تاۋەلسىزدىكتىڭ  العاشقى   جىلدارى قانداس تۋىستار شەكارا دەيتىن تۇسىنىكتىڭ ەكى جاعىنان جامىراسا كەلىپ تابىسىپ جاتتى. تولقۇجاتپەن- اق اي ارالاپ جۇرە بەرەتىن تمد شەڭبەرىندە تۇرىپ جاتقان  الاش  ۇرپاقتارى  ۇلكەن شاڭىراق استىنا جينالۋىنا    ات- كولىك  اسا بولدىرا قويمادى. قىتايمەن كەڭەس  اراسىندا كەزىندە مۇز قامال بولسا  دا،  ازاتتىق جىلدارى  قازاقستاننىڭ شىعىسىنداعى شەكارامىز اشىلىپ،  جارتى عاسىردان اسا  اتا-مەكەنىن اڭساعان قانداستىرىمىزدىڭ  اۋپىرىمدەپ ەلگە  جەتۋى  دە ءبىر عانيبەت ءىس بولعان ەدى. 

    الايدا، سوڭعى  جىلدارى  بۇل بايلانىس  ءۇزىلىپ  بارادى.  اراداعى  كوشى-قوننىڭ  توقتاعانى  ءوز  الدىنا، ەندى  ۋاقىتشا  بەرىلەتىن  ۆيزا الۋ دا   قيىنداي  تۇسۋدە. قىتايمەن قازاقستاننىڭ اراسىنداعى الىم- بەرىم، بارىس- كەلىستىڭ ارقاسىندا ساياسي، ساۋدا، ءبىلىم ماسەلەلەرىمەن شەكارا اساتىن ازاماتتار كوبەيسە دە،  جەتى- سەگىز مىڭنان اسپايتىن جۇڭگو  ۆيزاسى سوڭعى جارتى جىلدا 3 ەسەگە قىمباتتاپ كەتتى.  بۇرىندار 7 مىڭ تەڭگەگە بەرىلىپ كەلگەن رۇقساتتىڭ قۇنى بۇل كۇندە 200 دوللارعا جۋىقتايدى. ونىڭ ءوزى تەك ءۇش ايدىڭ ىشىندە ءبىر رەت بارىپ-كەلۋگە جارايتىن ۆيزا.ءتۇرلى ماقساتتارعا ساي ءقازىر ءبىر جىلعا دەيىنگى مەرزىمگە بەرىلەتىن رۇقسات تا قىسقارعان.  ءتىپتى پاسپورتىڭا ۆيزا جاپسىرتۋ ءۇشىن ەڭ از دەگەندە ءبىر اي كۇتۋىڭە تۋرا كەلەدى. اپتاسىنا التى- اق ساعات قابىلدايتىن جۇڭگو كونسۋلىنىڭ ەسىگىنەن  قارا قۇلىپ كەتپەيدى.  جۇڭگو  جاعى  ۆيزانى  نەگە  قىمباتتاتىپ  جاتقانى  دا  بەلگىسىز.  ناقتى سەبەپ  تە  جوق.  سوندا  ارعى  بەتكە  قازاق  قالاي بەتتەمەك؟!

    وسى  ۆيزا ماسەلەسى  بويىنشا  قانشا  قانداسىمىز قىسىلتاياڭ  كۇيدە  ءجۇر.  ءبىر عانا  مىسال،  جۇڭگو  كونسۋلىندىعىندا ۆيزانىڭ الەگىمەن جۇرگەن ماۋلەن اعاعا كەزىگىپ قالعان ەدىك.  نارىنقولدىق ماۋلەن اعا اتاسى قايشىبەكتىڭ  باۋىرى تويشىبەك دەيتىن كىسىنىڭ جۇڭگو جەرىندەگى ۇرپاقتارىن ەلگە اكەلۋ ءۇشىن شىر- پىر بولىپ ءجۇر ەكەن. اعامىزدىڭ   ايتۋىنشا،  قايشىبەك ومىرگە  كەلمەي تۇرىپ ەكى جاسار تويشىبەك جيىرماسىنشى جىلدارداعى   اشتىق كەزىندە شەكارا اسىپ كەتىپتى. كەيىننەن   ەگەمەندىك الىپ، سىرتپەن بايلانىس ورناعالى   ارى- بەرى وتكەندەردەن حابار الىپ،  ەتجاقىنى ماۋلەن اعانى تاۋىپ الىپتى. شەكارانىڭ ار جاعىنداعى باۋىرلارىنا اتاسى تۋعان توپىراقتى يىسكەتۋدى پارىز ساناعان ماۋلەن اعا:  «توكەن اتامنىڭ ۇرپاقتارى بار ەكەنىن ەستي سالا جەدەل پاسپورت جاساتىپ، ۆيزا اشتىرۋعا كونسۋلعا كەلگەن ەدىم. بۇگىن -  ءتورتىنشى كۇن.  كۇنىگە  كەزەككە ىلىنبەي قالام. «وحرانالار»  سىبىرلايدى:  دەلدالعا  پارا بەرسەڭىز، تەز بىتەدى دەپ.  مۇندا  سەندەلىپ  جۇرگەن جالعىز مەن ەمەس،  مەن سياقتى قانشاما ادام: جاس بالا كوتەرگەن انالار دا، بۋىنى بوساعان كارى كىسىلەر دە ءجۇر.  سولاردى ايايسىڭ!   ءبارىمىز  دەلدالعا پارا  بەرسەك،  كونسۋل نەگە كەرەك، زاڭ قايدا قالادى؟!- دەپ اشۋلاندى  قاريا.    

   ءتۇيىن: وسىنداي  جاعدايلاردىڭ كۇاسى  بولىپ،  ىشتەي  نالىماسقا  امالىڭ  قالمايدى!  اتا -جۇرتىن اڭساپ، ەلگە كەلسەك دەيتىن قانداستارىمىزدىڭ  جۇڭگو جەرىندە قۇجات ماسەلەسىمەن ساندالعانى دا جەتەر. الماتىنىڭ تورىندە اسپان استى ەلى اتىنان ءپاتۋا جاسايتىن  قىسىق كوزدەر تارىلعان نيەتىن كەڭەيىتكەنى دۇرىس- اۋ... ۆيزانىڭ قىمباتتاۋى جويىلىپ، دەلدالدارعا توسقاۋىل سالىنسا، جۇڭگو كونسۋلى ەسىگىندەگى قارا قۇلىپ كوبىرەك اشىق تۇرسا ەكەن دەگەن تىلەك بىزدىكى.

نۇرعالي نۇرتاي

"