ماڭعىستاۋ وبلىسى مۇناي سالاسىنداعى ماماندىقتاردى بىرتىندەپ ازايتىپ جاتىر. ەسەسىنە ەڭبەك نارىعىن وزگەرتۋ ماقساتىندا بيىل 10 جاڭا ماماندىق ەنگىزگەن. بۇل تۋرالى بۇگىن ايماق باسشىسى ەرالى توعجانوۆ مالىمدەدى، دەپ حابارلايدى Sputnik قازاقستان ءتىلشىسى. 

وبلىس اكىمى حالىقتى مۇنايعا دەگەن قۇلدىق سانا-سەزىمنەن ارىلۋعا شاقىردى.

— مۇناي بايلىق ەمەس، ول بار بولعانى شيكىزات. ءبىزدىڭ بايلىعىمىز – جەرىمىز بەن حالقىمىز. حالقىمىزدان اسقان ەشقانداي بايلىق بولۋى مۇمكىن ەمەس. سوندىقتان قازىرگى تاڭدا ءبىزدىڭ وبلىستا جاستاردى شاعىن جانە ورتا بيزنەسكە تارتۋ، باسقا دا ۇلكەن بايلىقتىڭ بارىن جەتكىزۋ بويىنشا ۇلكەن جۇمىستار اتقارىلىپ جاتىر، — دەدى ول. 

توعجانوۆتىڭ ايتۋىنشا، وبلىستا ەڭبەك نارىعىن ترانسفورماسيالاۋعا قاتىستى جۇمىستار جۇرگىزىلۋدە.  سونىڭ ءبىرى – مۇناي سالاسىنداعى ماماندىقتاردى ازايتۋ. 

—  وتكەن جىلى وبلىستا 215 گرانت ءبولىندى. ونىڭ ىشىندە 50 گرانتتى ءبىز ارنايى بولدىك. سەبەبى بىزدە ءقازىر ەڭبەك نارىعىن وزگەرتۋگە قاتىستى جۇمىستار ءجۇرىپ جاتىر. اتاپ ايتساق، مۇناي سالاسىنداعى ماماندىقتاردى بىرتىندەپ ازايتىپ جاتىرمىز. ول سولاي بولۋى دا كەرەك، بىزگە باسقا باعىتتاردى دامىتۋ قاجەت. بيىل جاڭا 10 ماماندىق ەنگىزدىك. سوعان بايلانىستى مەن 50 گرانتتى ارنايى ءبولىپ وتىرمىن. كەلەسى جىلى 70 گرانت جوسپارلاپ وتىرمىز. ونىڭ ىشىندە تەز قايتارىلىمى بولۋ ءۇشىن 20 گرانتتى ماگيستراتۋراعا بەرىپ جاتىرمىز، — دەدى اكىم.  

بۇگىندە ماڭعىستاۋ وبلىسى شاعىن جانە ورتا بيزنەسكە ەرەكشە دەن قويىپ وتىر. "قارا التىن" ءوندىرىپ جۇرگەن مۇنايشىلاردىڭ دەنى دە جەكە كاسىپكە كوشىپ جاتقان كورىنەدى.

—  مۇنايدىڭ اينالاسىندا ءومىر بويى ءجۇرۋ مىندەت ەمەس قوي. ورتا جانە شاعىن بيزنەس دەگەن بولاشاقتا سەنىڭ بالاڭا، كەيىن نەمەرەڭە دە قالاتىن ەڭبەگىڭنىڭ دۇنيەسى. بۇگىندە كوپتەگەن مۇنايشى سول جاققا اۋىسىپ جاتىر. شوب-تى دامىتۋ جايدان-جاي تۋىپ وتىرعان ماسەلە ەمەس. بۇل سۇراق جاڭاوزەن قالاسىنا بايلانىستى تۋدى. سەبەبى جاڭاوزەندا جۇمىسسىزدىق ماسەلەسى از ەمەس. بۇگىندە قالادا 9 مىڭ ادام مۇناي سالاسىندا ىستەيدى، ال حالىق سانى 150 مىڭ ادام. ءبىر جىلدىڭ ىشىندە 4 مىڭ بالا دۇنيەگە كەلەدى. ەرتەڭ ول بالالاردىڭ ءبارىن ءبىز قايدا جىبەرەمىز؟ سوندىقتان ورتا جانە شاعىن بيزنەسكە جاعداي جاساۋىمىز كەرەك. ەرتەڭدى بۇگىن ويلاماساق، كەيىن ءبارى كەش بولادى"، — دەدى توعجانوۆ.