پورتۋگاليانىڭ ليسسابون جانە سينترا قالالارىندا قاراشانىڭ 16-ى مەن 25ء-ى ارالىعىندا وتكەن 12ء-شى حالىقارالىق LEFFEST كينوفەستيۆالىنىڭ جەڭىمپازدارى انىقتالدى. فەستيۆالدىڭ «ۇزدىك فيلم» جۇلدەسى قازاقستاندىق رەجيسسەر ەمير ءبايعازيننىڭ «وزەن» فيلمىنە  بۇيىردى. اتالعان كينوتۋىندى فەستيۆالدىڭ نەگىزگى كونكۋرسىنا قاتىسىپ، ەۋروپا، ازيا، سولتۇستىك جانە وڭتۇستىك امەريكا ەلدەرىنىڭ فيلمدەرىمەن ۇزدىك اتانۋعا تالاستى.

«ۇزدىك فيلم ءۇشىن باس جۇلدەمەن ەمير ءبايعازيننىڭ «وزەن» ءفيلمى ماراپاتتالادى. ەرەكشە مانەردە تۇسىرىلگەن تاماشا فيلم. بۇل تۋىندى ءبىزدى وزەكتىلىگىمەن، جوعارى دەڭگەيىمەن ءبىرىنشى كادردان-اق تاڭ قالدىردى»، - دەدى ساحنا تورىنەن قازىلار القاسىنىڭ مۇشەسى مارتا ارگەريح.

ايتا كەتسەك، قازىلار القاسىنىڭ قۇرامىنا ونەردىڭ ءتۇرلى سالالارىندا جۇمىس ىستەيتىن قايراتكەرلەر كىردى، ولار: ۋولتەر ساليس جانە دجوناتان ليتتەل ەسىمدى رەجيسسەرلەر، امەريكاندىق اكتريسا جانە ءانشى كريستا بەلل، ارگەنتينالىق پيانيست مارتا ارگەريح، ديريجەر سيتۆەن كوۆاچيەۆيچ جانە سۋرەتشى دجوردج كۋەروس.

جالپى LEFFEST كينوفەستيۆالىندە بار جوعى ءۇش جۇلدە – «ۇزدىك فيلم» (كينو تىلىندەگى ەڭ يننوۆاسيالىق جانە كوركەم تۇسىرىلگەنى ءۇشىن)، «قازىلار القاسىنىڭ ۇلكەن جۇلدەسى» (كوركەمدىك جاعىنان ەرەكشەلەنگەنى ءۇشىن) جانە «ارنايى جۇلدە» تابىستالادى. ايتا كەتسەك، ەمير ءبايعازيننىڭ «اسلاننىڭ ساباقتارى» ءفيلمى 2013 جىلى فەستيۆالدىڭ «قازىلار القاسىنىڭ ۇلكەن سىيلىعى» جۇلدەسىمەن ماراپاتتالعان بولاتىن.

سونىمەن قاتار، فەستيۆالدىڭ ماراپاتتاۋ راسىمىندە «الەمدىك كينەماتوگرافقا قوسقان ۇلەسى» جۇلدەسى وتاندىق رەجيسسەر دارەجان ومىربايەۆقا تابىستالدى. ايتا كەتسەك، بۇل فەستيۆالدە رەجيسسەردىڭ رەتروسپەكتيۆاسى ۇيىمداستىرىلعان بولاتىن.

ەستەرىڭىزگە سالا كەتسەك، «وزەن» ءفيلمىنىڭ الەمدىك تۇساۋكەسەرى ۆەنەسيا كينوفەستيۆالى شەڭبەرىندە وتكەن بولاتىن. بۇل فەستيۆالدىڭ «كوكجيەكتەر»  باعدارلاماسىندا ەمير بايعازين ۇزدىك رەجيسسەر اتاندى. ال ءفيلمنىڭ سولتۇستىك امەريكاداعى تۇساۋكەسەرى ۇستىمىزدەگى جىلى قىركۇيەك ايىندا حالىقارالىق تورونتو كينوفەستيۆالى اياسىندا ءوتتى. كينوتۋىندى فەستيۆالدىڭ «تۇعىرناما» («پلاتفورما») كونكۋرستىق باعدارلاماسىندا  كورسەتىلىپ، قازىلار القاسىنىڭ قۇرمەتتى اتالىمىنا جانە Screen Daily تاۋەلسىز كينوسىنشىلاردىڭ رەيتينگىسى تىزىمىندە الدىڭعى قاتاردان كورىندى. جىل سايىن وتەتىن 12ء-شى Asia Pacific Screen Awards سالتاناتىندا «وزەن» ءفيلمى «رەجيسسۋراداعى تابىسى ءۇشىن» سىيلىعىمەن ماراپاتتالدى. ءفيلمنىڭ ازيالىق تۇساۋكەسەرى توكيو كينوفەستيۆالىنىڭ كونكۋرستىق باعدارلاماسى اياسىندا ءوتتى. ال لوس-اندجەلەستەگى Asian World Film Festival كينوفەستيۆالىندە «وزەن» ءفيلمى قازىلار القاسىنىڭ جۇلدەسىنە – «ناعىز كينو تىلىمەن بەينەلەنگەن كوڭىلىڭدى بىردەن باۋراپ الاتىن فيلم» جۇلدەسىنە يە بولدى.

ءفيلمنىڭ جارىققا شىعۋىنا بىرنەشە مەملەكەتتەر اتسالىستى، ولار: قازاقستان (ق ر مادەنيەت جانە سپورت مينيسترلىگى، ش.ايمانوۆ اتىنداعى «قازاقفيلم» اق، Emir Baigazin Production)، نورۆەگيا (Norsk Filmproduksjon) جانە پولشا (Madants). بۇل تۋىندى سەناريي كەزىندە  MPA APSA ازيا-تىنىقمۇحيتتىق كينواسسوسياسياسى گرانتىنىڭ  قولداۋىنا يە بولدى. 2017 جىلى ماۋسىم ايىندا بۇل جوبا العاش رەت كارلوۆى ۆارى حالىقارالىق كينوفەستيۆالىنىڭ كينونارىعىندا تانىستىرىلىپ، ول جىلى قىركۇيەكتە كينوجوبا ۆارشاۆا حالىقارالىق كينوفەستيۆالى كينونارىعىندا Pitch and Meet جوبالار بايقاۋىندا ءبىرىنشى ورىندى يەلەنگەن بولاتىن. كارتينانىڭ پوست جۇمىستارى 2018 جىلى جاز ايىندا پولشا كينەماتوگرافيا ينستيتۋتىنىڭ قارجىلاي كومەگىمەن ۆارشاۆاداعى Orka جانە Dreamsound ستۋديالارىندا جۇرگىزىلدى.