مەدەۋ اۋدانىنا قاراستى «№5 بوبەكجاي بالاباقشا» مكقك بالاقايلارى ناۋرىز مەيرامىن اتاپ ءوتتى. مەرەكەلىك شاراعا اۋداندىق ءبىلىم ءبولىمىنىڭ قىزمەتكەرلەرى، كاسىپوداق ۇجىمىنىڭ ماماندارى، اۋداندا ورنالاسقان بالاباقشالار مەن مەكتەپتەردىڭ مۇعالىمدەرى كەلىپ، بالالاردىڭ ونەرىن تاماشالادى. بوبەكجاي مەڭگەرۋشىسى گۇلجامال نۇرمانبەتوۆا ءسوز سويلەپ، كوپشىلىكتى مەرەيلى مەرەكەمەن قۇتتىقتادى.

«ناۋرىز بولادى» دەپ كوپتەن كۇتكەن بالاقايلاردىڭ بۇل كۇنى كورسەتەر ونەرى كوپ بولدى. ءبىرى ءان ايتسا، كەلەسى ءبىرى بي بيلەدى. ءبىر توپ بالالار قازاقتىڭ سالت-داستۇرىنەن ءۇزىندى كورسەتسە، تاعى ءبىر توپ بالاقاي «جاس اباي» كورىنىسىن قويدى. وندا بۇلدىرشىندەر ابايدىڭ ولەڭدەرىنەن ۇزىندىلەر وقىدى.

ۇلتتىق قۇندىلىقتارىمىزدى دارىپتەۋگە باعىتتالعان شارادا ءار توپتىڭ تاربيەشىلەرى اتا-انالارمەن بىرىگىپ، بالالاردى قاتىستىرا وتىرىپ، «بەسىككە سالۋ»، «تۇساۋ كەسۋ»، «قىز قۋۋ» سەكىلدى سالت-داستۇردەن كورىنىس قويدى. ودان سوڭ كەزەك ۇلتتىق ويىندارعا بەرىلىپ، بۇلدىرشىندەر ارقان تارتىستى.

اشىق اسپان استىندا وتكەن مەرەكە سوڭىندا جينالعان جۇرتشىلىققا ناۋرىز كوجە مەن باۋىرساق ۇلەستىرىلدى. بالاباقشا ماڭىندا تۇراتىن اۋدان تۇرعىندارى دا بالاقايلاردىڭ ونەرىن تاماشالاپ، ناۋرىز كوجەدەن اۋىز   ءتيدى.