«ايەل سىرى» باعدارلاماسىنا قاتىسقان 20 جاستاعى بويجەتكەن ءوزىنىڭ قيلى تاعدىرى تۋرالى ستۋديادا ايتىپ بەردى. تۋعان-تۋىس، دوس-جاراننان ۇيالعان بولۋى كەرەك ءوزىنىڭ بەت-بەينەسىن جاسىرۋدى كوزدەپتى. ادەتتە ءبىز مۇندايدى باعدارلامانىڭ رەيتينگىسىن كوتەرۋ ءۇشىن قولدان ويلاستىرىلعان دۇنيە دەپ توپشىلايمىز. ءبىراق بۇل اكتريسا ەمەس، ومىردەگى بار ادامنىڭ باسىنان كەشكەن حيكاياسى دەۋگە نەگىز بار. سەبەبى ۇيلەنىپ جاتقان جاستاردىڭ جارتىسى اجىراسىپ كەتەتىن قازىرگى زاماندا ءوز اكەسىنىڭ ەمەس، وگەي اكەسىنىڭ تاربيەسىن كورەتىن بالالار كوبەيىپ بارادى. جالپى، بالاعا قول كوتەرۋ، زورلىق-زومبىلىق جاساۋ فاكتىلەرى ءجيى ورىن الۋدا. جۇيكەسى جۇقارعان، جەكە ومىردە، قىزمەتتە ساتتىلىگى سەرىك بولماعان جاندار جىندارىن السىزدەردەن العىسى كەلىپ تۇراتىنداي.

ءوزىن ايسۇلۋ دەپ تانىستىرعان بويجەتكەن اكەنىڭ تالىم-تاربيەسىن كورمەگەن قىز. ماحابباتتا جولى بولماعان اناسى اجىراسقاننان كەيىن باعىن سىناماقشى بولىپ ەكىنشى رەت تۇرمىسقا شىعادى. الايدا بۇل جولى دا باعى اشىلمايدى. ەكىنشى كۇيەۋى ايەلىن عانا ەمەس، وگەي قىزىن دا تاياقتىڭ استىنا الادى. الايدا باس كوتەرۋگە، قارىم-قاتىناستى ۇزۋگە باتىلى جەتپەيدى. ناتيجەسىندە قىزى ءقازىر ەر-ازاماتتارعا سەنىم ارتپايدى، «كۇيەۋگە شىعامىن، باقىتتى بولامىن» دەپ اق كويلەك كيەتىن تويدى اڭسامايدى. بۇكىل تراگەديا، مىنە، وسىندا جاتىر. ايسۇلۋداي بۇكىل ءومىرىن ستۋديادا اقتارىلىپ ايتىپ بەرۋگە قىسىلاتىن قازاق قىزدارى قانشاما. ايسۇلۋ قايتا وگەي اكەسىنەن وڭاي قۇتىلعان سياقتى... مۇندايدا وتاعاسىنان كوڭىلى قالىپ، اجىراسۋدى ەڭ دۇرىس شەشىم دەپ ويلايتىن قازاق ايەلدەرىنە تەلەجۋرناليست، بۇگىنگى كۇنى ترەنەر-موتيۆاتور بولىپ مىڭداعان ايەلدىڭ ءومىرىن وزگەرتىپ جۇرگەن جانار بايسەمىزوۆانىڭ مىنا سوزدەرىن ۇلگى ەتكىم كەلەدى:

«قىمباتتى كەلىنشەكتەر، ەرىڭىز قىز-قىرقىنعا كوز سالسا، ءبىرىنشى ايقايعا باسپاي، قيىن بولسا دا، ۇستامدىلىق تانىتىڭىز. ويلانىڭىز، بۇل جاعداي نەلىكتەن بولۋدا؟ تاعدىر ءسىزدى نەلىكتەن بۇل سىناقتان وتكىزىپ جاتىر؟ ەرىڭىزدى قالاي سۋىتىپ الدىڭىز؟ ونىڭ الدىندا ءوزىڭىزدى قالاي ۇستايسىز؟ ۇيدە ءوزىڭىزدى قالاي ۇستايسىز؟ نە كيەسىز؟ قالاي جۇرەسىز؟ ەرىڭىزدىڭ الدىندا ادەمى، نازىك  كورىنۋگە تىرىساسىز با؟ ءوزىڭىزدى كۇتەسىز بە؟ سانىڭىزدا سەلليۋليت بار ما؟ ءىشىڭىز بىرنەشە  قاتپارعا ءبولىنىپ، دەنەڭىزدى ماي باسىپ بارا جاتقان جوق پا؟ ەكىنشى «پودبورودوكتىڭ» جاعدايى قالاي؟ شاشىڭىز شە، سۋدىراپ تۇر ما؟ بەتىڭىز شە قۋارىپ تۇر ما؟ ءوزىڭىزدىڭ سۇيىكتى ءىسىڭىز بار ما؟ ءوزىڭىزدى جاقسى كورەسىز بە؟ ۇستىڭىزدەن قانداي ءيىس شىعادى؟ جۇپار ءيىس پە؟ كۇيەۋىڭىزگە  ءدامدى تاعامدار جاساپ، اياعىنا ماسساجىن جاساپ، بەرەسىز بە؟ ەرىڭىزگە «مىرزام» دەپ ءيىلىپ تۇراسىز با؟ سۇراقتار وسىلاي كەتە بەرەدى. ءسىز دانا ايەلگە اينالعاندا،  كۇيەۋ وزگەگە كوز سالمايدى. دامىتىڭىز ءوزىڭىزدى. اجىراسقانمەن، سىزگە جاقسى كۇيەۋدى ەشكىم بەرمەيدى. اجىراسپاڭىز. تيىسىنشە ءسىز وزگەرگەندە كۇيەۋىڭىز دە جالاڭ سەزىمدەرگە بەرىلمەي، ساناسىن ىسكە قوسادى».

قىسقاسى، قۇرمەتتى قازاق ايەلدەرى، اجىراسۋعا اسىقپاڭىزدار! قىزدارىڭىزدىڭ ەرتەڭگى كۇنىن، تاعدىرىن تارازىعا سالىڭىز!