ۆولگوگرادتاعى پەرزەنتحانا قىزمەتكەرلەرىنىڭ قاتەلىگىنەن ەرلى-زايىپتى ۇلدارىن جەتى جىل بويى ءولدى دەپ ويلاعان. وسى ۋاقىتتار ىشىندە جەتى جاستاعى بالا جەتىمدەر ۇيىندە ءوستى. بۇل تۋرالى رەسەيدىڭ ۆولگوگراد وبلىسىنداعى فەدەرالدىق سوت ورىنداۋشىسىنىڭ قىزمەتى حابارلاعان.

جەرگىلىكتى ب ا ق تاراتقان دەرەكتەرگە سۇيەنسەك، پەرزەنتحانادا 2011 جىلى جاڭا بوسانعان ايەلگە ءسابيىنىڭ ءبىر اپتاعا جەتپەي ولەتىنىن ايتقان. مۇنى بىلگەن ەرلى-زايىپتى باس تارتۋ تۋرالى ارىز جازادى. الايدا رايىنان قايتقان اتا-انا بەس كۇننەن سوڭ سابيلەرىن الىپ كەتۋگە بالالار ۇيىنە بارعاندا، قىزمەتشىلەر ۇلدارىنىڭ ەندىگى ءولىپ قالعانىن ايتادى.

جەتى جىل وتكەن سوڭ سوت قىزمەتكەرىمەن كەزىككەن ايەل كۇتپەگەن توسىن سىيعا كەنەلەدى. سوت ورىنداۋشىسىنا كامەلەتتىك جاسقا تولماعان بالاعا كۇتىم جاساپ جاتقان ينتەرناتتىڭ پايداسىنا تولەنەتىن اليمەنتتى اتا-اناسىنان ءوندىرۋ جونىندە قۇجات تۇسكەن. سوت قىزمەتكەرى ولاردىڭ مەكەن جايىن تاپپاعان سوڭ، اناسىنىڭ شوتىن بۇعاتتاپ تاستايدى. بۇل جاعدايدان كەيىن ايەل الگى سوت قىزمەتكەرىنىڭ وزىنە بارىپ، ءىستىڭ ءمان-جايىن انىقتاعىسى كەلەدى. ءتيىستى قۇجاتتاردى وقىپ، ۇلىنىڭ ءتىرى ەكەنىن بىلەدى. سەبەبى وسى ۋاقىتقا دەيىن ەرلى-زايىپتى ءسابيدى ولدىگە ساناپ كەلگەن.

«بالالارىنىڭ ءتىرى ەكەنىن اياق-استى بىلگەن ەرلى-زايىپتى اتا-انا قۇقىعىن قايتارۋ ءۇشىن سوتقا جۇگىندى. 2017 جىلدىڭ قاراشاسىندا جەڭىسكە جەتىپ، 2018 جىلى بالا زاڭدى تۇردە بيولوگيالىق اتا-اناسىنىڭ قولىنا ءوتتى»، - دەلىنگەن ۆولگوگراد وبلىسىنداعى فەدەرالدىق سوت ورىنداۋشىسىنىڭ قىزمەتى تاراتقان اقپاراتتا.