كەزەكتى ءبىر جيىن وتكىزىپ جاتىرمىن. تاقىرىپ: «جينالىستاردا ۇيىقتاماۋ تۇرالى جينالىس». وبلىس اكىمى قىزمەتىندە ءجۇرىپ، مۇنداي تاقىرىپتى ءبىرىنشى رەت قوزعاپ وتىرمىن. اڭگىمەنى ارىدەن باستاي بەرگەنىم سول، ارتقى جاقتان قورىلداعان داۋىس ەستىلدى. سالدەن كەيىن ىرىلداعان، ارتىنشا سىرىلداعان قورىلدار ەستىلىپ جاتتى.
شەنەۋنىكتەر ءوزى ۇيلەرىندە ۇيىقتايدى ما ءوزى؟ الدە تۇنىمەن ءجۇن ءتۇتىپ، كۇبى ءپىسىپ، بىردەڭە ءىشىپ، كەۋىپ–ءىسىپ جاتادى ما؟ قاشان كورسەم وسى! مەملەكەتتىك ماڭىزدى ماسەلەلەردى تالقىلاپ جاتساق تا، پىرىلداپ جاتقاندارى. بۇدان بىلاي جينالىستى شالقامىزدان جاتىپ الىپ وتكىزەمىز–اۋ، دەيمىن؟ قۇس جاستىقتى جاستانىپ دەگەندەي...
ءبىر قاراسام، زالداعىنىڭ ءبارى ۇيقىعا كەتىپتى... پىس-پىس، ىس-ىس ەتكەن دىبىستار دا بارشىلىق.
–ويان، قازاق! –دەپ داۋىستاپ ەدىم، بىرەۋى سەلت ەتپەدى. ويپىرماي، دەپۋتاتتار عانا ۇيىقتايدى دەپ جۇرسەم، قاراماعىمداعى شەنەۋنىكتەر دە ماۋباستار ەكەن عوي؟
–ويان، قازاق، قالعىما!
قورىلدار ودان سايىن ۇدەدى.
–مەن قازاقپىن، مىڭ ءولىپ، ءبىر تىرىلىگەن...
سەلت ەتپەدى. ءبارىنىڭ ۇستىنە كورپە جاۋىپ، جان-جاعىن قىمتاپ جاتسام عوي؟ وبلىستىق دەنساۋلىق ساقتاۋ باسقارماسىنىڭ باستىعىن ءتۇرتتىم.
–ويان، قازاق...
–ويانبايتىن قازاقپىن... –دەگەن ول باسىن ارى قاراتىپ، قورىلعا باستى. مىنالار قىزىق–ەي؟ وبلىس اكىمىنىڭ كوزىنشە ۇيقىعا باستى! دەرەۋ كومەكشىمە تەلەفون سوعىپ، دىبىس كۇشەيتكىش الدىردىم. ءسويتتىم دە:
–ويانىڭدار، قۇرمەتتى ماۋباستار! –دەپ ايقاي سالىپ ەدىم، ءبارى ۇشىپ تۇردى. ساسقالاقتاعاندارى قول شاپالاقتادى...
–ماسەلەنى ءتۇس كورىپ شەشىپ جاتىرسىزدار ما؟ –دەپ سۇرادىم بارىنەن، –وتىرىڭىزدار!
جينالىستى ارمەن قاراي جالعاستىرعانىم سول، ارتقى جاقتان پويىزدىڭ داۋىسى ەستىلگەندەي مە؟ ىڭعورس–قورس، ىڭعورس–قورس... بىرەۋ ساندىراقتاپ جاتىر: «ءبىزدىڭ جوتەلىمىز: ايلىعىمىزدى كوتەرىڭىز!» تاعى بىرەۋ: «ۇستاڭدار، ۇستاڭدار، قاشىپ كەتتىىى!» دەپ ساندىراقتاي ورنىنان ۇشىپ تۇردى دا، ەسىككە قاراي جۇگىرىپ، ارتىنشا بىرەۋدى قۋالاي جونەلىپ، جوق بولدى... ءبارى قالىڭ ۇيقىعا كەتتى. مەنىڭ دە ۇيقىم كەلىپ، ەسىنەپ الدىم. ءبىراق وبلىس اكىمىنىڭ ۇيىقتاۋعا قۇقى جوق!
–ويان قازاق، بولما مازاق! –دەپ داۋىس كۇشەيتكىشپەن سويلەپ ەدىم، ءبارى ورىندارىنان ۇشىپ تۇرىستى. تاعى دا قول شاپالاقتادىم. «ۇيىقتاعاندارىڭىز ءۇشىن بارىڭىزگە بونۋس!» دەپ ەدىم، ولار قۋانا قول شاپالاقتادى. ۇزاق. ءسىز دە قول شاپالاقتاپ قويىڭىز، اعايىن! مەنىڭ اڭگىمەمە ۇيقىڭىز كەلىپ كەتكەن جوق پا ا؟
مۇحتار شەرىم
پىكىر قالدىرۋ