نەپالداعى جەر سىلكىنىسى كەزىندە ورىس ءتىلدى ءۇش ادام ءىز-تۇسسىز جوعالىپ كەتكەن. بۇل تۋرالى رەسەيلىك Lenta.ru سايتىنا "انانتا" تۋريستىك اگەنتتىگىنىڭ ديرەكتورى ماريا ەفيموۆا مالىمدەگەن.

ونىڭ ايتۋىنشا ماسكەۋلىك ەكى ازامات تاۋعا شىعىپ كەتكەن. ال ولارمەن بىرگە گيد (جول نۇسقاۋشى) قىزمەتكەرى بولىپ جۇمىس ىستەيتىن لەنا شەرپ ەسىمدى قازاقستاندىق ازاماتشا بولعان. تاۋعا شىعىپ كەتكەن رەسەيلىك جانە قازاقستاندىقتاردان ەشقانداي حابار-وشار بولماعان. جوعالىپ كەتكەندەر قازا بولعاندار تىزىمىنە قوسىلعان.

الايدا 26 ءساۋىر كۇنى قازاقستاننىڭ سىرتقى ىستەر مينيسترلىگى نەپالداعى جەر سىلكىنىسى كەزىندە جاپا شەككەن قازاقستاندىقتار جوق دەگەن مالىمدەمە جاساعان بولاتىن.

سوڭعى مالىمەتتەرگە سۇيەنسەك، نەپالداعى تابيعي اپاتتان قازا تاپقانداردىڭ سانى 3 مىڭعا جۋىقتاعان. سونداي-اق، مىڭداعان ادام ءتۇرلى دەنە جاراقاتتارىن العان. نەپال استاناسى كاتماڭدۋدا كوپتەگەن عيماراتتار قيراپ، گيمالاي تاۋىنان كوشكىن جۇرگەن.

7،9 بالدىق سىلكىنىس 25 كۇنى تىركەلگەن. ەپيسەنترى نەپال استاناسى كاتماڭدۋدان سولتۇستىك-باتىسقا قاراي 82 شاقىرىم جەردە بولعان. سونىمەن قاتار، ءۇندىستاننىڭ سولتۇستىك-شىعىس بولىگىندە دە جەر سىلكىنگەن. كەيىنىرەك، ەكى ەل شەكاراسىندا 20-عا جۋىق افتەرشوك تىركەلگەن. ءقازىر وقيعا ورنىندا قۇتقارۋشىلار قىزمەت ەتۋدە.

نۇرزات توعجان