اقتوبە وبلىسىنىڭ مۇعالجار اۋدانى قاندىاعاش قالاسىنداعى №2 مەكتەپتەگى ورامال تارتقان قىز بالالار ەكى ايدان بەرى ساباققا كىرە الماي وتىر. قازاقستانداعى «ورامال داۋى» كەزىندە رەسەي مەكتەپتەرى جاڭا وقۋشىلارمەن تولىققالى جاتىر. 

ازاتتىقتىڭ مالىمەتىنە سۇيەنسەك، اقتوبە وبلىسىندا ۇزاققا سوزىلعان تەكە-تىرەستەن شارشاعان اتا-انالار بالالارىن ماسكەۋدەگى اقىلى قاشىقتان وقىتاتىن مەكتەپتەرگە بەرمەكشى. مۇنداي وقۋدىڭ ءبىر جالدىق باعاسى – 200 مىڭ تەڭگە (620 اقش دوللارى).

اقتوبە وبلىسىنداعى شۇبارقۇدىق كەنتىنىڭ تۋماسى قاسىم جاڭبىرشين بىرنەشە جىلدان بەرى قاندىاعاشتا تۇرادى. تۇراقتى جۇمىسى جوق جىگىت وتباسىن تاكسي ايداپ اسىراپ جۇرگەنىن ايتادى. قاسىم جاڭبىرشين قاندىاعاشتاعى №2 ورتا مەكتەپتىڭ 4- جانە 1-سىنىبىندا وقيتىن ەكى قىزىنىڭ 9 قاڭتاردان بەرى ساباق وقىماي وتىرعانىنا قاپالى.

- قىزدارىم 8 قاڭتار كۇنى ساباققا باردى. ال 9 قاڭتاردان باستاپ مەكتەپ ديرەكتورى «ورامالمەن كىرگىزبەۋ تۋرالى بۇيرىق» تۇسكەنىن ايتىپ مەكتەپكە كىرگىزبەدى. سودان بەرى ءبىر اپتا بويى اپاردىم، اقىرى كىرگىزبەگەن سوڭ قىزدارىمدى رەسەيدەن وقىتۋدى ۇيعاردىم، - دەيدى ول ازاتتىققا.

ونىڭ سوزىنشە، بالالارىن رەسەيدەگى قاشىقتان ءدارىس بەرەتىن ورتا مەكتەپتە وقىتىپ جاتقان اتا-انالار از ەمەس. ءجاڭبىرشيننىڭ سوزىنشە، ول ماسكەۋدەگى «پەرۆايا شكولا» مەكتەبى تۋرالى ەستىپ، ءوزى دە حابارلاسقان، بۇكىل قۇجاتىن تاپسىرعان جاعدايدا قىزدارىنىڭ قابىلداناتىنى تۋرالى انىقتاما دا العان. ول بۇل مەكتەپتە وقۋدىڭ اقىلى – ءبىر ايعا 3 800 رۋبل نەمەسە 21 800 تەڭگە ەكەنىن، ءبىراق ءوزىنىڭ وسىعان شاراcىزدىقتان كونىپ وتىرعانىن ايتتى.

ءدىني سەبەپپەن قىزدارىنا ورامال تاققىزعان كەيبىر اتا-انا قاشىقتان وقىتۋ باعدارلاماسىنا قىزىعىپ جاتقان جانە ءبىر مەكەمە – «دوماشنيايا شكولا» مەكتەبى قاشىقتان وقىپ جاتقان قازاقستاندىقتاردىڭ بارلىعىن راستادى. مەنەدجەر يانا يسامۋرادوۆانىڭ ايتۋىنشا، ماسكەۋلىك مەكتەپ ءۇشىن «وقۋشىنىڭ ۇلتى، ءدىنى، كيىمى ماڭىزدى ەمەس».

- ءبىز وقۋعا نيەت بىلدىرگەندەردىڭ ءبارىن قابىلدايمىز. مەكتەپ اككرەديتاسيادان وتكەن. ولار رەسەي فەدەراسياسى اتتەستاتىن الادى جانە سول بويىنشا ارى قاراي ەگە سىناعىن تاپسىرا الادى، - دەپ ءتۇسىندىردى يانا يسامۋرادوۆا ازاتتىققا.

قاسىم جاڭبىرشين قاندىاعاشتاعى مەكتەپ ديرەكتورى «ءبىرىڭعاي فورما» تۋرالى ايتقانىمەن ول تالاپتىڭ مۇلدە ساقتالمايتىنىن ايتىپ، سىنادى.

- فورمانى ساقتاپ جاتقان ەشكىم جوق. بالالار الا قۇلا كيىنىپ بارىپ ءجۇر. ال مەنىڭ قىزدارىم مەكتەپ تالاپ ەتكەن فورمانى كيىپ وتىر. تەك باستارىندا كيمەشەك بار، سول ءۇشىن كىرگىزبەيدى، كۇندە بارامىز، - دەيدى ول.

ال مۇعالجار اۋداندىق ءبىلىم ءبولىمىنىڭ قىزمەتكەرى، اتا-اناسى وقۋشىنى باسقا مەكتەپتىڭ قابىلداپ الاتىنى تۋرالى انىقتاما اكەلسە، قۇجاتتارىن بەرەتىنىن مالىمدەدى.

ورامال تاققانى ءۇشىن بالالارىن مەكتەپكە كىرگىزبەگەن اتا-انالاردىڭ قۇقىعىن قورعاپ جۇرگەن ادۆوكات مۇرات تاكاۋموۆتىڭ ايتۋىنشا، مەكتەپ باسشىلىعى بالالاردى مەكتەپكە كىرگىزبەۋ ءارى ولاردىڭ قۇجاتتارىن قولدارىنا بەرمەۋ ارقىلى اتا-انانىڭ دا، بالانىڭ دا قۇقىعىن بۇزىپ وتىر. ادۆوكات مەكتەپ باسشىلىعى سۇيەنىپ وتىرعان ءبىلىم جانە عىلىم مينيسترلىگىنىڭ «ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتاردى بەكىتۋ تۋرالى» №26 بۇيرىعى زاڭ ەمەس ەكەنىنە نۇسقايدى. بۇيرىقتىڭ قازاقستان ازاماتتارىنىڭ كونستيتۋسيالىق قۇقىقتارىنىڭ الدىندا «ەشقانداي سالماعى جوق» دەپ سانايدى. ول مەكتەپ ديرەكتورلارى سىلتەمە جاساپ وتىرعان بۇيرىقتا «مەكتەپ فورماسىنا ءتۇرلى ءدىني كونفەسسيالارعا قاتىستى كيىم ەلەمەنتتەرىن قوسۋعا بولمايتىنى، ءبىراق وعان وزگەرىستى اتا-انالاردىڭ قوعامدىق كەڭەسىمەن كەلىسىپ ەنگىزۋگە بولاتىنى» ايتىلعانىن ەسكەرتتى.