بيىلعى ۇبت ءتارتىبى قاتالىراق بولماق. ەندى تەست تاپسىرىلاتىن اۋديتوريانى ءىت-مامانى قاداعالاپ، شپارگالكامەن ۇستالعاندار جوو-عا ءتۇسۋ قۇقىعىنان ايىرىلادى.

بيىل تۇلەكتەر سىناقتى جاڭا تارتىپپەن تاپسىرادى. وسى جولى ۇبت سۇراقتارى دا جاڭارعان. سونداي-اق تۇلەكتىڭ تەستىلەۋ كەزىندە العان باعاسى مەن جىلدىق قورىتىندى باعاسى قوسىلىپ، ورتاشا اريفمەتيكالىق باعاسى شىعاتىن بولدى. تەستىلەۋ ماۋسىمنىڭ 2ء-سى مەن 15ء-ى ارالىعىندا بولادى.

ساۋالدار قورى 21 مىڭ 200 جاڭا سۇراقپەن تولىققان. ونىڭ 3 مىڭى لوگيكالىق سۇراق تۇرىندە بولادى. سونداي-اق وسى جىلدان باستاپ وقۋشىنىڭ ۇلتتىق ءبىرىڭعاي تەست تاپسىرۋ كەزىندە العان باعاسى مەن جىلدىق قورىتىندىسى قوسىلىپ، ورتاشا اريفمەتيكالىق باعامەن ەسەپتەلەدى.

“ۇلتتىق ءبىرىڭعاي تەستىنى تاپسىرعان كەزدەگى الىنعان باعامەن قورىتىندى باعانىڭ ورتاشا اريفمەتيكالىق باعاسى قويىلادى. ەگەر دە داۋ تۋعان جاعدايدا، باعا جوعارىلاتىلادى. مىسالى، ەگەر دە وقۋشى ۇبت تاپسىرعان كەزدە 4 دەگەن باعا السا، ال ەندى ونىڭ قورىتىندى باعاسى 5 بولعان جاعدايدا وندا وقۋشىعا جوعارىلاتۋ ماقساتىندا 5 دەگەن باعا قويىلادى”،- دەدى الماتى قالاسى ءبىلىم سالاسىن باقىلاۋ دەپارتامەنتىنىڭ باسشىسى قاناي باتىربايەۆ.

بيىلدان باستاپ ءاربىر اۋديتوريانى ءىت-مامانى قاداعالايدى. ولار ۇيالى بايلانىستىڭ بولمەدە بولماۋىن، بەينەباقىلاۋ كامەرالارىنىڭ دۇرىس جۇمىس ىستەۋىن، سونداي-اق، جاۋاپ پاراقتارىنداعى بەلگىلەنگەن نۇسقالاردىڭ ءجوندى ەسەپتەلۋىن باقىلايدى.

ماماندار وسى ارقىلى ءتارتىپتى ودان ارمەن كۇشەيتپەك. ەندى تەست تاپسىرۋ كەزىندە بىتىرۋشىدەن تىيىم سالىنعان زاتتار مەن “شپارگالكا” تاركىلەنسە، ول اۋديتوريادان قۋىلادى. ءسويتىپ تەست تاپسىرۋ قۇقىعىنان ايىرىلادى.

“وندا تەست ماتەريالدارى جويىلىپ، مەكتەپ ءبىتىرۋشى اۋديتوريادان شىعارىلادى. ول بيىل جوعارعى وقۋ ورنىنا ءتۇسۋ قۇقىعىنان ايىرىلادى. ءبىراق مەكتەپتە ەمتيحان تاپسىرىپ، اتتەستات الۋىنا تولىق مۇمكىندىگى بولادى”،- دەدى دەدى الماتى ءبىلىم سالاسىن باقىلاۋ دەپارتامەنتىنىڭ باسشىسى قاناي باتىربايەۆ.

بيىل الماتدا 7905 وقۋشى مەكتەپ بىتىرەدى، ونىڭ 6247ء-سى ۇلتتىق ءبىرىڭعاي تەست تاپسىرۋعا ءوتىنىش ءبىلدىرىپتى. ولاردىڭ قاتارىندا 276 تۇلەك التىن بەلگىگە ۇمىتكەر. قالادا 7 ۇبت وتكىزۋ ورتالىعى جۇمىس جاسايدى.

ايتا كەتسەك، الماتى قالاسى ءۇش جىل قاتارىنان ۇبت كەزىندە ۇزدىك كورسەتكىشكە يە بولىپ، رەسپۋبليكا بويىنشا كوش باستاپ كەلدى.