بۇل كۇندەرى قوستاناي وبلىسىنىڭ اكىمى ارحيمەد بەكەجان ۇلى مۇحامبەتوۆ ەلباسىنىڭ تاريحي جانە جاۋاپتى تاپسىرمالارىن ءىس جۇزىنە اسىرىپ جۇرگەن ەل قالاۋلىلارىنىڭ ورتاسىندا جانە پرەزيدەنتىمىزبەن الدە نەشە رەت كەزدەستى. ال وسىنداي ۇل تاربيەلەپ وسىرگەن بەكەجان مۇحامبەتوۆ نۇرسۇلتان ءابىشۇلىن بولاشاق ەلباسىمىزدىڭ رەسپۋبليكامىزدىڭ پرەمەر-مينيستىرى بولىپ تاعايىندالعان سوڭ اقتوبە وڭىرىنە العاشقى ساپارى كەزىندە قارسى العان ەدى. سونىمەن...
تاۋەلسىزدىك ارقىلى قول جەتكەن رۋحاني يگىلىكتەردىڭ ءبىرى پاتشالىق وتارلاۋ ساياساتى، كەڭەستىك داۋىردەگى اتاۋلارى ورىستانىپ كەتكەن جەر-سۋ اتتارىنىڭ قايتا ورالىپ، ولاردىڭ كەيبىرەۋلەرىنە ەلىنە ەڭبەگى سىڭگەن قايراتكەرلەردىڭ ەسىمدەرى بەرىلگەنى.
مىسالى، العا قالاسىنداعى سترويتەلنايا كوشەسى – ا.بايتۇرسىنوۆ، يۋجنايا – ەسەت باتىر، كالينين – ءىزتاي مامبەتوۆ، سپورتيۆنايا – جەلتوقسان، وردجەنيكيدزە – ن.اتانيازوۆ، چاپايەۆ – د.قونايەۆ كوشەلەرى بولىپ وزگەرتىلدى. ال 2003 جىلدىڭ 26 جەلتوقسان كۇنگى العا اۋداندىق ماسليحاتى مەن اكىمياتىنىڭ №7 بىرلەسكەن شەشىمىمەن ورال كوشەسى بەكەجان مۇحامبەتوۆ اتىنداعى كوشە بولىپ قايتا اتالعان.
اۋدان تۇرعىندارى كەزىندە وسى وڭىرگە سىيلى بولعان، اۋدان ەكونوميكاسىن، اسىرەسە اۋىلشارۋاشىلىعىن دامىتۋعا قوماقتى ۇلەس قوسقان بەكەجان داۋلەت ۇلى مۇحامبەتوۆتى ءارقاشان ەرەكشە ىقىلاسپەن ەسكە الادى. ونىڭ ەسىمى بەرىلگەن كوشەنى مارقۇم بەكەجاننىڭ ۇلكەن ۇلى، قازاقستان كەدەن كوميتەتىنىڭ ءتوراعاسى باستىعىنىڭ ورىنباسارى مەرلان باستاعان ارحيمەد جانە ارسلان ەسىمدى ۇلدارى ۇنەمى قامقورلىققا الىپ تۇرادى ەكەن. شىندىعىندا، كوشە اتاۋى مەن ءۇي نومىرلەرىن دايىنداپ ءىلۋ، ءتىپتى كوشەدەگى اسفالت جولدى جوندەۋدەن وتكىزۋ، جاسىل-جەلەك وتىرعىزۋ جۇمىستارىنا دا وزدەرىنىڭ قوماقتى ۇلەستەرىن قوسۋدا.
- وسى كوشەگە بەكەجان داۋلەت ۇلىنىڭ ەسىمىن بەرۋگە ءوزىم مۇرىندىق بولىپ، باستاما كوتەردىم، - دەپ ەسىنە الادى كەزىندە اۋداندىق پارتيا كوميتەتىنىڭ ءبىرىنشى حاتشىسى قىزمەتىن اتقارعان نيكولاي افاناسيەۆيچ سولداتەنكو، - ءتىپتى وسى ۇسىنىستى قولداعان ازاماتتاردىڭ قولدارى قويىلعان قاعازدار جيناپ، ءتيىستى قۇجاتتاردى تولتىرىپ، جوعارى ورىندارعا تاپسىردىق.
ونىن دا ءوز ءمانىسى بار ەدى. وسىندا مەن اۋداندىق پارتيا كوميتەتىنىڭ ءبىرىنشى حاتشىسى بولىپ تۇرعاندا، بەكەجان داۋلەت ۇلى اۋداندىق اتقارۋ كوميتەتىنىڭ ءتوراعاسى قىزمەتىن اتقاردى. ول ەلگە وتە سىيلى بولدى.
بەكەجان داۋلەت ۇلى وسى اۋداندا شيرەك عاسىر بويى XX-پارتسەزد اتىنداعى كولحوزدا ينجەنەر، باس ينجەنەر بولىپ جۇمىس جاساپ، 1976-1983 جىلدارى «قارابۇلاق» سوۆحوزىندا ديرەكتور قىزمەتىن اتقاردى. ەڭبەگى باعالانىپ، «حالىقتار دوستىعى» وردەنىمەن، بىرنەشە مەدالدارمەن ماراپاتتالعان. ونىڭ كەك ساقتامايتىن تىك مىنەزدىلىگى، وجەتتىگى، ايتقان سوزىنە بەرىكتىگى، جەكە باسى قامىنان وزگەنىڭ جاعدايىن جوعارى قوياتىنى، ءار اداممەن ورتاق ءتىل تابىساتىن ەرەكشە قاسيەتتەرى بار ەدى. ول قالادان جولدامامەن وسى قىزمەتكە كەلگەن سوڭ، ماعان باعاسى جەتپەس قولعابىسىن تيگىزە باستادى.
اۋدان باسشىلىعىنا ەكەۋىمىز دە قاتار 1983 جىلى كەلگەن بولاتىنبىز. وسىلايشا ءبىز بىرنەشە جىل قوعام مۇددەسىنە ساي قويان-قولتىق قىزمەت اتقاردىق. بۇل جىلدار گورباچيەۆتىڭ قايتا قۇرۋ كەزەڭىنىڭ باستاۋ العان شاعى بولاتىن. ەل، پارتيا تاريحى قايتا قارالىپ، بەيمالىم دەرەكتەرگە ەرەكشە نازار اۋدارۋ ۋاقىتى، قوعامنىڭ قالىپتى ۇستانىمى وزگەرە باستاعان وسى كەزەڭدە تۇرعىنداردىڭ كۇش-جىگەرىن ءبىر ارناعا باعىتتاپ، ۇيىمداستىرۋ شارالارىن جۇزەگە اسىرۋ ونايعا سوققان جوق. دەگەنمەن، ءبىر جەڭنەن قول، ءبىر جاعادان باس شىعارا وتىرىپ، اۋدان ەكونوميكاسىن دامىتىپ، تۇرعىندار جاعدايىن جاقسارتۋدى ءبىز ۇنەمى كۇن تارتىبىندە ۇستايتىنبىز. جۇمىسىمىز ناتيجەسىز بولعان جوق، العا اۋدانى وبلىستا ۇنەمى الدىڭعى قاتاردان كورىنەتىن.
د.ا.قونايەۆ پەن ن.ءا.نازاربايەۆ ەڭبەك قىزىل تۋ وردەندى «كراسنىي كولوس» كولحوزى ەگىنجايىندا. د.ا.قونايەۆتان سولعا قاراي و.ا.قوزىبايەۆ – وبلىستىق اتقارۋ كوميتەتىنىڭ ءتوراعاسى، ونىڭ سول جاعىندا ب.د.مۇحامبەتوۆ – العا اۋداندىق كوميتەتىنىڭ ءتوراعاسى. د.ا.قونايەۆتىڭ وڭ جاعىندا رەسپۋبليكا پرەمەر-مينيسترى – ن.ءا.نازاربايەۆ، كولحوز باسقارماسى پ.ۆ.شەرستيۋك.
- ءوزىڭىز بىلەسىز، ەگەر اۋداندىق پارتيا كوميتەتى ساياسي باسقارۋ شارالارىن ايقىنداپ، بيۋرودا، پلەنۋمداردا شەشىم قابىلداسا، سول شەشىمدى جۇزەگە اسىرۋ نەگىزىنەن اۋداندىق اتقارۋ كوميتەتىنە جۇكتەلەتىن، - دەپ ەسىنە الادى ۇزاق جىل اۋاتكوم حاتشىسى بولىپ قىزمەت اتقارعان، ەسىمى ەلگە ايان ارداگەر-انا ءمۇناريا ءالىپ قىزى ورمانبەكوۆا. سەسسيا، اتقارۋ كوميتەتى وتىرىستارىنا قاتىسىپ، تالاي رەت وزەكتى ماسەلەلەر كوتەرگەن بەكەجان داۋلەت ۇلى ءىنىمىزدى اۋەلدەن بىلەتىنبىز. توي-تومالاق، قوناقتاردا دا كەزدەسىپ قالاتىنبىز. ال اتقارۋ كوميتەتىنىڭ ءتوراعاسى بولعان كەزدەن باستاپ، ءبىز قويان-قولتىق جۇمىس ىستەي باستادىق. مەن ونىڭ ەكونوميكالىق ماسەلەلەردەن تولىق ماعلۇماتى بار ەكەنىنە كۇماندانعانىم جوق. ءبىراز جىل شارۋاشىلىق باسقاردى-عوي. ال ەندى الەۋمەتتىك ماسەلەلەردى جوعارى دەڭگەيدە بىلەتىنىن بايقاعاندا، تاڭ قالعانىم راس. وقۋ-اعارتۋ ءىسىن دە جەتىك ءبىلدى. ال دەنساۋلىق سالاسى ماسەلەلەرىن ون ساۋساعىنداي تاراتقاندا، وعان وسى سالا قىزمەتكەرلەرى عانا ەمەس، مەن دە تاڭ قالاتىنمىن! مەكتەپتى كۇمىس مەدالمەن، ينستيتۋتتى قىزىل ديپلوممەن ءبىتىرىپ، «قارابۇلاق» سوۆحوزىن ميلليونەر قاتارىنا قوسۋ-كەزدەيسوق ادامنىڭ قولىنان كەلمەيتىن ءىس دەپ ويلايمىن مەن ءالى.
مەن تىك مىنەزدى اداممىن، ونى ءبارى بىلەدى. جولداسىم ءمۇحان-مادي كەتە رۋىنان. بەكەجانمەن ءبىرىنشى رەت كابينەتتە كەزدەسكەنىمدە، ول: «ال، ەندى ءسىز ماعان جەڭگە بولاسىز. كەڭەس جۇمىسىن تەرەڭ بىلەسىز، تاجىريبەڭىز مول، بىرلەسىپ جۇمىس ىستەيىك»، - دەگەنى بار. سوندا مەن: «ءسىز تۋما-تۋىستىعىڭىزدى العا تارتىپ وتىرسىز با؟» - دەپ ورىنسىزداۋ سويلەگەنىم ءالى ەسىمدە. ول: «اعا-جەڭگەسىن سىيلاۋ – اتا سالتىمىز عوي» - دەپ، قازاق ءداستۇرىن جاقسى بىلەتىنىن تانىتقان-دى.
كەڭەس جۇمىسىندا كوپ ۋاقىت ىستەپ، ۇيرەنگەن، تاجىريبە جيناعان بىلىكتى مامان بولدىم. ءتۇرلى ساراپتاما جينايمىز، بايانداما جازامىز. بەكەجان قازاق تىلىنە مىعىم ەدى. سول جىلدارى باياندامانى قازاقشا جاساۋ ءۇردىس الدى. مەن باسىنان: «بەكەجان داۋلەت ۇلى، مەن انىقتامانى ورىسشا دايىنداپ بەرەمىن. جيىنعا شاقىرۋ، قاتىسۋدى قامتاماسىز ەتۋ – مەنىڭ موينىمدا. قازاقشا شورقاقپىن. ال، باياندامانى قازاقشا ءوزىڭىز جازاسىز» - دەپ ءوز مىندەتتەرىمنىڭ باسىن اشىپ الدىم. سولاي جۇمىس اتقاردىق.
ءۋاليحانوۆ كوشەسى، 42 ۇيدە بىرگە تۇردىق. ءۇش ەر بالاسىنىڭ ءبارى تاربيە كورگەن جاندار. بالالىق شاقتارى كوز الدىمدا ءوتتى. توننىڭ ىشكى باۋىنداي ارالاسىپ كەتتىك. بەكەجان اكەلىك بورىشىن تۇگەل ورىندادى دەپ ويلايمىن. ونىڭ ۇلدارى رەسەيدىڭ جوعارى وقۋ ورىندارىن اياقتادى. بىردە تويعا بىرگە باراتىن بولىپ، ءۇش ۇلىن بىزدىكىنە تاستاپ كەتكەن. بىزدە ەكى قىز، ءبىر ۇل، ولاردا – ءۇش ۇل. تويدان كەلسەك، ءۇي-ىشى شاشىلىپ جاتىر. «ولارعا شاي بەردىك» - دەپ جاتىر قىزدارىمىز.
اۋداندىق پوشتانى ۇوس ارداگەرى، سىيلى ازامات باسقاراتىن. كەلە-كەلە سول مەكەمەگە ۆ.كوۆاليەۆ دەگەن ءجاسوسپىرىم جۇمىسقا ورنالاستى. ونى جاقسى بىلەتىنمىن. ءبىر كۇنى ارداگەر – باسشى «مىنا بالانى جۇمىستان شىعارامىن» - دەدى. مەنىڭ ازدى-كوپتى بەدەلىم بار. «جاستاردى جۇمىستان شىعارماۋ كەرەك، تاربيەلەڭىز» - دەپ تاپسىردىم. ول قابىل العان. ەندى سول ۆ.كوۆاليەۆ وسى كۇنى اۋداندىق «قازاقتەلەكومنىڭ» باستىعى. وسى جازدا ماعان ارداگەر رەتىندە قازاقستاننىڭ بۇكىل ارناسىن كورسەتەتىن «وتاۋ» قوندىرعىسىن قويىپ بەردى. ول كەنەتتەن ماعان: «ءسىز كورشى تۇردىڭىز عوي. ارحيمەدتى بىلەمىسىز؟ - دەپ سۇرادى. مەن بىلەتىنىمدى ايتتىم. ەندى ءبىراز ۋاقىت وتكەن سوڭ، ول ماعان قوڭىراۋ شالدى.
- اپا، ارحيمەد وبلىس اكىمى بولىپ تاعايىندالدى، ينتەرنەتتەن وقىدىم – دەيدى.
مەن دە ىلە-شالا بەكەجاننىڭ ۇيىندەگى كەلىنىمىز سالتاناتقا قوڭىراۋ شالىپ، قۇتتىقتاپ جاتىرمىن.
- ءمۇناريا، سەن ءبىرىنشى قۇتتىقتاپ وتىرسىڭ، پەيىلىڭە راحمەت، - دەدى سالتانات.
بەكەجان داۋلەت ۇلى ادامگەرشىلىگى، ازاماتتىعى مول، ەسىمى ۇلكەن ارىپپەن جازىلۋى ءتيىس ازامات ەدى. وسىنداي ازاماتتار ەل بيلىگىنە ەسكىنىڭ قۇلاپ، جاڭا مەملەكەتتىڭ ىرگە تاسىن قالاۋ سەكىلدى تاريحي كەزەڭدە ءومىر ءسۇردى.
مىنە، وسى ءوزىڭ شاي ءىشىپ وتىرعان ۇلكەن شاڭىراق - العاشقىدا اۋاتكوم ءتوراعاسىنا، بەكەجان داۋلەتۇلىنا ارناپ سالىنعان ەدى. ءبىر كۇنى ول مەنى كابينەتىنە شاقىرىپ الىپ، «ءمۇناريا، ءسىز كوپ جىل باسقارۋشى قىزمەتتە بولعان اتامسىز. ال، تۇرعىن ءۇي ماسەلەسىن شەشپەگەنسىز. پاتەر جالداپ تۇراسىز. ونىڭ ءوزى تار. مىنا ماعان سالىنىپ جاتقان تۇرعىن ءۇيدى سىزدەرگە بەرەمىن. ەرتەڭ وردەر جازدىرىپ الاسىڭ» - دەدى. مىنە، جيىرما جىلدان استى، بەكەجان بولگەن قۇتتى شاڭىراقتا ءومىر ءسۇرىپ جاتىرمىز. شىن نيەتپەن ىستەلىنگەن زات قوي. دەنىمىز ساۋ، بالالار مەن نەمەرەلەر امان، كوڭىل-كۇيىمىز شات.
ادامدى تەرەڭ ءبىلۋ ءۇشىن ونى قايعىدا كورۋ دە كەرەك شىعار؟! ءبىر كۇنى تاماق الايىن دەپ دۇكەنگە بارسام، بەكەجاندى كوردىم، جانارىندا جاس، وڭىندە قايعى-مۇڭ.
- اپا، - دەدى ول، - اعامىز بەكبەرلىدەن ايىرىلىپ قالدىق. تاپ ءقازىر ءبىزدىڭ ۇيگە ءجۇرىڭىز!
- ءاۋ، مەن ونى كەشە عانا كورىپ ەدىم-عوي، - دەپ جاتىرمىن. باقساق، جۇرەگى ۇستاپ قالىپتى مارقۇمنىڭ.
ۇيگە سوعىپ، سومكەمدى تاستاپ، كورشى قوشقاربايەۆتىڭ ايەلىن قاسىما ەرىپ الىپ، قايعىنى ورتاقتاسۋعا بەكەجاننىڭ ۇيىنە باردىق.
بەكەجان داۋلەت ۇلى 1993-1995 جىلدارى قاندىاعاشتان ەلگە ورالىپ، «قارا قوبدا» اتىنداعى كولحوزدىڭ ءتوراعاسى بولدى.
بۇل ۋاقىت تاپشىلىق كەزەڭى بولاتىن. وتاعاسى ءمۇحان-مادي قايتىس بولعان. ۇيدە ءوزىم، مال ۇستايمىن. قىستىڭ اياعى، كوكتەمگە شىعا ءتىس شۇقىر ءشوپ قالمادى. سونان بەكەجاننان مال ازىعىن سۇرادىم.
- ەرتەن جىبەرەمىن، - دەدى ول. ەكى كۇن كۇتتىم، ءشوپ جوق. قايتا تەلەفون شالىپ سۇراسام، «جىبەردىم» دەيدى. بايقاساق، تاپشىلىق كەز عوي. تراكتورشى ءشوپتى ساتىپ جىبەرىپتى. ەرتەڭىنە بەكەجان داۋلەت ۇلى تراكتور جۇرگىزۋشىنىڭ قاسىنا بريگاديرىن قوسا جىبەرىپتى. ءشوپ ءبىرىنشى شابىلعان، كوكپەڭبەك. قايران ازامات، سول ءشوپتىڭ اقىسىن دا العان جوق. «ءمۇناريا، وسىنداي كوك ءشوپتى قايدان الدىڭ؟» - دەپ بارلىق كورشىلەرىم سۇرايدى. ازاماتقا كىر كەلمەسىن دەپ، شىنىمدى ايتپادىم، - دەيدى ءمۇناريا اپامىز.
- بەكەجان داۋلەت ۇلى باسشىلىق جاساعان كەزدە العا اۋدانىنىڭ الدىڭعى قاتاردا بولعانىنىڭ دالەلى – كەڭەس كەزىندەگى رەسپۋبليكا باسشىلارى اۋدانعا جىل سايىن دەرلىك ات باسىن تىرەيتىن ەدى، - دەيدى قازىرگى قاراقۇدىقتاعى «ساديك» شارۋا قوجالىعىنىڭ باسشىسى ۆيكتور دميترييەۆيچ كاراۋلوۆ.
سول كەزدەرى رەسپۋبليكا باسشىلارى دىنمۇحامەد احمەت ۇلى قونايەۆ پەن مينيسترلەر كەڭەسىنىڭ ءتوراعاسى نۇرسۇلتان ءابىش ۇلى نازاربايەۆ جانە وبلىس باسشىلارى ۆ.ا.ليۆەنسوۆ پەن و.ءا.قوزىبايەۆ باستاعان دەلەگاسيا 1984 جىلى «كراسنىي كولوس» كولحوز ەگىنجايىنا كەلگەندە تۇسىرىلگەن سۋرەتتى ماعان كەزىندە مارقۇم توقمىرزا كۇنبايەۆ اعامىز بەرىپ ەدى.
- مىنا ورازالى ءابىش ۇلىنىڭ سول جاعىندا تۇرعان العا اۋاتكومىنىڭ ءتوراعاسى بەكەجان مۇحامبەتوۆ قوي، - دەدى ونى ايتپاي تانىعان زامانداسى ۆيكتور كاراۋلوۆ، وسى سۋرەتتى العاش كورگەندە.
وسى تاريحي سۋرەتتە ارتقى قاتارداعى سولدان ساناعاندا ءۇشىنشى بولىپ تۇرعان باس اگرونوم ۆيكتور دميترييەۆيچ كاراۋلوۆ ءوزىن بىردەن تانىپ، جاستىق شاعىن ەسكە الا وتىرىپ، جۇرەك تولعانىسىمەن كەزدەسۋ سىرىن ايتىپ بەردى:
- جاڭىلىسپاسام، بۇل 1984 جىلدىڭ تامىز ايىنىڭ ورتا شەنى. اسا جوعارى مارتەبەلى قوناقتار ءبىزدىڭ ەگىنجايعا قوبدا اۋدانى ءاليا مولداعۇلوۆا اتىنداعى ارناۋلى شارۋاشىلىعىنان قايتىپ كەلە جاتىپ سوققان بولۋ كەرەك. سۋرەتتە ديماش احمەت ۇلى، نۇرسۇلتان ءابىش ۇلى جانە اق كەپكاداعى بىزگە سىرتىمەن تۇرعان ۆاسيليي اندرەيەۆيچ ليۆەنسوۆ، وڭ جاقتان شەتتە تۇرعان كوزىلدىرىكتى كولحوز باسقارماسى پ.ۆ.شەرستيۋكپەن اڭگىمەلەسىپ تۇر.
ءبىزدىڭ «كراسنىي كولوس» كولحوزى وزات شارۋاشىلىق بولاتىن، 18-20 مىڭ گەكتار كولەمىندەي جەرگە ەگىن ەگەتىنبىز. 60-70 كومباينىمىز بار. ويلى-قىرلى ەگىس القابىنا ولاردى بىرىنەن كەيىن ءبىرىن جىبەرگەندە – شابۋىلعا شىققان تانكتەرگە ۇقسايتىن.
ديماش احمەت ۇلى ءبىزدىڭ كولحوزعا بىرنەشە رەت كەلدى، ال كەڭەس ۇكىمەتىندەگى ەڭ جاس پرەمەر-مينيسترى نۇرسۇلتان ءابىش ۇلى نازاربايەۆتىڭ تۇڭعىش كەلۋى. بۇل باسشىلار قانداي دا بولسىن ماسەلەلەردى ەل پايداسىنا شەشىپ بەرەتىن.
كەلەسى 1985 جىلى پ.ۆ.شەرستيۋك دۇنيەدەن وزىپ، ورنىنا كولحوزعا باسقارما بولىپ مەن سايلاندىم.
بىردە بىزگە د.ا.قونايەۆتىڭ ورنىنا ورتالىق كومەتەتتىڭ ءبىرىنشى حاتشىسى بولىپ سايلانعان گ.ۆ.كولبين كەلدى. بۇل جولى كۇتپەگەن وقيعالارعا تاپ بولدىق. ول ءوزىن تانىماسىن دەپ «ۋاز» اۆتوكولىگىمەن قاسىمىزدان وتە شىققان ەدى. ال ونىڭ قاسىنا ەرۋشىلەرى ارتىنان كەلەدى ەكەن. بىزدەر كوشتىڭ ورتاسىنا باعىت الساق، ءوتىپ كەتكەن گ.ۆ.كولبين شاقىرىپ الدى. بىزدەر وعان بۇرىنعى ادەتىمىزشە مۇڭىمىزدى شاعا باستادىق.
- مەنەن قانداي شەشىلمەگەن سۇراعىڭىز بار؟ – دەپ سۇراعاندا، كولحوزدا 30-دان استام ەڭبەك وزاتتارى اۆتوكولىك ساتىپ الۋ كەزەگىندە تۇرعان، كەيبىرەۋلەرى ونداعان جىل وسى تىزىمدە تۇرعانىن ماسەلە ەتىپ كوتەردىم.
- ءبارىمىز اۆتوكولىكتەرگە يە بولۋ ءۇشىن ايانباي ەڭبەك ەتۋىمىز كەرەك – دەپ ەكى ۇشتى جاۋاپ بەردى ول. ەندى ەكىنشى سۇراعىمدا كۇن سۋىتىپ كەلە جاتقانىن، ال جاعاتىن كومىر جوق ەكەنىن العا تارتتىم.
- ءبارىمىز كومىردى دەر كەزىندە ساتىپ الۋىمىز ءۇشىن ايانباي ەڭبەك ەتۋىمىز كەرەك، - دەدى ول قايتادان. ءسويتىپ ەشبىر ماسەلەنى شەشپەي، قوناقتار قالاي كەلسە، سولاي كەتىپ قالدى. ال مەنىڭ ەسىمدە قالعان وسى اڭگىمە گ.ۆ.كولبيننىڭ ۋاقىتشا ادام بولعانىن كورسەتىپ تۇرعانداي.
ال، بەكەجان داۋلەتۇلىمەن ءبىز قۇرداس بولاتىنبىز. ول اعا مامان، شارۋاشىلىق باسشىسى، اۋاتكوم ءتوراعاسى بولىپ تۇرعاندا دا دوستىق قاتىناستا بولدىق. ول ومىرگە ءوز كوزقاراسى بار، تىك مىنەزدى ادام ەدى. كەيبىرەۋگە بۇل ۇناعان دا جوق. ۇنەمى ەستىگەندەرىن قويىن كىتاپشاسىنا جازىپ الاتىن ادەتى بار ەدى. ءومىرىنىڭ سوڭعى جىلدارى قاندىاعاشتان ەلگە قايتىپ كەلىپ، يليچ اتىنداعى كولحوزدا باسقارما بولعاندا دا، ءوزىنىڭ شارۋا قوجالىعىن اشقاندا دا قاتىناسىپ تۇردىق. ول اركەز ماعان سوعىپ تۇراتىن.
سۋرەتتە: ارتقى قاتارداعى وڭ جاقتان شەتتە تۇرعان اۋداندىق قاۋىپسىزدىك كوميتەتى ءبولىمىنىڭ باستىعى نازىر ۆالي ۇلى ۆالييەۆ بۇگىنگى تاڭدا 88 جاستا، پودپولكوۆنيك شەنىندە دەمالىسقا شىققان، قارابۇتاقتىڭ تاتارى، ءومىرىن وسى قىزمەتكە ارناعان. «اندروپوۆتىق» دەپ اتالاتىن «كگب-50»، «كگب-60» ەكى ءتوس بەلگىلەرىنىڭ يەگەرى.
- ماعان سول جولى نۇرسۇلتان ءابىش ۇلىنىڭ قاۋىپسىزدىگىن باقىلاۋ تاپسىرىلعان ەدى، - دەپ، «قۇپياسىن» اشتى اقساقال.
نازىردىڭ قاسىنداعى سۋرەتكە جارتىلاي تۇسكەن اۆتوبازا ديرەكتورى ۆاسيليي پاۆلوۆيچ دولبنيا. ول ومىردەن وزعان.
العاداعى بەكەجان مۇحامبەتوۆ اتىنداعى كوشە، ونىڭ زامانداستارى وسىنداي سىر ساقتاۋدا.
بالنياز اجنيازوۆ
قازاقستان جۋرناليستەر وداعىنىڭ مۇشەسى
