ءسۇت ءۇشىن ميلليون تەڭگە قارىز! اقتوبە ماڭىنداعى اۋىل تۇرعىندارى كاسىپكەردەن اقشالارىن الا الماي جۇرگەنىن ايتىپ، ارنامىزعا شاعىمداندى دەيدى ەۋرازيا ءبىرىنشى ارناسى. ولار جاز بويى اۋىل شارۋاشىلىعى كووپەراتيۆىنە ءسۇت تاپسىرعان ەكەن.  ال سەرىكتەستىك باسشىلارى تامىزدان بەرى قارىزدى تولەمەي، تەك قۇرعاق ۋادەگە تويدىرىپ كەلە جاتىر دەيدى. تۇرعىندار بىلاي تۇرسىن، اكىم-قارالاردىڭ سوزىنە قۇلاق تۇرمەيتىن كاسىپكەر كىم؟ بۇل تۋرالى ەۋرازيا ءبىرىنشى ارناسى سيۋجەت جاساپتى.

«قاراتاۋسايدىڭ تۇرعىندارى قوراسىنداعى ءتورت تۇلىكتىڭ ەتىمەن، سۇتىمەن كۇن كورىپ وتىر. ءسۇتتى قابىلدايتىن جەكە كاسىپورىنمەن اۋىلدىقتار وتكەن جىلى بايلانىسىپتى. ءسۇتتىڭ ءليترىن 85 تەڭگەگە تاپسىرۋعا كەلىسكەن. كۇنىنە ءار ادام ورتا ەسەپپەن 40 ليتر اعارعان بەرىپ وتىردىق دەيدى. باستاپقىدا ءبارى كەلىسىمشارتتاعىداي كەرەمەت بولعان. تەك تامىز ايىنان باستاپ مەكەمەنىڭ جۇمىسى سۇيىلا باستاعانىن ايتادى. سودان بەرى اۋىلدىقتار وزىنە تيەسىلى اقشانى الۋدان قالىپتى. 

كوپپەراتيۆ ءار وتباسىعا ورتاشا ەسەپپەن قىرىق مىڭنان، جەتپىس مىڭ، ءتىپتى كەيبىرىنە ءجۇز مىڭ تەڭگەدەن قارىزعا باتقان. ءبىراق، ءمان-جايدى تۇسىندىرەتىن ەشكىم جوق. 

“ماعان 100 مىڭ تەڭگەدەن اسا بەرەشەك. وزىمىزگە تيەسىلى اقشانى بەرمەي ءجۇر. كەڭسەسىنە تەلەفون شالساق، وسىندا ءجۇر دەيدى، شاقىر تەلەفونعا دەسەك، شىعىپ كەتتى دەيدى. بىزدە باسقا جۇمىس جوق! سول ءسۇتتىڭ اقشاسىمەن كۇن كورىپ وتىرمىز عوي! ەندى قايتەمىز؟!”،-دەيدى قاراتاۋساي اۋىلىنىڭ تۇرعىنى ساپۋرا ورازوۆا.

«524 ليتر ءسۇتتى 85 تەڭگەدەن تاپسىردىم. ەندى ءوزىڭىز ساناي بەرىڭىز، مەنىڭ وزىمە 44 مىڭنان اسىپ كەتتى قارىزدارى. بىزگە عانا بەرەشەك ەمەس، سۇراستىرىپ ءبىلىپ ەدىك، كورشى كومينتەرىن، كازانكاداعىلار دا ءسۇتتى قابىلداپ الىپ، اقشاسىن بەرمەدى دەپ شۋلاپ وتىر” – دەيدى قاراتاۋساي اۋىلىنىڭ تۇرعىنى ليديا پروحوروۆا.

اۋىلدىقتاردىڭ جانايقايىنان جەرگىلىكتى بيلىك تە حاباردار. ال، اۋدان اكىمدىگى كاسىپكەردەن قارىزدى 6-قاراشادا تولىق وتەيمىن دەگەن قولحات الىپتى.

«اۋدان اكىمدىگىمەن بىرلەسىپ جۇمىس جاساپ جاتىرمىز. وسى ماسەلەنى شەشۋگە تىرىسامىز. كەلەسى اپتادا وسى فيرمانىڭ ادامدارى بارلىق قارىزداردى تولەپ تاستايمىز دەگەن ۋادە بەردى»، - دەيدى مارتوك اۋدانى قاراشاي اۋىلدىق وكرۋگىنىڭ اكىمى نۇرگۇل وسپانوۆا.

كاسىپكەر ءقازىر اۋىل  تۇرعىندارىنا 1 ملن 300 مىڭ تەڭگە بەرەشەك. قارىزىنان قاشان قۇتىلاتىنىن ءوزى ءدوپ باسىپ ايتا المادى. 

«6 قاراشادا تولەيمىز دەپ ۋادە ەتىپ ەدىك، وعان ۇلگەرمەدىك. 21-قاراشاعا دەيىن ۋاقىتتى سوزدىرىپ الدىق. اقشا بولماي تۇر شوتتا. قاشان قاراجات تۇسەدى، سول كەزدە قارىزدان قۇتىلامىز” – دەيدى كاسىپكەر ءاليما قوجييەۆا.

ال، ۋادەگە تويعان جۇرت ەگەر ءبىر اپتانىڭ ىشىندە ناتيجە بولماسا، قۇقىق قورعاۋ ورىندارىنا شاعىمدانامىز دەپ وتىر.