سوڭعى ون كۇندە اۋا-رايى كۇرت سۋىپ كەتتى. كومىر تاپشىلىعى حالىققا ەرەكشە سەزىلىپ جاتىر. ءبىر عانا الماتىنىڭ وزىندە كومىر تاپپاي ساندالعان جۇرتتا ەسەپ جوق. ماسەلەن، بەكماحانوۆ كوشەسىندە ورنالاسقان «الەم كومىر» كومپانياسىندا كومىر ساتىلمايدى. كومپانيا وكىلدەرى «كومىر تەك 3 اپتادان كەيىن ءبىراق بولادى» دەپ اۋىزدارىن قۋ شوپپەن ءسۇرتىپ وتىر. ەرىكتى ءتىلشىمىز ەرلان تولەۋباي ماسەلەنىڭ ءمان-جايىن ءبىلۋ ءۇشىن اتالمىش مەكەمەگە باردى. 

«الەم كومىردىڭ» الدىندا توپىرلاپ تۇرعان ادامدار شامالعان، بايسەركە جاقتان وتىن تابا الماي، اقىرعى ءۇمىتتىڭ جەتەگىمەن وسىندا كەلگەن. الايدا كومپانيا قىزمەتكەرلەرى مۇندا دا كومىر جوق ەكەنىن مالىمدەپتى. ەرىكتى ءتىلشىمىز تۇسىرگەن ۆيدەودا كومىر الىپ شىعىپ بارا جاتقان اۋىر جۇك كولىكتەرىن كورۋگە بولادى. بۇل جۇك كولىكتەرىن وتكىزىپ وتىرعان كومپانيا قىزمەتكەرلەرىنىڭ سوزىنشە، كومىردى اكەتىپ جاتقان ازاماتتار ەرتە قامدانىپ، الدىن الا تاپسىرىس بەرگەن.

كومىر تاپشىلىعىنىڭ سەبەبىن انىقتاۋ ماقساتىندا جۋرناليست ەرلان تولەۋباي كومپانيا باسشىلارىمەن تىلدەسپەك ەدى، ءبىراق ولار ورنىندا بولماي شىقتى. قاشان كەلەتىندەرى دە بەلگىسىز ەكەن.

قىستىڭ قاھارى قاتتى. وعان كومىردىڭ قىمباتتاعانىن قوسىڭىز. تۇرعىنداردىڭ ايتۋىنشا، بيىل كومىردىڭ ساپاسى دا ناشار. ساقىلداعان سارى ايازدا ءۇيدى جىلىتۋعا كۇشى جەتپەيدى.