قاراعاندىدا ادام ءولتىرىپ، القا بيلەردىڭ شەشىمىمەن 19 جىلعا سوتتالعان پوليسيا قىزمەتكەرى اپەللياسيالىق ارىز ءتۇسىردى. ءبىرىنشى سوتتا-اق 22 جاستاعى پوليسيا سەرجانتى اقىل ەسىنىڭ كەمدىگىن ايتىپ، ءوزىن جىندىحاناعا جىبەرۋدى سۇراعان دەپ جازادى Qamshy.kz اقپارات اگەنتتىگى كتك تەلەارناسى دەرەگىن نەگىزگە الىپ.
بيىلعى جىلدىڭ 1 مامىرىندا پوليسيا سەرجانتى نۇرسەيىت قالدىبايەۆتى ارنايى جاساق قۇرىقتاپ جاتىر. تەرگەۋ مالىمەتىنشە ول 30 شى ساۋىردە «55 ءشى تايوتا كامري» كولىگىن ساۋدالاپ جۇرگەن قاراعاندى تۇرعىنىمەن ساتىپ الۋشى رەتىندە كەزدەسكەن. مارقۇم كولىكتىڭ ءار جەرىن كورسەتىپ جۇرگەندە، سەرجانت قىزمەتتىك تاپانشاسىمەن الگىنىڭ باسىنا وق اتىپتى. ءولى دەنەنى ايدالاعا لاقتىرىپ تاستاپ، مارقۇمنىڭ كولىگىمەن پاترۋلدىك پولكتەگى جۇمىسىنا قايتا ورالعان. قولعا تۇسكەندە كىناسىن تولىق مويىنداعاندىقتان، سوت پروسەسى دە جىلدام ءجۇردى. ءبىراق قورعاۋشىسى ونىڭ اقىل ەسىندە اۋىتقۋى بار دەگەندى العا تارتىپ، ەكس پوليسەيدى پسيحياتريالىق اۋرۋحاناعا جاتقىزۋدى سۇراعان. الايدا، پوليسيا قاتارىندا قىسىلماي اق جۇرگەن قالدىبايەۆتىڭ اعزاسىندا اقاۋ بار دەگەنگە القا بيلەرى سەنگەن جوق.
گۇلبارشىن جىتىكوۆا قاراعاندى وبلىستىق سوتىنىڭ باسپا ءسوز حاتشىسى:
- قالدىبايەۆتى ادام ءولتىرۋ، قارۋدى زاڭسىز پايدالانۋ جانە ۇرلىق بابى بويىنشا القا بيلەرى ونى كىنالى دەپ تاپتى. سوت شەشىمى زاڭدىق كۇشىنە ەنگەن جوق. سوندىقتان ول اپەللياسيالىق ارىز بەرۋگە حۇقىلى.
