رەداكسيامىزعا باسپاناسىنان ايرىلىپ، ادىلدىك ىزدەپ شىرىلداعان قىزىلوردالىق بەيسەنگۇل الشىنبايەۆا مەن زاڭگەر قۇدايبەرگەن جۋانتايەۆ حابارلاستى. Qamshy.kz پورتالى ەركىن اقپارات الاڭى بولعاندىقتان،  ولاردىڭ ايتقانىن قاز-قالپىندا بەرىپ وتىرمىز. بۇل ىسكە قاتىستى پىكىر بىلدىرەم دەۋشىلەر بولسا، سايت بەتىندە جاريالاۋعا دايىنبىز.

قۇدايبەرگەن جۋانتايەۆ قىزىلوردالىق بەيسەنگۇل الشىنبايەۆانىڭ سوت تاراپىنان ادىلەتسىزدىككە ۇشىراپ، وزىنە تيەسىلى مۇلكىنەن ايرىلىپ قالعانىن ايتادى. ونىڭ سوزىنشە، قولىندا قۇزىرەتى بار ادامدار ب. الشىنبايەۆانىڭ اڭقاۋلىعىن پايدالانىپ، پاتەرىن زاڭسىز يەمدەنىپ العان ەكەن.

- 1997 جىلى قىزىلوردا قالاسى تاسبوگەت كەنتى ناۋرىز مولتەكاۋدانىنداعى بۇرىنعى اۋداندىق اسكەري كوميسساريات عيماراتىن ەكىگە ءبولىپ، تاسبوگەت كەنتىنىڭ اكىمى س. جاپبارحانوۆتىڭ (مارقۇم) شەشىمىمەن پاتەردىڭ ءبىر بولىگىن ب. الشىنبايەۆاعا، ەكىنشى بولىگىن ا. قالييەۆقا بەرگەن. ب. الشىنبايەۆا – كوپ بالالى جانە مۇگەدەك كىسى. ونىڭ 8 بالاسى بار. سول جىلدارى پاتەر يەلەرىنىڭ كووپەراتيۆى، ياعني پيك دەگەن بولاتىن. «ناۋرىز» پيك-ىنىڭ ءتورايىمى ساپاركۇل تۇرسىنبايەۆا مەن تاسبوگەت كەنتى اكىمدىگىنىڭ باس مامانى الماش تاسپانوۆا ەكەۋى پاتەردىڭ جارتىسىنان كوبىن وسى «ناۋرىز» پيك-نە ۋاقىتشا پايدالانا تۇرۋعا سۇراعان. ال پاتەردىڭ قۇجاتتارىن س. تۇرسىنبايەۆا راسىمدەپ، زاڭداستىرىپ بەرەتىنىن ايتقان. اراعا شامامەن 5-6 اي ۋاقىت سالىپ س. تۇرسىنبايەۆا پاتەردىڭ قۇجاتتارىن اكەپ بەرگەن. ءسويتىپ اكىمدىك ىڭعايلى ورىن تاۋىپ بەرگەنشە «ناۋرىز» پيك-ى ب. الشىنبايەۆاعا بەرىلگەن پاتەردىڭ جارتىسىنان كوبىن پايدالاناتىن بولىپ كەلىسەدى. ال 3-4 جىلدان كەيىن س. تۇرسىنبايەۆادان: «پاتەردى قاشان بوساتاسىزدار؟»، - دەپ سۇراسا، «تۇرا تۇرىڭىز، سىزگە كەيىن تۇسىندىرەمىن»، - دەگەن جاۋاپپەن ب.الشىنبايەۆانى شىعارىپ سالا بەرگەن. ال 2007 جىلدىڭ اياعىندا «ناۋرىز» پيك-ى بەلگىسىز سەبەپتەرمەن پاتەردەن كوشىپ كەتكەن، - دەيدى بۇل ىسپەن اينالىسىپ جۇرگەن زاڭگەر.

ال ب. الشىنبايەۆا  «ناۋرىز» پيك-نىڭ ءتورايىمى س. تۇرسىنبايەۆا راسىمدەپ بەرگەن قۇجاتتاردا نە جازىلعانىن تۇسىنبەگەندىكتەن، ونى تەكسەرىپ، اشىپ قاراماعان ەكەن.

- 2008 جىلى پاتەردىڭ سىرتقى ەسىگىنىڭ ىشىنەن كىرپىش ءورىپ بەكىتىپ، ىشكى بولمەلەرىندەگى ەكى ەسىكتى جاڭادان ورناتتىم. بولمەلەردى اكتەپ، سىرلاپ قويدىم. 2016 جىلدىڭ جاز ايىندا كۇردەلى جوندەۋ جۇمىستارىن جۇرگىزىپ جاتقانىمدا اينۇر دەگەن كورشىم «ناۋرىز» پيك-ى پايدالانعان بولمەلەرگە قاتىستى سوت بولعانىن ايتتى. مەن ول تۋرالى ەشتەڭە بىلمەيتىنىمدى ايتىپ، دەرەۋ پاتەر قۇجاتتارىن بالاما وقىتسام، كەزىندە س. تۇرسىنبايەۆانىڭ قۇجات راسىمدەگەندە ماعان تيەسىلى پاتەردىڭ اۋدانىن قاساقانا كەم كورسەتكەنىن بايقادىم»، - دەيدى بەيسەنگۇل الشىنبايەۆا.

زاڭگەردىڭ ايتۋىنشا، س. تۇرسىنبايەۆا ءوزىنىڭ قىزمەتتىك بابىن پايدالانىپ، بوتەن مۇلىكتى يەلەنىپ الۋ ماقساتىندا ۋاقىتشا پايدالانا تۇرۋعا بەرگەن پاتەردىڭ جارتىسىنان كوپ بولىگىنە 2007 جىلدىڭ 11 قىركۇيەگىندە تەحنيكالىق پاسپورت جاساتىپ العان.

ا. تاسپانوۆا قارجى پوليسياسىنا بەرگەن تۇسىنىكتەمەسىندە: «اكىمنىڭ شەشىم شىعارىپ بەرەمىن دەگەنىنە سەنىپ قالىپ، س. تۇرسىنبايەۆاعا وردەردى جازىپ بەرەمىن دەپ قاتەلىك جاساعانىمدى مويىندايمىن، كەشىرىم سۇرايمىن»، - دەگەن بولاتىن. س. تۇرسىنبايەۆا بۇل ءىستى ءوز پايداسىنا اسىرۋ ءۇشىن ا. تاسپانوۆانىڭ  جازىپ بەرگەن، الايدا جارامسىز بولىپ قالعان وردەرىن قولدانعان ەكەن.

- بۇل ءىستى زەرتتەۋ بارىسىندا 1997 جىلى ب. الشىنبايەۆاعا پاتەر بەرىلگەنى تۋرالى تاسبوگەت كەنتى اكىمىنىڭ شەشىمىن ا. تاسپانوۆا مەن س. تۇرسىنبايەۆانىڭ وزدەرى قولدان جاساپ العانىن انىقتادىق. ءارحيۆتى اقتارعانىمىزدا ول پاتەردىڭ تەك ەكى ادامعا عانا بەرىلگەنى بەلگىلى بولدى. تاسبوگەت كەنتى اكىمىنىڭ مۇراعاتتان الىنعان شەشىمىنىڭ كوشىرمەسى قازاقشا ارىپتەرى بار ماشينكادا تەرىلسە، ب. تۇرسىنبايەۆانىڭ ۇسىنىپ وتىرعان كوشىرمەسى قازاقشا ارىپتەرى جوق ماشينكادا تەرىلىپ، سوڭعى جاعى – تاسبوگەت كەنت اكىمىنىڭ قولى قويىلعان تۇسى قۇراستىرىلىپ جاسالعان. وسىلاي س. تۇرسىنبايەۆا ەكى ادامعا بەرىلگەن پاتەردىڭ قۇجاتتارىن ءۇش ادامعا بەرىلگەن دەپ كورسەتىپ، پاتەردىڭ كوپ بولىگىن ءوزى يەمدەنىپ العان»، - دەيدى زاڭگەر قۇدايبەرگەن جۋانتايەۆ.

قىزىلوردا وبلىستىق سوتىنان باستاپ ق ر جوعارعى سوتىنا دەيىن ارىز جازعان ب. الشىنبايەۆا ءوزىنىڭ ءىسى ەش جەردە دۇرىس قارالماعانىنا شاعىمدانىپتى.

- بۇل ىسكە قىزىلوردا وبلىستىق ىشكى ىستەر دەپارتامەنتىنىڭ اسا ماڭىزدى ىستەر جونىندەگى اعا انىقتاۋشىسى، پوليسيا پودپولكوۆنيگى بولات شاجانبايەۆتىڭ تىكەلەي قاتىسى بار. 2016 جىلدىڭ 31 قازانىنان باستاپ وبلىس اكىمى، وبلىس، قالا پروكۋرورى، وبلىستىق سوت، ونىڭ تومەنگى ساتىسىنداعى قالالىق سوت جانە سوتتىڭ سۋديالارى مەنىڭ ارىزىمدى قۇردىمعا جىبەرىپ جاتىر، - دەيدى جابىرلەنۋشى الشىنبايەۆا.

زاڭگەردىڭ ايتۋىنشا، ب. شاجانبايەۆتىڭ جۇبايى بوتاگوز تۇرسىنبايەۆا مارقۇم اناسى سارسەنكۇل تۇرسىنبايەۆانىڭ زاڭسىز يەمدەنگەن پاتەرىن «زاڭ بويىنشا مۇراعا قۇقىق تۋرالى كۋالىكتىڭ» نەگىزىندە مەنشىكتەپ العان ەكەن.

ونىڭ سوزىنشە، پوليسيا پولكوۆنيگى ب. شاجانبايەۆتىڭ زاڭسىز ىس-ارەكەتتەرىن اشكەرەلەپ، وبلىس اكىمى مەن وبلىس پروكۋرورىنا ارىز جازعان كەزدە قۇزىرلى ورىندار ب. الشىنبايەۆانىڭ ءوزىن ايىپتى دەپ تاۋىپ، راقىمشىلىقپەن كەشىرگەن سىڭاي تانىتىپتى.

– 2016 جىلى 31 قازاندا ب. شاجانبايەۆ پەن ب. تۇرسىنبايەۆا مەنىڭ ۇيىمە باسا-كوكتەپ كىرىپ، قىزىمنىڭ باسىنان ۇرىپ قۇلاتىپ، سوڭىندا ءوزىمىزدى كىنالى ەتىپ شىعارىپ، جاۋاپقا تارتتى. وبلىس ورتالىعىنداعى پروكۋراتۋرا ورگاندارىنا بىرنەشە رەت ارىزدانساق تا، سوت ورگاندارىنىڭ اكتىلەرىنە بىرنەشە رەت شاعىمدانساق تا، ب. شاجانبايەۆ پەن ب. تۇرسىنبايەۆانىڭ ارەكەتىندە زاڭسىزدىق بارى دالەلدەنىپ تۇرسا دا، بۇرا تارتۋشىلاردىڭ كەسىرىنەن قىزىم ەكەۋىمىز جەڭىلىس تاۋىپ جاتىرمىز. زاڭسىز قۇجاتتاردىڭ كۇشىن جويۋ تۋرالى تالابىم ءالى كۇنگە دەيىن ورىندالمادى. قىزىلوردا سوتىنىڭ زاڭسىز ىس-ارەكەتتەرىن قالاي توقتاتۋعا بولادى؟ - دەپ شاراسىز كۇرسىنەدى ب. الشىنبايەۆا.