دومبىرا قازاق حالقىنىڭ اسىل مۇراسى، ونسىز قازاق بولمىسىن ەلەستەتۋ وتە قيىن. قادىر اقىن جىرلاعانداي: «ناعىز قازاق قازاق ەمەس، ناعىز قازاق دومبىرا». بۇگىندە دومبىرا ءبىزدىڭ ۇلتتىق سيمۆولدارىمىزدىڭ ءبىرى. بىرىكتىرۋشى، ۇيىستىرۋشى فاكتور. ونى مويىندامايتىن، «-تىڭدامايمىن» دەپ مۇرىن شۇيىرەتىن قازاق جوق بولسا كەرەك. قازاقشا سويلەمەۋى مۇمكىن، ءبىراق دومبىرانى سۇيمەتىن بولۋى مۇمكىن ەمەس. تەك وزىندىك، تەك قازاقتىق بولىپ ەلەستەتىلەتىن دومبىرا و باستان جالپى تۇركى جۇرتىنا ورتاق دۇنيە. قالا بەردى تەك قازاقتى ەمەس، كوپتەگەن تۇركى بالاسىن بىرىكتىرەتىن مۇرا. ەگەر وسى ۋاقىتقا دەيىن ونى تەك قازاق، قىرعىز، نوعاي جانە تاعى باسقا باۋىرلارىمىزعا ورتاق دەپ كەلسەك ەندى كەرەگەمىز كەڭگە جايىلۋدا. اۋعانىستاننىڭ ورتالىق ايماعىندا 5 ميلليوننان استام جۇرت ءومىر سۇرەدى، اتى حازار، زاتى تۇركى(وزدەرى سولاي دەيدى)، ۇلتتىق اسپاپتارى دومبىرا، تەك تىلدەرى پارسى، دىندەرى شييت. «تىلدە، ىستە، پىكىردە – بىرلىك!» دەپ ۇراندايتىن بولاشاق رەسپۋبليكالىق قوزعالىسى وسى حازار جۇرتىنىڭ وكىلدەرىن الماتىعا شاقىرىپ كونسەرت بەرمەك، 04 مامىر كۇنى الماتىدا اۋعانىستان دومبىراشىلارى(حازارلار) جانە قازاق دومبىراشىلارى، ۇلتتىق ەسترادا جۇلدىزدارىنىڭ قاتىسۋىمەن كەش وتكىزبەك. كەشتىڭ ماقساتى قازاق جانە حازار دومبىراشىلارىن تىڭداۋ. كەشكە سول سەكىلدى، اۋعانىستاننىڭ پارلامەنت دەپۋتاتتارى جانە باسقا دا زيالى قاۋىم وكىلدەرى قاتار كەلەدى. قازاقستاننىڭ دا ءماجىلىس دەپۋتاتتارى، زيالى قاۋىم وكىلدەرى، ۇلت-پاتريوتتارى كەلەدى دەپ كۇتىلۋدە. اتالعان ءىس-شارانى تاماشالاۋعا بارشا كورەرمەندەردى، جۋرناليستەردى، قوعام قايراتكەرلەرىن جانە ورتاق تۇركى دۇنيەسى ءۇشىن بولىسىپ جۇرگەن ازاماتتاردىڭ بارلىعىن شاقىرامىز. كىرۋ تەگىن.