قازاقستاندىق جۇرگىزۋشى كۋالىگى شەت مەملەكەتتەردە جارامسىز دەگەن اقپارات شىندىققا جاناسپايدى. بۇل تۋرالى ىشكى ىستەر مينيسترلىگى اكىمشىلىك پوليسياسىنىڭ الماتىداعى وكىلدىگى مالىمدەدى دەپ حابارلايدى "استانا" ارناسى.

جاڭا جىلدان باستاپ "حالىقارالىق جۇرگىزۋشىلەر قاۋىمداستىعى" دەپ اتالاتىن ۇيىم قازاقستاندىق جۇرگىزۋ كۋالىگىنىڭ كەيبىر شەت ەلدەردە جارامسىز ەكەنىن حابارلاپ، وزدىگىنشە جۇرگىزۋ كۋالىكتەرىن تاراتا باستاعان. اسىرەسە ەلدەن تىسقارى شىعىپ، ساياحاتتايتىن وتانداستارىمىزعا مۇنداي حابار جاي تۇسكەندەي اسەر ەتكەن بولاتىن.

العاشقى اقپارات حالىقارالىق جۇرگىزۋشىلەر قاۋىمداستىعى دەپ اتالاتىن ۇيىمنىڭ جەكە سايتىندا پايدا بولدى. ودان كەيىن بىرنەشە رەسمي اقپاراتتىق پورتالداردا حالىقارالىق جۇرگىزۋشىلەر كۋالىگى تۋرالى ماقالالار باسىلىپ شىقتى. اقپاراتتىق لەزدەمەگە تەرەڭىرەك ۇڭىلسەڭىز، ەندى قازاقستاندا بەرىلەتىن جۇرگىزۋشىلەر كۋالىگى شەت مەملەكەتتەردە جارامسىز دەگەندى ۇعىناسىز، ياعني بىرىككەن ۇلتتار ۇيىمىنىڭ جول ءجۇرۋ تۋرالى كونۆەنسياسىنا 2011 جىلى 29 ناۋرىزدا وزگەرىس ەنگىزىلگەن. بۇل وزگەرىسكە سايكەس ۇلتتىق جۇرگىزۋ كۋالىكتەرىن ەلدەن تىس اۋماقتا پايدالانۋعا بولمايدى.

"بىرىككەن ۇلتتار ۇيىمىنىڭ كونۆەنسياسىن نەگىزگە الا وتىرىپ، حالىقارالىق جۇرگىزۋشىلەر كۋالىگىن بەرۋدى قولعا الدىق. بىرىككەن اراب امىرلىكتەرىنە نەمەسە تايلاندقا ساياحاتتاپ بارساڭىز، جالعا كولىك الۋ قيىندايدى. تۋريستەر دا قازاقستاندىق جۇرگىزۋ كۋالىگىنىڭ جارامسىزدىعىن ايتىپ شاعىمدار تۇسىرە باستادى. سوندىقتان ءبىز وسىنداي قۇجاتتى بىرىككەن ۇلتتار ۇيىمىنىڭ جارعىسىنا سايكەس قالاعان ازاماتتارعا جاساپ بەرىپ جاتىرمىز"، - دەيدى حالىقارالىق جۇرگىزۋشىلەر قاۋىمداستىعىنىڭ باس مامانى ەرلان يبرايەۆ.

قاۋىمداستىق ون كۇندە 30-دان استام تۋريستكە حالىقارالىق جۇرگىزۋ كۋالىگىن بەرىپ ۇلگەرگەن. حابارلاسىپ، سۋ جاڭا كۋالىك الۋعا اسىققاندار جەتەرلىك دەيدى كومپانيا وكىلدەرى. ونىڭ قۇنى شامامەن 25 مىڭ تەڭگەگە باعالانعان.

ءتىپتى بەلگىلى جيھانگەز دميتريي پەترۋحين دە اتالعان كۋالىككە جاقىندا قول جەتكىزىپتى. بايكەر مۇنداي قۇجات حالىقارالىق تاجىريبەدە كەڭىنەن قولدانىلاتىنىن ايتادى.

"مەن، شىن مانىندە، وسى قيىندىققا تاپ بولدىم. جۇڭگو ارقىلى وتكەندە ءبىزدىڭ ەلدىڭ جۇرگىزۋشى كۋالىگىن مويىنداماي قويدى. ولار ءتىپتى ماعان ەمتيحان تاپسىرىپ، ءوز كۋالىكتەرىن الۋدى ۇسىندى. سول سياقتى ەۋروپا مەن اراب ەلدەرىندە دە حالىقارالىق جۇرگىزۋ كۋالىگىن سۇراعانىن راستاپ بەرەمىن"، - دەدى بايكەر دميتريي پەترۋحين.

الايدا جۇرگىزۋ كۋالىگىن بەرۋگە وكىلەتتى ىشكى ىستەر مينيسترلىگى اكىمشىلىك پوليسياسى جوعارىداعى مەكەمەنىڭ ارەكەتىن زاڭسىز دەپ ەسەپتەيدى. حالىقارالىق جۇرگىزۋ كۋالىگىن بەرۋ "ءۇي ىشىنەن ءۇي تىككەنمەن پارا-پار" دەيدى پوليسيا وكىلدەرى. قازاقستاندا 2006 جىلى جاڭا ۇلگىدە بەرىلە باستاعان جۇرگىزۋ كۋالىگى بىرىككەن ۇلتتار ۇيىمىنىڭ كونۆەنسياسىنا سايكەستەندىرىلگەن.

"قازاقستاندا زاڭعا سايكەس جۇرگىزۋ كۋالىگىن بەرەتىن جالعىز ورگان ول - ىشكى ىستەر مينيسترلىگى. سول قۇزىرلى ورگان بەرگەن كۋالىك قانا جارامدى. باسقا اندايدا ءبىر ۇيىمنىڭ بەرگەنى جارامسىز دەپ سانايمىز"، - دەيدى الماتى قالاسى ءاپب ەمتيحان الۋ، تىركەۋ ءبولىمى باسشىسىنىڭ ورىنباسارى نۇرلان امانبەك.

ىشكى ىستەر ورگاندارىنىڭ مالىمەتىنشە، قازاقستاندىق ۇلگىدەگى جۇرگىزۋ كۋالىگىنىڭ شەتەلدەردە جارامسىزدىعىن ايتىپ، شاعىمدانعان دەرەكتەر كەزدەسپەگەن. سوندىقتان 9 جىلدان بەرى بەرىلىپ كەلگەن جۇرگىزۋ كۋالىگى حالىقارالىق تالاپتارعا جاۋاپ بەرەدى. ال ناۋرىزدىڭ بىرىنەن باستاپ ەلىمىزدە جولدا ءجۇرۋ كۋالىگى تاعى دا جاڭارادى. ىشكى ىستەر مينيسترلىگى كولىك تۇرلەرىن جۇرگىزۋگە قوسىمشا ساناتتار ەنگىزىلگەن جاڭا قۇجاتپەن دە قازاقستاندىقتار شەت مەملەكەتتەردە كەدەرگىسىز جۇرەدى دەپ سەندىردى. دەرەككوز: "استانا" ارناسى