بۇگىن  ەلباسى نۇرسۇلتان نازاربايەۆ قازاقستان حالقى اسسامبلەياسىنىڭ ءححىى سەسسياسىندا سويلەگەن سوزىندە "قازاقستان ەجەلدەن وسىلاي كوپۇلتتى بولدى دەپ سانايتىندار تاريحتى بىلمەيتىندەر" دەي كەلە، قازاقستاندى مەكەن ەتەتىن بارلىق ەتنوس وكىلدەرىنە جاڭا مەرەكەنى - "قازاقتارعا راحمەت ايتۋ كۇنىن" ۇسىندى. سونىمەن قاتار،  ەلباسى ەلىمىزدىڭ حالقى وتكەن عاسىردا ورىن العان وقيعالاردى ەستە ساقتاۋى كەرەكتىگىن اتاپ ءوتتى. قازاقستاندا مەملەكەتقۇرۋشى ۇلتتىڭ ستاتۋسى جايلى بۇعان دەيى دە باسپا ءسوز بەتتەرىندە ايتىلىپ كەلگەن بولاتىن. وسى رەتتە، ءبىز ەلباسىنىڭ اسسامبلەيا سەسسياسىندا ۇسىنعان باستاماسىنا وراي بەلسەندى الەۋمەتتىك جەلى پايدالانۋشىلارىنا ساۋالناما جولداعان بولاتىنبىز. اتالمىش ساۋالناما قورىتىندىسىن نازارلارىڭىزعا ۇسىنامىز.

اۋىت مۇقيبەك، اقىن:

-وتە دۇرىس ايتىلعان ءسوز دەر ەدىم. قازاقستان حالقى اسسامبلياسىنا شىنىندا ءبىر مەرەكە كەرەك-اق! مەن وعان وسىعان دەيىن "جاڭا جىل" دەپ تويلانىپ كەلگەن "ءبىرىنشى قاڭتاردى" ۇسىنار ەدىم. شىنىن قۋعاندا ءبىزدىڭ جاڭا جىل مەرەكەمىز 22-ناۋرىز. قازاقتار سول ناۋبەت جىلدارى سۇرگىنگە ۇشىراپ، زورلىقپەن جەر اۋدارىلعان حالىقتاردى، ەڭ باستىسى، قاقاعان سۋىقتان، ۇسىكتەن امان الىپ قالدى. سوندىقتان 1-قاڭتاردى سول قازاقتارعا راحمەت ايتۋ كۇنى ەتىپ بەلگىلەسەك، بۇل كۇن مەرەكە رەتىندە تەز قابىلدانادى دەپ ويلايمىن!.

قانات اۋەسباي، "قازاقستان 2050" جالپىۇلتتىق قوزعالىسىنىڭ مەديا ديرەكتورى:

 - مەنىڭشە، "راحمەت ايتۋ كۇنى" 30 مامىرعا بەلگىلەنسە وتە ورىندى. ونىڭ ەرتەسىنە 31 مامىر قۋعىن-سۇرگىن قۇرباندارىن ەسكە الۋ كۇنى بولادى. قازاق جەرى سوناۋ قيىن-قىستاۋ جىلدارى تالاي ۇلت پەن ۇلىسقا پانا بولعان مەكەن. ەندەشە قۋعىن-سۇرگىنگە ۇشىراپ، جاپا شەككەن حالىقتاردىڭ قازاق ەلىنە العىستان وزگە ايتارى جوق بولۋى ءتيىس. ازاپتالىپ، ايدالىپ كەلگەن ۇلتتارعا ءوزى قينالىپ وتىرسا دا، سوڭعى نانىن ءبولىپ بەرگەن قازاقتىڭ مەيماندوستىعى، كەڭ قۇشاقتىعى، جاناشىرلىعىنا ەلىمىزدەگى ءتۇرلى دياسپورالار 30 مامىر كۇنى رازىلىقتىڭ ءىلتيپاتىن كورسەتسە، ەرتەسىنە 31ء-ى كۇنى قازاقپەن بىرگە قۋعىن كورگەن بابالارىنىڭ رۋحىنا بىرگە تاعزىم كورسەتەر ەدى. ءدال وسى 30 مامىر كۇنى قازاقتار دا ءوز كەزەگىندە توسىلىپ قالماي، قازاق جەرىنىڭ شاڭىراعىن بىرگە كوتەرىسىپ، ۋىعىنىڭ نىق تۇرۋى ءۇشىن ۇلەس قوسقان بارشا ۇلت پەن ۇلىستارعا اق العىسىن جاۋدىرسا دا قۇبا-قۇپ بولار ەدى

جىلبەك سەنبەك ۇلى، جۋرناليست:

 - 1 مامىر - قازاقستان حالقىنىڭ بىرلىگى كۇنى ەكەۋى ماعىنالىق جاعىنان ءبىر ەمەس پە؟! مەرەكە كۇندەرىن كوبەيتە بەرىپ نە ىستەيمىز؟

قاسىم امانجول ۇلى، جۋرناليست:

- قولدايمىن. نەگىزى دۇرىس باستاما. تەك سوڭى باسقاشا وزگەرىپ: "تاعى ءبىر كۇندى ورىس حالقىنا العىس ايتۋ كۇنى ەتەيىك" دەمەسە بولدى. جانە پرەزيدەنتتىڭ بۇل ءسوزىن رەسەيشىل توپتار ەتنوسارالىق جىككە بۇرۋعا تىرىسۋى مۇمكىن. باستاما كوتەردى مە، ەندى بيلىكتىڭ تاباندىلىعى ماڭىزدى. تاعى ەڭ سوڭىندا مەنىڭ ۋايىمىم: وسىنىڭ بارلىعى قازاقتاردى سايلاۋ الدىنداعى الداۋسىراتۋعا اينالىپ كەتپەسە ەكەن...

ايدوس جۇقان ۇلى، جۋرناليست:

اركىم قالاعان ۋاقىتىندا راحمەتىن ايتار. مىسالى، كەيدە، كوبىنە جۇما كۇندەرى اللاعا راحمەت ايتامىز. ارا-تۇرا اتا-انامىزعا بۇل دۇنيەگە اكەلگەنى ءۇشىن، تاربيەلەپ، باعىپ-قاققانى ءۇشىن راحمەت ايتامىز. راحمەت ايتۋ - ساۋاپ بولسا، 365 كۇندە ەلباسىعا ءۇزىلىسسىز راحمەت ايتاتىن "حابار" اگەنتتىگى ۇجىمىمەن ۇجماققا باراتىن شىعار.

احمەت الياز، كاتياد - قازاق-تۇرىك كاسىپكەرلەر وداعى ديرەكتورى:

 - سول ۇلتتاردىڭ قازاقستانعا اياق باسقان كۇنىن قويسا دۇرىس بولار ەدى

ءامىرجان قوسانوۆ، ساياساتكەر:

- ارينە، قازاق حالقىنىڭ باسقا ۇلت وكىلدەرىن ءوز جەرىندە پانالاتىپ، كەڭدىك تانىتقانىن مويىنداۋ، ونى الەمگە پاش ەتۋ، كەرەك دەسەڭىز، ول ءۇشىن العىس ايتۋ - تاريحي تۇرعىدان كەرەك نارسە. ۇسىنىس ايتىلدى. ونى قولداۋ كەرەك. ماسەلەن، سول كۇننىڭ اتاۋىن، قاي فورمادا اتالىپ وتەتىنىن جانە تاعى باسقا جايتتارىن قوعام بوپ اقىلعا سالۋ قاجەت. ءبىر نارسەگە قارسىمىن. بۇل كۇندى اسسامبلەيانىڭ قۇرىلعان كۇنىمەن بايلانىستىرۋدىڭ ەش قاجەتى جوق! 20 جىل بۇرىن عانا قۇرىلعان اسسامبلەيانىڭ سان عاسىرلىق تاريحى بار ول وقيعالارعا ەش قاتىسى جوق!

سەركان حاستۇرك، "قازاقستان-زامان" حالىقارالىق گازەتىنىڭ باس ديرەكتورى:

- ەلباسىنىڭ بۇل ۇسىنىسى ارينە قۇپتارلىق. قازاقستاننىڭ نانىن جەپ، اۋاسىن جۇتىپ جۇرگەن وزگە ۇلتتار اراسىندا مەيىرىمدىلىك پەن تاتۋلىقتى، بىرلىكتى ارتتىراتىن،  بىر-بىرلەرىنە جاقىنداستىراتىن مۇنداي مەرەكە كەرەك بىزگە. بارشا ۇلت پەن ۇلىس وكىلدەرى قازاقستانعا قارىزدار ەكەنى راس. سوندىقتان ءبىز قولدايمىز، قۇپتايمىز.

دايىنداعان نۇرگەلدى ءابدىعاني