قايرات نۇرتاستى حالىققا تانىمال ەتكەن "ارمان" ءانىن نوعاي ءانشىسى ءوز تىلىندە بەينەبايان ءتۇسىرىپ ورىنداپ شىقتى.

قايرات نۇرتاستىڭ اندەرىنىڭ ىشىندە الار ورنى ەرەكشە "ارمان" ءانى جارىققا 2006 جىلى شىققان بولاتىن. بۇل ءان قايراتتىڭ ءتولقۇجاتى دەپ اتاساق تا بولادى. سەبەبى ءدال وسى انمەن ءانشى ەلگە تانىلىپ، بۇگىندە حالىقتىڭ سۇيىكتى ورىنداۋشىلارىنىڭ بىرىنە اينالعان. ءاننىڭ ءسوزى مەن اۋەنىن جازعان باۋىرجان ەسەبايەۆ.

الايدا اراعا 9 جىل سالىپ نوعايدىڭ ءانشىسى جامبۋلات كارايەۆ بۇل ءاندى اينىتپاي نوعاي تىلىندە شىرقاپ، انگە بەينەبايان تۇسىرگەن. بۇگىندە ءان نوعاي جەرىندە ءدال قازاقستانداعىداي حيت اندەردىڭ بىرىنە اينالعان. تەك ءان اتاۋىندا عانا وزگەرىس بار. ياعني ءان "ارمان" ەمەس  "يانىم" دەپ اتالادى.

بۇل ورايدا كارايەۆ "ارمان" ءانىن ءوز تۋىندىسى رەتىندە ورىنداپ جۇرگەنىنەن قايراتتىڭ حابارى بار ما، ول جاعى بەلگىسىز.

بۇگىنگى تاڭدا انشىلەر كورشىلەس ەلدەردىڭ ءانىن وزىنىكى ەتىپ ورىنداۋى ءجيى كورىنىس بولىپ كەتتى.

ەستەرىڭىزگە سالا كەتسەك، ءبىز وسىعان دەيىن دە حالىققا وزگەلەردىڭ انىمەنتانىمال بولعان وتاندىق جۇلدىزدار جايلى ايتقان بولاتىنبىز.