەك. سوندىقتان، مەنىڭ ويىمشا ءار ادام بيزنەستە بولسىن، باسقا سالادا بولسىن، ءوزىنىڭ مۇمكىندىكتەرىنە قاراي اينالاسىنا قولداۋ ءبىلدىرىپ وتىرۋى ءتيىس»، - دەپ اتاپ ءوتتى كاسىپكەر.

52 جاستاعى قۋانىشبەك ەرعوجانوۆتىڭ كاسىبى مەتالل قۇراستىرىلىمدارىن شىعارۋمەن بايلانىستى. تەكەلىدەگى سەحىندا مەتالل مەن ءتۇرلى قورىتپادان بۇيىمدار دايىندايدى. بالالار الاڭقايى كاسىپكەردىڭ العاشقى قايىرىمدىلىق جوباسى ەمەس. ول تۇراقتى تۇردە از قامتىلعان جانۇيالارعا جاردەمدەسىپ، اعاش پەن مەتاللدان جاسالعان جيھازداردى سىيلاپ وتىرادى.

«تەكەلىنىڭ بيزنەس قوعامداستىعى بارلىق باعىت بويىنشا الۋمەتتىك جاۋاپكەرشىلىكتەرىن كورسەتىپ كەلەدى. مىسالى، جاڭا جىل الدىندا ىسكەر ايەلدەر «تەكەلى اسار» قايىرىمدىلىق جوباسىن باستاعان. ادامدار ساتىپ العان زاتتارىن قالا دۇكەندەرىندە ارنايى جاسالعان سورەلەرگە قويىپ، الەۋمەتتىك جاعىنان از قامتىلعان ادامدارعا كومەكتەسە الادى. سونىمەن بىرگە، كاسىپكەرلەر جاس سپورتشىلاردى ۇنەمى قولداپ، رسپۋبليكالىق جانە حالىقارالىق بىرىنشىلىكتەرگە قاتىسۋعا دەمەۋشىلىك تانىتىپ وتىرادى»، - دەيدى كاسىپكەرلەر پالاتاسىنىڭ تەكەلى قالالىق فيليالىنىڭ ديرەكتورى تۇرىسبەك ءجۇمادىلوۆ.

سونداي-اق ءجۇمادىلوۆتىڭ ايتۋىنشا، تەكەلىلىك كاسىپكەرلەر مۇمكىندىگى شەكتەۋلى بالالاردى ءوز قامقورلىقتارىنا العان.