بۇگىننەن باستاپ قازاقستاندا كەيبىر شەتەلدىك تەلەارنالاردىڭ ترانسلياسياسى توقتاتىلادى دەپ حابارلادى Tengrinews سايتى. وسىدان تۋرا ءبىر جىل بۇرىن قابىلدانعان «تەلەراديوحابارلار تاراتۋ تۋرالى» زاڭعا سايكەس، 2013 جىلى ناۋرىزدىڭ 1-ىنە دەيىن قازاقستاننىڭ مادەنيەت جانە اقپارات مينيسترلىگىندە قايتا تىركەۋدەن وتپەگەن شەتەلدىك تەلەراديوارنالاردىڭ حابارلارىن قازاقستاندا تاراتۋعا تىيىم سالىنادى. مينيسترلىكتىڭ اقپارات جانە مۇراعاتتار كوميتەتىنىڭ مالىمەتى بويىنشا، 2013 جىلدىڭ 1 ناۋرىزىندا ەسەپكە قويىلعان شەتەلدىك تەلەارنالاردىڭ سانى 159 دەپ كورسەتىلگەن. قازاقستاندا كابەلدىك تەلەحابار تاراتۋشى وپەراتور قىزمەتىن كورسەتەتىن «Digital TV» كومپانياسىنىڭ باسشىسى قۋات باحريدينوۆ كوپتەگەن شەتەلدىك تەلەارنالار قازاقستانداعى كورەرمەن اۋديتورياسىن ازسىناتىندىقتان ءتيىستى ەسەپكە تۇرۋعا قۇشتارلىق تانىتىپ وتىرعان جوق دەيدى. ونىڭ ايتۋىنشا، بۇگىننەن باستاپ Russia Today، Bloomberg، World Fashion Channel، سويۋز جانە باسقا تەلەارنالاردىڭ حابارلارىن تاراتۋ دوعارىلادى. بۇعان دەيىن قازاقستانداعى وپەراتور كومپانيالاردىڭ باسشىلارى مادەنيەت جانە اقپارات مينيسترلىگىنەن شەتەلدىك تەلەراديوكومپانيالاردى ەسەپكە الۋ مەرزىمىن 2013 جىلدىڭ قىركۇيەك ايىنا دەيىن ۇزارتۋدى سۇراعان ەدى. شەتەلدىك بۇقارالىق اقپارات قۇرالدارىن ەسەپكە قويۋدىڭ مەملەكەتتiك قىزمەت ستاندارتى 2013 جىلى قىركۇيەكتىڭ 12-ىندە قابىلدانعان.