الماتىدا "سۇلپاق" ءتارىزدى ۇلكەن ساۋدا كومپانيالارى بار. اتالمىش كومپانيا نەگىزىنەن قىتايدىڭ تاۋارلارىن ساتادى. جۇڭگو دەمەكشى، وسى ساۋدا ورتالىعىنان سمارتفون، ايفون، پلانشەت سياقتى تەحنيكا تۇرلەرىن الۋشىلار كوپ. سونىڭ كوبى - قازاقتار. ال، وسى تەحنيكالاردى الۋشىلار قازاق بولعاسىن ، ونىڭ ءتىلى دە قازاقشا بولۋ كەرەك قوي! مەن بالامىز بەن ەكەۋمىز ەكى كۇن "سۇلپاقتى" ارالاپ، بىردە ءبىر "قازاقشا" ءتىلى بار پلانشەت تابا المادىق. ءدال وسى سەبەپتەن كوپتەگەن قازاق جاستاردىڭ قولىندا جۇرگەن تەلەفونداردا "قازاق ءارىپى" جوق. سودان كوپ قازاق زارداپ شەگىپ ءجۇر. بۇگىنگى جاستار سول سەبەپتى وزدەرىنىڭ قالتا تەلەفوندارىنان ينتەرنەتكە ("تۆيتكە"، "فەيسبۋككە"، "مايل.رۋ. ەل.پوشتاسىنا) شىققاندا ورىس ارىپتەرىن پايدالانىپ ءجۇر. بۇل قازاق ءتىلى گرامماتيكاسىنىڭ ورەسكەل بۇزىلۋىنا جول بەرۋدە. وسى ماسەلەنى انىقتاۋ ءۇشىن مەن ءبىرىنشى كانالداعى "تۇتىنۋشىلاردىڭ قۇقىعىن قورعاۋ" باعدارلاماسىنا تەل. سوقسام، ولار مەنى الماتىداعى "تۇتىنۋشىلاردى قورعاۋ ليگاسىنا" جىبەردى. ال، ولار مەنى تاعى دا الماتى قالاسىنداعى يۋستيسيا بولىمىنە جىبەردى. "ويتكەنى" دەيدى، ولار "قىتايدان كەلەتىن تاۋارلاردا قازاق ءتىلىنىڭ بولۋىن، بولماۋىن سولار شەشەدى" دەيدى. سونىمەن مەنى مەكەمەدەن مەكەمە "دوپ" قىلىپ قۋىپ ءجۇر. ال، تەلەفوندار مەن پلانشەتتەردەگى قازاق ءتىلىنىڭ ماسەلەسىن، ءتىپتى قۇقىعىن شەشەتىن، ءارى قورعايتىن مەكەمە تابا الماي شارشايتىن ءتۇرىم بار. جۇڭگو شىعارعان پلانشەتتەردە حورۆات ءتىلى بار، قازاق ءتىلى جوق. شاماسى، جۇڭگو كورشى وتىرعان قازاقتى ونشا ەلەمەيتىن بولعانى اۋ! ەندىگى ماسەلە، قىتايدان كەلەتىن تاۋارلار پلانشەت، سمارتفوندار مەن كومپيۋتەرلەردىڭ قازاق ءتىلى ارىپتەرىن ورناتىلۋىن (پروگرامماسىن) تالاپ ەتەتىن مەكەمە- قانداي مەكەمە!؟ ول رەسپۋبليكالىق ساۋدا پالاتاسى ما؟ قالاي بولعاندا دا، قىتايدان كەلەتىن سماتفوندارعا، پلانشەتتەرگە، كومپيۋتەرلەرگە قازاق ءتىلىنىڭ پروگرامماسىن ورناتۋ مىندەتتى بولۋى ءتيىس! Cونداي اق، سول تاۋارلاردى ساتىپ الۋشى قازاقتاردىڭ وندا قازاق ءتىلىنىڭ بولۋىن تالاپ ەتۋى ورىندى. ولاي بولسا، تۇتىنۋشىلاردىڭ قۇقىعان قورعاۋ مەملەكەتتىڭ دە مۇددەسى بولۋعا ءتيىستى. سوندىقتان، قىتايمەن ءوزارا ساۋدا كەلىسىمىن جاسايتىن ورگانداردىڭ تەحنيكالىق تاۋارلارعا (سمارتفوندارعا، پلانشەتتەرگە، كومپيۋتەرلەرگە جانە ت.ب.) قازاق ءتىلى پروگرامماسىنىڭ ورناتىلۋىن تالاپ ەتۋىن سۇرايمىز.

جۇمات انەس ۇلى