وزبەك ءانشىسى ساردور مامادالييەۆ اقتوبەدەگى اۆتوبۋس ورتىندە قازا تاپقان 52 وزبەك ازاماتى تۋرالى بەينەبايان ءتۇسىردى، دەپ حابارلايدى Qamshy.kz اقپارات اگەنتتىگى. بۇل بەينەبايان «Unutmoq osonmas sizlarni»، قازاقشا «ۇمىتۋ قيىن» اتتى انگە تۇسىرىلگەن.
بەينەبايان وقيعاسى ومىردەن الىنعاندىقتان، كوپشىلىكتىڭ جۇرەگىنە جەتكەن سياقتى.
ءاننىڭ ءماتىنىن وزبەك اقىنى شاحلو احروروۆا جازعان.
جىلا، وتان!
باسىما اق سالام-اي دەپ جىلا، وتان،
قىردى كەزگەن نالام-اي دەپ جىلا، وتان.
ەلۋ ەكى دەم ءۇزىلدى ءبىر-اق ساتتە،
«ەلۋ ەكى دانام-اي!»، - دەپ جىلا، وتان،
بەيۋاق كەتكەن بالام-اي دەپ جىلا، وتان!
نەسىبەمدى تەرەيىن دەپ شىعىپ كەتكەن،
پەشەنەمنەن كورەيىن دەپ شىعىپ كەتكەن،
انا ەڭسەسىن كوتەرمەستەي جىعىپ كەتكەن،
«ەسسىز كەتكەن بالام-اي!»، - دەپ جىلا، وتان،
«ءىزسىز كەتكەن بالام-اي!»، - دەپ جىلا، وتان!
وزگە جۇرتتا سارساڭ بولىپ، قور بولدىڭ با،
اح، پەرزەنتىم كومەگىمە زار بولدىڭ با؟
«ەلۋ ەكى جۇلىنىمدى ءۇزىپ كەتكەن
ەلۋ ەكى قۇلىنىمدى جۇلىپ كەتكەن،
شەيىت كەتكەن بالام-اي!»، - دەپ جىلا، وتان!
ەڭ اۋىر قام – بالا ءقابىرىن كورۋ ەكەن،
ەڭ اۋىر دەرت – وزگە جۇرتتا ءولۋ ەكەن،
ەڭ اۋىرى – بارىنە دە كونۋ ەكەن،
«كوككە جەتتى نالام-اي!»، - دەپ جىلا، وتان،
«ءقابىرىڭ قانە بالام-اي؟»، - دەپ جىلا، وتان!
قايدا بارساڭ ىزدەرىڭنەن ەرەمىن دە،
ۇيىڭە قايت، ىرىزدىق تاۋىپ بەرەمىن دە،
بوتەن ەلدە سەن باسىڭدى ءيىپ جۇرسەڭ،
باس كوتەرىپ قالاي ەندى جۇرەمىن دە،
…بەيۋاق كەتكەن بالام-اي دەپ جىلا، وتان!
اۋدارعان سۇلۋحان مىڭباي
