سوڭعى كەزدەرى الەۋمەتتىك جەلىلەردە جالاڭاشتانعان قىز، جىنىسى ءبىر ۇلداردىڭ ماحابباتى مەن اتىڭ شىقپاسا جەر ورتەنىڭ كەرىن قىلاتىندار قاپتاپ كەتتى. ءبىرى، قازاق تويىندا ستريپتيز بيلەپ، ءدۇيىم جۇرتتى "تانىمەن ءتانتى" ەتىپ جۇرسە، ەندى ءبىرى جىنىس تالعامايتىن ەرسى ارەكەتتەرىن جارنامالاپ ءجۇر. ەڭ سوراقىلارى، قازاق ادەبيەتىنىڭ، مادەنيەتىنىڭ التىنىن جەزگە اينالدىرىپ، ابايدىڭ ءانىن الەم الدىندا ماقازتاسا، تاعى ءبىرى قۇرمانعازىنىڭ كۇيىن ايەلدىڭ اۋرەتىنە بالاعان. ءاي دەيتىن اجا، قوي دەيتىن قوجاسى جوق ينتەرنەت وسىلايشا ىرىگەندەر مەن شىرىگەندەردىڭ ويناس قۇراتىن ورداسىنا اينالىپ كەتكەندەي. وسىنداي جاعا ۇستاتارلىق وقيعانىڭ ءبىرىن كەشە تالدىقورعاندىق جاستار كورسەتتى.
https://www.youtube.com/watch؟v=F21myDvIlWIكەشە Youtube الەۋمەتتىك كانالىندا الماتى وبلىسىنىڭ ورتالىعى، تالدىقورعان قالاسىندا ورنالاسقان قاراكەرەي قابانباي باتىردىڭ ەسكەرتكىش ءمۇسىنىنىڭ ۇستىنە ءمىنىپ، مازاققا اينالدىرعان جاستاردىڭ ۆيدەوسى پايدا بولدى. الەۋمەتتىك جەلىلەردە كەڭىنەن تارالىپ ۇلگەرمەسە دە، اتالمىش ۆيدەو ءبىرقاتار قازاقستاندىق ينتەرنەت قولدانۋشىلاردىڭ اشۋىن تۋعىزىپ ۇلگەرگەن.
ۆيدەودا بايقاڭانىڭىزداي، باتىردىڭ ءمۇسىنىن قورلاعان جاستار وزدەرىنىڭ بۇل ارەكەتىنە ەش قىمسىنبايدى دا. ءتىپتى، ماز-مەيرام. الايدا، الەۋمەتتىك جەلى قولدانۋشىلارى جاستاردىڭ بۇل ارەكەتتەرىن - حالىقتىڭ حاس باتىرىنا، تاريحي ەسكەرتكىشتەرگە، ودان قالا بەردى مادەني مۇرالارعا دەگەن قۇرمەتسىزدىك دەپ قابىلداعان.
اتالمىش وقيعاعا قاتىستى قۇقىق قورعاۋ ورىندارىنا ءالى شاعىم تۇسپەگەن. سول سەبەپتەن، مادەنيەتسىز جاستاردىڭ ۇسىتەن ءىس قوزعالماعان، تەرگەۋ نەمەسە ءتۇسىندىرۋ جۇمىستارى جۇرگىزىلمەگەن.
قابانباي باتىر - جوڭعار شاپقىنشىلىعى كەزىندە قازاق جەرىن جاۋدان ازات ەتىپ، قازاق حاندىعى جولىندى كۇرەسكەن ۇلت باتىرى، داڭقتى قولباسشى، جەكپە-جەكتە جان بالاسىنا ەسە جىبەرمەگەن باتىر. قابانباي "حان باتىر" دارەجەسىنە دەيىن كوتەرىلگەن.
ال تالدىقورعانداعى باتىردىڭ ەسكەرتكىش ءمۇسىنى 2007 جىلى جەرگىلىكتى "دارابوز" قوعامدىق قورىنىڭ ۇيىتقى بولۋىمەن تۇرعىزىلعان بولاتىن.
نۇرزات توعجان
