قىرعىز ۇلتىنىڭ ماقتانىشى، ۇلى اقىنى بايدىلدا سارنوگايەۆ 80 جاسقا تولدى. 2013 جىلدىڭ 16 اقپانىندا بىشكەك قالاسىنىڭ وپەرا جانە بالەت تەاترىندا اقىننىڭ مەرەيتويى كەڭىنەن اتالىپ ءوتتى. بار ءومىرىن حالقىنىڭ وسىپ-وركەندەۋىنە ارناعان، سول جولدا ەشبىر قيىندىقتارعا قاراماي جىر مارجاندارىن دۇنيەگە اكەلگەن شايىر ەلدىڭ جۇرەگىنەن ويىپ تۇرىپ العان. ونىڭ: «قىرعىز بولىپ تۋدىم، قىرعىز بولىپ ولەمىن»- دەگەن قاناتتى ءسوزى حالىقتىڭ ىشىندە وتە كەڭ تاراعانىنا قازاقستاننان بارعان مەن جانە داۋلەسكەر كۇيشى سەكەن تۇرىسبەكوۆ كۋا بولدىق. بۇل التىن ءسوزدى ءاربىر قىرعىز بالاسى جاتقا ايتادى. كەشتە 73 جاسىندا "قىرعىزىم - جاڭعىزىم" دەپ ومىردەن وتكەن بايدىلدا بايكەنىڭ ومىرىنەن سىر شەرتەتىن قويىلىمدار مەن اقىننىڭ ولەڭدەرىنە جازىلعان اندەر شىرقالدى. كەش بارىسىندا «جەتىمەن» قورى ۇيىمداستىرعان اقىندار اراسىنداعى حالىقارالىق بايقاۋدىڭ جەڭىمپازدارى ماراپاتتالدى. قوردىڭ ءتوراعاسى ءارى قۇرىلتايشىسى بارلىق قازاق اتبەگىلەرىنىڭ دوسى، قىرعىزدىڭ ۇلتتىق باتىرى بولاتبەك ەسەنتاي ۇلى شەرنيازوۆ.تۇڭعىش رەت بۇل بەدەلدى سىيلىققا تالانتتى اقىن، قازىرگى قازاق پوەزياسىنىڭ ۇزدىك تۋىندىسى بولىپ سانالاتىن «قاندى جۇما» ولەڭىنىڭ اۆتورى، قازاقستان مەملەكەتتىك سىيلىعىنىڭ يەگەرى ۇلىقبەك ەسداۋلەتوۆ اعامىز يە بولدى. ۇلى اعامىزدى ەلارالىق ايتۋلى سىيلىقتىڭ جەڭىمپازى بولۋىمەن شىن جۇرەكتەن قۇتتىقتايمىز! سادىبەك تۇگەل، «ۇلى دالا قىراندارى» قوزعالىسىنىڭ تەڭتوراعاسى، ق ر ەڭبەك سىڭىرگەن قايراتكەرى masa.kz.