2 جەلتوقسان ەلىمىز ءۇشىن ايتۋلى كۇندەردىڭ ءبىرى. UFC-دە رەسەيدىڭ نامىسىن قورعاعان ەتنيكالىق قازاق دامير يسماعۇلوۆ MMA بويىنشا ەڭ مىقتى قارسىلاستاردىڭ ءبىرى الەكس گوردجەستى جەڭدى.

جەكپە-جەك كەزىندە رەسەيدىڭ تۋىمەن قاتار قازاقستاننىڭ تۋىن الىپ شىققان دامير يسماعۇلوۆ Sports.kz سايتىنا سۇحبات بەردى. اتالمىش سۇحباتتى Qamshy.kz اقپارات اگەنتتىگى قازاق تىلىنە اۋدىرىپ وقىرمان نازارىنا ۇسىنادى.

— دامير، سىزگە جەكپە-جەك ۇنادى ما؟ قالاي ءوتتى؟

— بارلىعى جاقسى. مەن كوپتەن كۇتكەن كەزدەسۋدى ءساتتى اياقتادىم. جەڭىس بۇيىردى. بۇل جەڭىسكە جەتۋ ءۇشىن تالاي جىل تەر توكتىم. قۋانىشتىمىن!

— ءسىز جەكپە-جەك الدىندا ويعا العان جوسپارىڭىزدى تولىق ورىنداي الدىڭىز با؟

— جەكپە-جەكتەگى  ىس-ارەكەتىمنىڭ بارلىعى مەنىڭ جوسپارىمدا بولدى. مەن ازداعان سوققىنى قابىلدادىم، ءبىراق قارسىلاسىما قارىمتا سوققى قايتارا الدىم.

— بۇل UFC-دەگى العاشقى جەكپە-جەگىڭىز ەكەنى بەلگىلى. قوبالجىدىڭىز با؟

— مەن ءبىر اپتا بويى قوبالجىپ، مازاسىزداندىم. ءتىپتى ۇيىقتاي المادىم. بىرىنشىدەن مەن جاڭا ورتاعا تەز بەيىمدەلە المادىم. مەن ءۇشىن بۇل قيىنعا سوقتى. ەكىنشىدەن، جانكۇيەرلەردىڭ سەنىمى ماعان قاتتى اسەر ەتتى. جان-جاقتان قىسىم بولدى. سەبەبى قازاقستان مەن رەسەيدەن باسقا بىرنەشە ەلدەردە مەنىڭ جانكۇيەرلەرىم بار. بۇكىل الەمنىڭ نازارى وزىمدە ەكەنىن بىلگەندە قاتتى قوبالجىدىم. ماعان الەمدەگى  قازاقتار جىلى لەبىزدەرىن ءبىلدىرىپ، قولداۋ كورسەتىپ جاتىر. وسىنداي دۇنيەلەر ويىمدى ءبولىپ ءجۇردى، جەكپە-جەككە بار نازارىمدى اۋدارا المادىم. قيىنعا سوقتى. الايدا كومانداممەن بىرگە ويلاستىرعان جوسپارىمىز ىسكە استى.

—  ءسىزدىڭ جاتتىعۋلارىڭىزدىڭ كوبىسى استانا قالاسىندا ءوتىپتى؟!

—  ءيا مەن استاناعا بارىپ جاتتىقتىم. الايدا بۇل نەگىزگى جاتتىعۋلار ەمەس ەدى. مەن كوبىنەسە ورىنبور قالاسىنداعى «بوەس» كلۋبىندا جاتتىققان بولاتىنمىن.

—  العاشىندا ءسىزدىڭ قارسىلاسىڭىز كونور ماكگرەگوردى جەڭگەن يرلانديالىق دجوزەف داففي بولعان ەدى. الايدا بۇل جەكپە-جەك ۇيىمداستىرىلمادى. بۇل سىزگە كەرى اسەرىن تيگىزبەدى مە؟

—  جوق. مەنىڭ ءۇش رەت قارسىلاسىم اۋىستى. مەن ارقايسىسىمەن جەكپە-جەك وتكىزۋگە دايىن ەدىم. الايدا ولار باس تارتتى.

—  ءسىز ءبىر سوزىڭىزدە قازاقتاردىڭ قانداي ەكەنىن الەمگە تانىتقىم كەلەدى دەگەنسىز. ءسىزدىڭ جەكپە-جەكتەرىڭىز ارقىلى الەم قازاقتار تۋرالى نە بىلە الادى؟

— نەگىزى، بۇگىنگى جەكپە-جەكتەن كەيىن مەنىڭ قاسىما كەلىپ «بۇل قاي ەلدىڭ تۋى؟»، - دەپ سۇراعاندار كوپ بولدى. بۇگىن كوپتەگەن شەتەلدىك وسى سۇراقتىڭ جاۋابىن ءبىلدى.

—  ءسىز ءۇشىن ۋايىمداپ، قولداۋ بىلدىرگەن قازاقستاندىقتارعا ايتارىڭىز بار ما؟

—  مەن وسىعان دەيىن بىرنەشە رەت ايتقانمىن. قازاقستاندىقتارعا قولداۋ بىلدىرگەنى ءۇشىن العىس ايتۋدان جالىقپايمىن. بۇل سوڭعى جەكپە-جەك ەمەس. الدا تالاي ءساتتى كەزدەسۋلەر كۇتىپ تۇرعانىنا سەنەمىن. ءبىز ءالى امەريكامەن قاتار الەمدى مويىنداتامىز. بۇگىنگى جەكپە-جەكتىڭ تاريحتا قالعانى ءۇشىن قۋانىشتىمىن.

ەسكە سالساق، دامير يسماعۇلوۆ (16-2) جەڭىلىپ كورمەگەن اۋستراليالىق الەكس دجوردجەسپەن (7-0) سىنعا ءتۇستى. جەكپە-جەك بارلىعى 3 راۋندقا سوزىلدى. تورەشىلەردىڭ شەشىمىمەن دامير جەڭىسكە جەتتى.