ەلىمىزدە وتاندىق ونىمگە سۇرانىس ارتۋدا. الماتىدا جىل باسىنان بەرى 5 كاسىپورىن ىسكە قوسىلعان. بۇل تەك «كاسىپكەرلىكتى قولداۋ كارتاسى» اياسىندا جۇزەگە اسقان جوبالار. جىل سوڭىنا دەيىن، بيزنەس وكىلدەرىنىڭ اشقان زاۋىتتارىنداعى تۇراقتى جۇمىس ورىندارىنىڭ سانى 2 مىڭعا جەتەدى دەپ كۇتىلۋدە. ىسكە قوسىلعان كاسىپورىنداردىڭ باسىم بولىگى قانداي تاۋار وندىرەدى؟ جەرگىلىكتى بيلىكتىڭ قولداۋى قانشالىقتى سەپتىگىن تيگىزۋدە؟

ىسكە قوسىلعانىنا نەبارى ءبىر اي عانا بولعان بۇل زاۋىتتا ءقازىر 8 ءتۇرلى شۇجىق ءونىمى شىعارىلادى. قۇرامىنداعى قاجەتتى شيكىزات – تولىعىمەن وتاندىق تاۋار. كۇنىنە كەم دەگەندە 100 كەلى ءونىم دايىندالادى. بولاشاقتا تۇشپارا، ءمانتى، ەت قوسىلعان ۆارەنيكتەر سەكىلدى 30-عا جۋىق اس جاسالماق. ءوندىرىس ورنىنىڭ سالىنۋى مەن ىسكە قوسىلۋى – ۇكىمەت بولگەن سۋبسيديانىڭ، جەرگىلىكتى بيلىكتىڭ اكىمشىلىك كەدەرگىلەردى بولدىرماۋ ءۇشىن كورسەتكەن قولعابىسىنىڭ ارقاسى دەيدى بيزنەسمەن.

«مەملەكەتتىڭ قولداۋى بولماعاندا، مەن بۇل ءوندىرىس ورنىن ىسكە قوسا المايتىن ەدىم. «دامۋ» كاسىپكەرلىكتى قولداۋ قورى ارقىلى 35 ميلليون تەڭگە نەسيە الدىق. ونىڭ پايىزدىق مولشەرلەمەسىنىڭ تەڭ جارتىسى سۋبسيديا ارقىلى وتەلەدى. بۇل بىزگە ۇلكەن قولداۋ. سونداي-اق، «كاسىپكەرلىكتى قولداۋ كارتاسى» اياسىندا زاۋىتتى سالۋدا، ينفراقۇرىلىمدى جۇرگىزۋدە قۇجاتتىق كەدەرگىلەر كەزدەسپەدى. ءقازىر ون شاقتى ادام جۇمىس ىستەۋدە. الداعى ۋاقىتتا كاسىپورىنعا 30 شاقتى ماماندى تارتامىز دەپ جوسپارلاپ وتىرمىز»، – دەدى كاسىپورىننىڭ باس ديرەكتورى قايرات جۇمانوۆ.

جۇزەگە اسىپ جاتقان جوبالاردىڭ باسىم بولىگى تاماق، ماشينا جاساۋ، اگرونەركاسىپتىك كەشەن، قۇرىلىس ينديسترياسى، فارماسيەۆتيكا، جەڭىل ونەركاسىپ، مەتالل مەن اعاش وڭدەۋ جانە حيميا ونەركاسىبى سالاسى. «كاسىپكەرلىكتى قولداۋ كارتاسى» شەڭبەرىندە وسى جىلدىڭ ەكىنشى توقسانىندا كاسىپورىندار 48 ميلليارد تەڭگەنىڭ تاۋارىن وندىرگەن. ال ودان قازىناعا 3 ميلليارد تەڭگەگە جۋىق سالىق ءتۇسىپتى.

«بۇگىنگى كۇنى يندۋستريالدى-ينننوۆاسيالىق دامۋ باعدارلاماسى شەڭبەرىندە، كاسىپكەرلىكتى قولداۋ كارتاسى بويىنشا 109 جوبا ىسكە اسىرىلۋدا. ونىڭ 47 جوباسى بۇگىنگى كۇنى ىسكە قوسىلدى. «كاسىپكەرلىكتى قولداۋ كارتاسى» شەڭبەرىندە جۇزەگە اسىرىلعان كاسىپورىندار قازىرگى كۇنى الماتى قالاسىندا جۇرگىزىلىپ جاتقان جوندەۋ جۇمىستارى، باسقا دا مەملەكەتتىك ساتىپ الۋلار سياقتى جۇمىستاردىڭ الدىڭعى لەگىندە قاراستىرىلادى»، – دەدى الماتى قالاسى كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باس مامانى دارقان ساعىنبەكوۆ.

جىل سوڭىنا دەيىن 65 ميلليارد تەڭگەنى قۇرايتىن 21 جوبا ىسكە قوسىلادى دەپ جوسپارلانعان. ونىڭ ىشىندە، 1 ميلليارد تەڭگەنى قۇرايتىن 5 كاسىپورىن ءوز جۇمىسىن باستاپ كەتتى. وندا بۇگىندە 90-عا جۋىق ادام ەڭبەك ەتۋدە. ىسكە اسىرىلۋ ساتىسىندا 16 جوبا بار. الداعى ۋاقىتتا 2 مىڭعا جۋىق ادام «ەكى قولعا ءبىر كۇرەك» تابادى دەگەن ءسوز.