قازاقستان مۇسىلماندارى ءدىني باسقارماسىنىڭ ءتوراعاسى سەرىكباي قاجى وراز استانادا ق ر جوعارعى سوت ءتوراعاسىنىڭ كەڭەسشىسى ساعاتبەك سۇلەيمەن مىرزامەن كەزدەستى.
كەزدەسۋدە ساعاتبەك بولاتبەك ۇلى باس مۇفتيگە ەلىمىزدە بيلەر ينستيتۋتىن جاڭعىرتۋ بويىنشا بىرلەسكەن جوبالاردى جۇزەگە اسىرۋدى ۇسىندى. اتاپ ايتقاندا، ازاماتتاردى سوتقا دەيىن تاتۋلاستىرۋ، بىتىمگە شاقىرۋ، ارااعايىندىق ءداستۇردى قايتا جاڭعىرتۋ بويىنشا بىرلەسە قىزمەت ەتۋ ماسەلەسى ءسوز بولدى. جوعارعى سوت ءتوراعاسىنىڭ كەڭەسشىسى بۇل باعىتتاعى جوبالاردى جۇزەگە اسىرۋدا ءمۇفتيات قىزمەتكەرلەرى مەن يمام-مولدالاردىڭ ىقپالىن ايرىقشا اتاپ ءوتتى.
ءوز كەزەگىندە سەرىكباي ساتىبالدى ۇلى: «حالىقتى بىرلىك پەن ىزگىلىككە، تاتۋلىق پەن مەيىرباندىققا ۇندەۋ – ءمۇفتياتتىڭ نەگىزگى قىزمەتتەرىنىڭ ءبىرى. ءبىز بۇل باعىتتا بىرلەسە جۇمىس جاساۋعا ءازىرمىز. حالىقتى ىمىرا مەن بىتىمگە، ءوزارا كەلىسىمگە شاقىرۋ – ءتۇرلى مەكەمەدە ءتۇرلى ميسسيانى اتقارىپ وتىرعان جەتەكشى تۇلعالاردىڭ اسىل مىندەتى. «ساۋساق بىرىكپەي، ينە ىلىكپەيدى»، – دەگەن ناقىل بار. ءبىز بىرىكسەك، ىزگى ءىس-شارالار مەن يگى جوبالاردى جۇيەلى تۇردە جۇزەگە اسىراتىن بولامىز»، – دەپ اتاپ ءوتتى.
باسقوسۋدا تاراپتار ق ر جوعارعى سوتى مەن قمدب اراسىندا ارنايى مەموراندۋم قابىلداۋعا ۋاعدالاستى. سونىمەن قاتار، جۇرتشىلىق اراسىندا ءتۇسىندىرۋ جۇمىستارىن جۇرگىزۋگە، كونفەرەنسيالار مەن دوڭگەلەك ۇستەل، ارنايى باسقوسۋلار وتكىزۋگە كەلىستى.

اعابەك قونارباي ۇلى

قازاقستان مۇسىلماندارى ءدىني باسقارماسىنىڭ باسپا ءسوز قىزمەتىنىڭ جەتەكشىسى