ءابدىراحمان اسىلبەكوۆتەن ايىرىلعانىمىزعا كوپ بولعان جوق، بۇگىن تاعى قايعىلى حابار ەستىپ وتىرمىز. قازاق حالقى تاعى ءبىر اياۋلى ازاماتىنان ايىرىلدى. 1961 جىلى شقو، اباي اۋدانىنداعى سارىجال اۋىلىندا دۇنيەگە كەلگەن تالانتتى جازۋشى كەلمەستىڭ كەمەسىنە ءمىنىپ كەتە باردى. 1992 جىلى سەمەيدى پەداگوگيكالىق ينستيتۋتىن ءتامامداعان جازۋشىنىڭ العاشقى شىعارمالارى 1980 جىلداردان باستاپ رەسپۋبليكالىق باسپا ءسوز بەتتەرىنە كورىنە باستاعان. تالعات كەڭەسبايەۆ 1988 جىلعى رەسپۋبليكالىق «جىگەر» فەستيۆالىنىڭ لاۋرەاتى. 1990 جىلى مارقۇمنىڭ العاشقى كىتابى «فرانسۋز ءاتىرىنىڭ ءيىسى» جارىق كورگەن بولاتىن.  Qamshy.kz اقپارات اگەنتتىگى مارقۇمنىڭ وتباسىنا، جاقىندارىنا، تالانتتىسىن ارداقتاعان بارشا قازاق جۇرتىنا قايعىرا كوڭىل ايتادى. تالعات كەڭەسبايەۆ تۋرالى الەۋمەتتىك جەلىدە جاريالانىپ جاتقان ەستەلىك اڭگىمەلەردى وقىرمان نازارىنا ۇسىنۋدى ءجون دەپ سانادى.

داۋرەن قۋات:

 "سەنىڭ اڭگىمەلەرىڭدى بەكەر وقىدىم، ەندى ءوزىم جازا الماي ءجۇرمىن"، - دەپ بوستىرە ماقتاپ قوياتىنى بار ەدى. كەيىنگى ءبىر كىتابىنىڭ جارىق كورۋىنە سەپتىگىم تيسە كەرەك، سونى ايتىپ جانە قويمايتىن. قىرعىز قالامگەرى ايداربەك اعامەن شىعارماشىلىق بايلانىستارىنا دا دانەكەر بولعانىم بار. الگى ءبىر تۇككە تۇرمايتىن قىزمەتىمدى ءوسىرىپ: "كنياز مەنى الاتوونىڭ بيىگىنە الىپ شىقتى"، - دەپ وتىراتىن. اڭگىمەمىز دە جاراسىپ، ءازىلىمىز دە جاراسىپ ءجۇرۋشى ەدىك. كۇنىنە ءبىر رەت، كەيدە ەكى ءۇش رەت زۆونداپ قوياتىن. سول زۆونوكتارىن ارەدىك ارتىق كورىپ، كەيي جاۋاپ بەرگەن كەزدەرىم دە بولىپتى-اۋ... ەندى، مىنە، ۋداي وكىنىشتىڭ ۋىتى تاماعىما تىعىلىپ تۇر. قايران تاكەڭ!.. ول - وزىنە دە رياسىز كوڭىلمەن تالاي ايتتىم، تالانتتى جازۋشى ەدى. قالامىنان شىققان ءار تۋىندىسىنىڭ ماگياسى بولاتىن. سەنبەسىڭە سەندىرەتىن جازۋشى ەدى. جازۋعا سونشالىقتى ادال بولدى، جازىپ ءوتتى. تالعات كەڭەسبايەۆ! وسى ەسىم سويدىڭ ءوزى باسقاعا ەمەس، قاس تالانتقا، قالامگەرگە عانا بىتكەن ەسىم سوي ەكەنىن بىلەتىنبىز. باقۇل بول، باعالىم، باعىلانىم!".