5 اقپاندا «قازاقستان ينجينيرينگ» كومپانياسى ءتوراعاسىنىڭ بۇرىنعى ورىنباسارى قانات سۇلتانبەكوۆتىڭ تۇرمەدەگى جازاسى ايىپپۇلمەن الماستىرىلعانى حابارلاندى. سۇلتانبەكوۆ پارا العانى ءۇشىن 2 ميلليارد 139 ميلليون تەڭگە ايىپپۇل تولەۋگە مىندەتتەلدى. جازاسى جەڭىلدەتىلگەن باسقا دا قازاقستاندىق ەكس-شەنەۋنىكتەردى Tengrinews.kz ءتىلشىسى ءتىزىپ شىققان ەكەن.
بۇرىنعى اۋىل شارۋاشىلىعى ۆيسە-مينيسترى ءمۇسلىم ومىرايەۆ
بۇرىنعى ۆيسە-مينيستر 2013 جىلى مەملەكەتتىك تاپسىرىسقا قاتىستى ىستە 100 000 دوللار كولەمىندە پارا العانى ءۇشىن ۇستالدى.
2014 جىلى سوت ومىرايەۆتى ايىپتى دەپ تانىپ، قاتاڭ رەجىمدەگى كولونيادا 10 جىلعا باس بوستاندىعىنان ايىرۋ جازاسىنا كەستى. ادۆوكاتى سوت ۇكىمىنە شاعىمدانسا دا، اپەللياسيالىق ارىزى قابىلدانبادى.
تەك 2016 جىلدىڭ 28 جەلتوقسانىندا سوت ومىرايەۆتىڭ ءوتىنىشىن قايتا قاراپ، شارتتى تۇردە باس بوستاندىعىنان ايىرۋعا ۇكىم شىعاردى.
ەكس-پرەمەر سەرىك احمەتوۆتىڭ ءىسى
قازاقستاننىڭ بۇرىنعى پرەمەر-مينيسترى سەرىك احمەتوۆ 2014 جىلدىڭ قاراشاسىندا ءۇيقاماققا الىنعان بولاتىن. سوت وتىرىسى 2015 جىلدىڭ تامىزىندا باستالىپ، ءتورت ايعا جالعاستى. قىلمىستىق ءىس 338 تومعا جەتتى، ونىڭ 9 تومى ايىپتاۋ اكتىسىنەن تۇرادى. جالپى 82 سوت وتىرىسى ءوتتى. 260 كۋاگەردەن جاۋاپ الىندى. پروسەسكە 4 مەملەكەتتىك ايىپتاۋشى جانە 42 ادۆوكات قاتىستى. 2015 جىلدىڭ جەلتوقسانىندا سوت ونى 10 جىلعا باس بوستاندىعىنان ايىردى. كەلتىرىلگەن شىعىندى وتەگەن سوڭ ونىڭ مەرزىمى 8 جىلعا قىسقاردى.
تۇرمەدە احمەتوۆ جاقسى تارتىبىمەن كوزگە ءتۇستى، كولونيانىڭ قوعامدىق جۇمىستارىنا بەلسەنە ارالاستى.
وسىعان بايلانىستى 2017 جىلى 21 قىركۇيەكتە سەرىك احمەتوۆ بوستاندىققا شىقتى. ق ر قىلمىستىق كودەكسىنىڭ 73-بابىنا سايكەس، سوتتالۋشى تۇرمەدەگى مەرزىمىنىڭ ۇشتەن ءبىرىن وتەسە جانە كەلتىرگەن شىعىندى تولىق تولەسە، سوت ونىڭ جازاسىن جەڭىلدەتە الادى.
2016 جىلدىڭ كوكتەمىندە قاراعاندى وبلىسى مەن قاراعاندى قالاسى اكىمدەرىنىڭ جازاسى جەڭىلدەتىلدى
قاراعاندى وبلىسىنىڭ ەكس-اكىمى باۋىرجان ابدىشيەۆتىڭ بەس جىل باس بوستاندىعىنان ايىرىلعان جازاسى ءۇش جىلعا قىسقاردى، ال قاراعاندىنىڭ بۇرىنعى اكىمى مەيرام سماعۇلوۆتىڭ ءۇش جىلدىق جازاسى ەكى جىلعا قىسقاردى. الايدا بۇل ەكى جازانى دا اكىمدەر وتەپ ۇلگەرگەن جوق. بۇرىنعى شەنەۋنىكتەر جاقسى تارتىبىمەن كوزگە ءتۇسىپ، سوت ولاردى بوستاندىققا شىعارۋدى ۇيعارعان.
قوستاناي اكىمى مەن ونىڭ ورىنباسارلارى
قوستانايداعى «ۇلكەن اكىمدىك ءىسى» 2015 جىلدىڭ جازىندا باستالعان. قالا اكىمىنىڭ ورىنباسارلارى – ماقسۇت قالييەۆ 13 ميلليون تەڭگە، ال فرۋنزيك اراكەليان 300 مىڭ تەڭگە پارا العانى ءۇشىن سوتتالدى.
ورىنباسارلارىنىڭ سوتتالعانىن ەستىگەن قوستاناي اكىمى احمەتبەك احمەتجانوۆ ەسەڭگىرەپ قالدى. الايدا كوپ ۇزاماي ءوزى دە ءىستى بولىپ، قىزمەتىنەن بوساتىلدى.
احمەتبەك احمەتجانوۆ 13 جىلعا باس بوستاندىعىنان ايرىلىپ، قاتاڭ رەجىمدەگى كولونيادا جازاسىن وتەيتىن بولدى. ورىنباسارلارىنىڭ ءبىرى ءتورت جىلعا، ەكىنشىسى جەتى جىلعا سوتتالدى.
كەيىن ورىنباسارلارىنىڭ جازاسى جەڭىلدەتىلدى. فۋنزيك اراكەلياننىڭ جازا مەرزىمى ەكى ەسە قىسقاردى. ال ماقسۇت قالييەۆتىڭ جازا مەرزىمى ءۇش جىلعا دەيىن ازايىپ، كوپ وتپەي بوستاندىققا شىقتى. بىرنەشە ايدان سوڭ ەكس-اكىمنىڭ دە جازا مەرزىمى 13 جىلدان التى جىلعا دەيىن قىسقاردى.
«قازاقستان ينجينيرينگ» كومپانياسىنىڭ بۇرىنعى ورىنباسارى قانات سۇلتانبەكوۆ
2017 جىلدىڭ قاراشاسىندا سوت قانات سۇلتانبەكوۆتى پارا العانى ءۇشىن ايىپتى دەپ تانىپ، 10 جىلعا باس بوستاندىعىنان ايىرعان. قىلمىستىق ءىستىڭ وزگە دە قاتىسۋشىلارى ءتۇرلى جازاعا كەسىلدى.
2018 جىلدىڭ اقپانىندا اشىق سوت وتىرىسىندا قانات سۇلتانبەكوۆتىڭ ءىسى قايتا قارالدى. 5 اقپاندا وتكەن سوت «قازاقستان ينجينيرينگ» كومپانياسى باسشىسىنىڭ بۇرىنعى ورىنباسارىنا 2 ملرد تەڭگە ايىپپۇل سالىپ، بوستاندىققا شىعاردى. ونىمەن سىبايلاس بولعان يزرايل ازاماتى گيل سمولەنسكيي دە تۇرمەدەن قۇتىلعانىمەن، ءۇش ەسە كوپ ايىپپۇل تولەيدى.
اپپەلياسيالىق سوت سۇلتانبەكوۆتىڭ جاقسى ءتارتىبى مەن وتباسىلىق جاعدايىن ەسكەرە وتىرىپ، وسىنداي شەشىمگە كەلگەن ەكەن.
جوعارىداعى ءتىزىم پارا العان شەنەۋنىكتەردەن ءتۇزىلدى. الايدا قىلمىستىڭ بۇل ءتۇرى ونەر ادامدارىن دا اينالىپ وتپەدى. جازاسى جەڭىلدەتىلگەن سوتتالۋشىلاردىڭ قاتارىندا اۋەزوۆ تەاترىنىڭ بۇرىنعى ديرەكتورى دا بار.
كۇنى كەشە سوت ەرلان بىلالگە قاتىستى ۇكىم شىعاردى.
بيىل 5 قاڭتاردا اكتەر 1،5 ميلليون تەڭگە پارا العانى ءۇشىن سوتتالعان. 16 قاڭتاردا ەرلان ءبىلالدىڭ 1 205 000 تەڭگە كولەمىندە كەپىلگە اقشا تولەگەنى بەلگىلى بولدى. سوتتاعى سوڭعى سوزىندە ەرلان ءبىلال ءوز كىناسىن تولىق مويىنداپ، جاساعان ىسىنە وكىنەتىنىن ايتقان. دەنساۋلىعى مەن وتباسىلىق جاعدايىن ەسكەرىپ، بوستاندىعىنان ايىرماۋدى سۇراعان.
7 اقپاندا وتكەن سوت وتىرىسىندا سۋديا قۋانىش ءارىپوۆ ەرلان ءبىلالدى قىلمىستىق كودەكستىڭ 24-بابىنىڭ ءۇشىنشى تارماعى (قىلمىسقا دايىندالۋ جانە قىلمىسقا وقتالۋ) جانە 366-بابىنىڭ ەكىنشى تارماعى (پارا الۋ) بويىنشا ايىپتى دەپ تانىپ، وعان 52،5 ميلليون تەڭگە ايىپپۇل سالدى. ءومىر بويىنا مەملەكەتتىك قىزمەتپەن اينالىسۋ قۇقىعىنان ايىردى.
ايىپپۇلدى ءبىر اي ىشىندە تولەمەسە، ءۇش جىلدان جەتى جىلعا دەيىن تۇرمەگە وتىرۋى مۇمكىن ەكەنىن ەسكەرتتى.
پىكىر قالدىرۋ