ەلىمىزدە ءسان ءۇشىن سالىنعان مەشىتتەر كوبەيىپ، ءبىرازى قاڭىراپ قالعان. ءدىن ىستەرى ءمينيسترى نۇرلان ەرمەكبايەۆ يمامى جوق، ادام كوپ بارمايتىن بۇل عيماراتتاردى قوجايىندارى ساۋداعا قويىپ جاتقانىن ايتادى. بۇل تۋرالى Qamshy.kz اقپارات اگەنتتىگى كتك جاڭالىقتارىنىڭ مالىمەتىنە سۇيەنىپ جازادى.

ءمينيستردىڭ ايتۋىنشا، كەي مەشىتتەر ءتىپتى جاماعات سانىنا سايكەس كەلمەيدى. ونىڭ ۇستىنە، حالىق كوپ جۇرەتىن كوشەنىڭ بويىنا سالىنعان مەشىتتەر مەن شىركەۋلەردىڭ كەيبىرىندە كولىك قوياتىن ورىندارى بولمايدى. داۋىسى قاتتى شىعىپ، قوڭىراۋلارى اينالاداعى تۇرعىنداردىڭ مازاسىن الادى . وسىنى بۇلداپ مينيسترلىككە شاعىمداناتىندار كوبەيگەن.  سوندىقتان عيباداتحانالاردىڭ، اسىرەسە مەشىتتەردىڭ قۇرىلىسىن تارتىپكە كەلتىرەتىن ۋاقىت جەتتى دەيدى ەرمەكبايەۆ.

-بۇگىندە ەلىمىزدە 3601 مەشىتتىڭ 84ء-ى قاڭىراپ بوس تۇر. بۇل پروسەستى جۇيەگە كەلتىرۋ ءۇشىن ءدىني عيباداتحانالار سالۋعا رۇقسات بەرەتىن ايقىن ستاندارتتار بولۋى قاجەت. سونىڭ ىشىندە، جاڭادان قۇرىلىس سالۋعا نيەتتى ازاماتتارعا قوسىمشا تالاپتار قويىلۋى مۇمكىن. مىسالى، عيباداتحانا سالۋدىڭ جاڭا ۇلگىلى ەرەجەلەرىن ەنگىزۋ كەرەك، - دەدى ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ.