ەلوردالىق پوليسەيلەر تەرروريزمگە قاتىستى وسال نىسانداردى تەكسەرۋدى جالعاستىرىپ جاتىر. وتكەن جىلى 1106 نىسان تەكسەرۋدەن ءوتىپ، ونىڭ ىشىندە 44 مەنشىك يەسىنە 11 ملن 980 مىڭ تەڭگە ايىپپۇل سالىندى، دەپ حابارلايدى Qamshy.kz اقپارات اگەنتتىگى استانا اكىمدىگىنىڭ رەسمي سايتىنىڭ مالىمەتىنە سۇيەنىپ.
«اكىمشىلىك قۇقىق بۇزۋشىلىق تۋرالى كودەكستىڭ 149-بابى بويىنشا 35 اكىمشىلىك حاتتاما تولتىرىلدى، اقتك 463-بابى بويىنشا 9 اكىمشىلىك حاتتاما تولتىرىلىپ، جالپى سوماسى 11 ملن 980 مىڭ تەڭگەنى قۇرادى»، – دەپ حابارلادى استانا قالالىق ءىىد ەكسترەميزم مەن تەرروريزمگە قارسى كۇرەس باسقارماسى.
ق ر ۇكىمەتى بەكىتكەن تىزىمگە سايكەس، ادامدار كوپ جينالاتىن جەرلەرگە قاتىستى: ساۋدا ءۇيى، قوعامدىق تاماقتانۋ ورنى، كونسەرت زالى، سپورتتىق كەشەندەر، ۆوكزال، تەمىرجول ستانسياسى، ءبىلىم، دەنساۋلىق، قۇلشىلىق ەتەتىن عيباداتحانالار، مەملەكەتتىك ورگاندار نىسانى، پوچتا جەلىسى، قوناق ۇيلەر، دەمالىس ايماقتارى، پانسيوناتتار جاتادى.
بۇگىندە ادامدار كوپ جيىلاتىن جەرلەردىڭ باسشىلارى جىبەرەتىن ءجيى قاتەلىكتەر مىنالار: نىساننىڭ تەرروريزمگە قارسى قۇجاتىنىڭ جوقتىعى، قاۋىپسىزدىكتىڭ قامتىلماۋى، پەريمەتر بويىنشا بەينەكامەرانىڭ جوقتىعى نەمەسە سانىنىڭ جەتكىلىكسىزدىگى.
پوليسەيلەر ق ر اقتك 149-بابىنا سايكەس ورىنداماعانى نەمەسە ادامدار كوپ جيىلاتىن جەرگە قاتىستى نىساننىڭ قاۋىپسىزدىگىن جەتكىلىكتى دەڭگەيدە ساقتالۋىن، تەرروريزمگە قارسى قورعانۋدى قامتاماسىز ەتۋ مىندەتىن اتقارماعانى ءۇشىن باسشىلارى مەن قوجايىندارىنا اكىمشىلىك ايىپپۇل سالىنادى، ياعني جەكە لاۋازىمدى تۇلعالارعا 100 اەك (226 900 تەڭگە) كولەمىندە. ال كوممەرسيالىق ەمەس ۇيىمدار مەن شاعىن كاسىپكەرلىك سۋبەكتىلەرىنە 200 اەك (453 800 تەڭگە)، ورتا بيزنەس سۋبەكتىلەرىنە 300 اەك (680 700 تەڭگە) جانە ءىرى كاسىپكەرلىك سۋبەكتىلەرىنە 500 اەك (1 134 500) ايىپپۇل سالىنادى.
سونداي-اق كورسەتىلگەن باپ بويىنشا اكىمشىلىك ماتەريالدى قۇراعاننان كەيىن نىسان باسشىلارىنا اتالعان كەمشىلىكتەردى 30 تاۋلىك ىشىندە كوزىن جويۋ تۋرالى ۇيعارىم شىعارىلادى. ەگەر وسى كورسەتىلگەن مەرزىمدە كەمشىلىكتەر جويىلماسا، نىسان باسشىسىنا قايتادان 462 اقتك بويىنشا اكىمشىلىك حاتتاما تولتىرىلىپ، تاعى دا قوسىمشا ايىپپۇل تولەتەدى، كەيبىر جاعدايلاردا نىساننىڭ جۇمىسى توقتاتىلادى.
پىكىر قالدىرۋ