استانادا جەكە ۇيلەردىڭ بىرىندە بولعان جويقىن ءورت سالدارىنان 5 بالا قازا تاپتى. بۇكىل جۇرتشىلىقتى ەسەڭگىرەتكەن جانتۇرشىگەرلىك وقيعاعا بايلانىستى الەۋمەتتىك جەلى قولدانۋشىلارى تۇرلىشە پىكىر ءبىلدىرىپ، قايعىلى جاعدايعا تاپ بولعان اتا-اناعا كوڭىل ايتىپ جاتىر.
Qamshy.kz اقپارات اگەنتتىگى الەۋمەتتىك جەلىدە قىزۋ تالقىعا تۇسكەن قازالى وقيعاعا بايلانىستى ايتىلعان پىكىرلەردىڭ ءبىر شوعىرىن نازارلارىڭىزعا ۇسىنادى.
حاليما ءتاجىقۇل: «بەس بالانىڭ ءولىمى تۋرالى بايقاپ جازىڭىزدارشى، اكە-شەشەنى كىنالاۋدان اۋلاق بولايىقشى، جاراعا تۇز سەپكەننەن نە ۇتاسىزدار؟ ءدام-تۇز تاۋسىلسا، قابىرعا دا قۇلايدى دەپ جۇباتاتىن جۇرت ەمەسپىز بە؟ قۇداي ەسىركەسىن... الگى الاۋلاتقان-جالاۋلاتقان جىلىمىزدىڭ وسىنداي قايعىمەن جالعاسىپ جاتقانىنا جاستاردى باسپانامەن قامتي الماي وتىرعان اكىم-قارالار كىنالى، استاناعا كەلىپ جاتقان جاس وتباسىلاردىڭ ەسەبىن جۇرگىزە الماي وتىرعان قۇزىرلى ورىندار كىنالى، ءبارى ءبىر كۇندىك قىزمەتتىڭ قىزىعىن ويلاپ، جاس پەن بالانىڭ مۇددەسىن ويدان شىعارىپ العان، قاس قىلعاندا. قايدا، قاي مەكەمەگە بارساڭ، جىلماڭ ەتىپ قالتاڭدى قاعىپ قالۋدى ويلاپ وتىرعان جىلماقايلار... ونداي جەردە كونتەينەر تۇرماق، ءايبات عيماراتىڭنىڭ دا شاڭىراعى ورتاسىنا تۇسەدى».
داۋلەت سەرىكباي: «بالا 2 جاسقا تولعانشا، 50-60 مىڭ جاردەماقى تولەنۋىن تالاپ ەتۋىمىز كەرەك. سوندا انالار ۇيىندە وتىرار ەدى، بالاسى دا اناسىنىڭ قۇشاعىندا ەمىپ وسەر ەدى. تىم قۇرىسا، 2 جىل جاعدايىن جاساي الماعان بيلىكتەن نە قايىر. 3 ايلىق بالانى تاستاپ جۇمىسقا شىعۋ نە سۇمدىق؟ كارەرا قۋىپ جۇمىسقا شىقپاعانى انىق. "جەتپەگەسىن، بالالارىنا نان تاۋىپ بەرەم" دەپ شىقتى جۇمىسقا.
قاجەت بولسا، انالار مينيسترلىكتىڭ الدىنا شەرۋگە شىقسىن. ءۇنسىز قالماڭىزدار. ءوز حالقىنان اياپ، ءوز حالقىن جارىتپاي وتىرعان ۇكىمەت كەتسىن. بالالاردى اناسىنان، انالاردى بالالارىنان ايىرعان ۇكىمەت قاجەت ەمەس. بالالاردىڭ وبالى ۇكىمەتتىڭ موينىندا».
"جالعىز ادامدىق پيكەتكە شىعۋىم مۇمكىن. مينيسترلىكتەن بالا 2 جاسقا تولعانشا 60-70 مىڭ تەڭگە جاردەماقى تولەۋىن تالاپ ەتەمىن. بالام جوق، ءبىراق بەيكۇنا ءىنى-قارىنداستارىمنىڭ ىستىق وتتان ءولۋىن ەمەس، اناسىنىڭ ىستىق قۇشاعىندا ءوسۋىن قالايمىن. ەشقانداي پيار-مياردى بىلمەيمىن، تالاپ ەتكىم كەلەدى، قولىمنان كەلەتىنى سول عانا، جۇرەگىم قان جىلاپ وتىر. 2-3 ايلىق بالانى ەمشەكتەن ايىرىپ جۇمىسقا شىعىپ جۇرگەن انالاردى كورىپ ءجۇرمىن. شىدامىم شەگىنە جەتتى. سوتتاسا سوتتاي بەرسىن، قاماسا قاماي بەرسىن. تىم قۇرىسا ۇيىمداسىپ مينيسترلىككە حات تاپسىرايىقشى".
ايگۇل مىڭجاسار: «5 بالاسى بار ۇيدە 7 اۋىزدى اسىراۋ ءۇشىن نەشە ادام جۇمىس ىستەۋ كەرەك؟ ارينە، كەم دەگەندە - 2 ادام!
بۇگىن تۇندە پەرىشتەگە اينالعان 5 بالاپاننىڭ اتا-اناسى سونىڭ قامىمەن ءجۇردى.
ال 5 بالا تاپقان انانى ەڭ بولماسا، 1 تومەنگى جالاقى (مزپ، 42 500 تگ) كولەمىندە جاردەماقىمەن ۇيدە وتىرعىزۋعا بولماي ما؟
5 بالا تۋعان ايەلدىڭ 40 مىڭ تەڭگەلىك قۇنى جوق پا؟
اناۋ مەملەكەتتىك الەۋمەتتىك ساقتاندىرۋ قورى - گفسس-تا 1 ترلن-نان اسا اقشا جينالىپ تۇر. وسى جۇيەنىڭ قاتىسۋشىسى رەتىندە سونداعى قاراجاتتان 5 جانە ودان كوپ بالاسى بار وتباسىلارعا اي سايىن 1 ايلىق تومەنگى جالاقى كولەمىندە جاردەماقى تاعايىنداۋدى ۇسىنامىن!
بۇل الەۋمەتتىك ساقتاندىرۋ جۇيەسىنە ءاربىر جۇمىس ىستەيتىن ادام ءۇشىن جۇمىس بەرۋشى ونىڭ ايلىعىنىڭ 5 پايىزى كولەمىندە اۋدارىم جاسايدى. ەندى ءبىرىڭعاي الەۋمەتتىك تولەمنەن دە (ەسپ) اقشا تۇسەتىن بولادى. ال ساقتاندىرۋ جاعدايى جۇرتتىڭ بارىندە بىردەي بولا بەرمەيدى. وسىلايشا جىل سايىن ميللياردتاعان اقشا قوردا قالىپ وتىرادى.
جاقسى، زەينەتاقى قورى ءارقايسىمىزدىڭ قارتتىعىمىز ءۇشىن.
ۇلتتىق قور بولاشاق ۇرپاق ءۇشىن.
ال الەۋمەتتىك ساقتاندىرۋ قورىن (گفسس-تى) الەۋمەتتىك ماسەلەلەردى شەشۋگە جۇمساۋعا بولادى عوي! كۇيىپ كەتەسىڭ دا!»
گۇلنۇر يماندوسوۆا: «البينا، الينا، ەلينا، سابينا، باقىت...
5 بالا تىرىدەي جانىپ كەتكەن. سۇمدىق-اي. ءبىرىن-بىرى قاراعان،بىرىنە-بىرى سۇيەۋ بولىپ، دەمەۋ بولىپ ءوسىپ كەلە جاتقان قوشاقاندارىنان ءبىر ساتتە ايىرىلعان اتا-انانىڭ كۇيىن كوز الدىما ەلەستەتۋ قيىن. جۇمىسقا كەتكەندە وزدەرىن قالدىرىپ جۇرگەن ەكەن. مۇنداي قانشاما وتباسى بار. كۇنى كەشە عانا ششۋچينسكىدە رەسپۋبليكالىق بالالار وليمپياداسىنا ۇلىمدى اپارىپ قايتتىم. ءبىر جالعىزباستى انامەن تانىستىم.سونداي جاقسى ادام. قىزى قانداي تاربيەلى،ءتارتىپتى! اناسىن «اناشىم» دەپ ەركەلەتىپ تۇر. ءبىراق، بۇگىندە سول 10 جاسقا كەلگەن بالانىڭ كورمەگەنى جوق ەكەن. اناسى جۇمىسقا كەتكەندە 1 جارىم جاستاعى بالا ۇيدە جاپادان جالعىز قالادى. گارشوگىن،تاماعىن دايىنداپ كەتەدى ەكەن. "ءسويتىپ جالعىز قالىپ ءوستى عوي" دەيدى اناسى. قۇداي-اۋ، ەلىمىزدە مۇنداي قيىندىقتى باسىنان وتكىزىپ كەلە جاتقان، جۇرتتىڭ ەسىگىن پانالاپ، تورعايدىڭ ۇياسىنداي سۋىق كەپەنى، تەمىر ۆاگون-كونتەينەرلەردى جالعا العا الىپ تۇرىپ جاتقان قانشاما وتباسى بار؟! ءبىز ونى جاقسى بىلەمىز، اينالامىزدا تولىپ ءجۇر دەپ ەتىمىز ۇيرەنىپ كەتكەن. تۋرا وسىنداي قايعىلى وقيعا قاتتى ەسىمدە قالىپتى. كتك-دا جۇرگەندە ءتۇسىرىپ ەدىم. داچادا شەشەسىمەن تۇراتىن 2 كىشكەنتاي بالا (3-4 جاس) تىرىدەي جانىپ كەتكەن. ءورت شىققاندا قورىققاندارىنان بولمەدەگى تەمىر كروۆاتتىڭ استىنا ءبىرىن-بىرى قاپسىرا قۇشاقتاپ تىعىلعان عوي. ءتۇسىرىپ ءجۇرىپ بايقادىم: بالالاردىڭ كۇيگەن تەرىسى قابىرعاعا جابىسىپ قالعان. سۇمدىق-اي. تۇسىرىلىممەن تالاي مارتە مورگتاردا بولساق تا سەلت ەتپەگەن جۇرەگىمىز اناۋ قابىرعاداعى ءبىر شوكىم كۇيگەن تەرىگە شىداي المادى. ارىپتەسىم ەكەۋمىز جىلاپ جىبەردىك. قۇدايىم-اي، بۇگىنگى 5 بالاپاننىڭ اتا-اناسىنا سابىر بەرە گور! كىمدى كىنالاۋدى بىلمەيسىڭ... 5 بالاسى بار وتباسى نەگە پاتەر جاعالاپ جۇرگەن ەكەن دەگىم دە كەلمەيدى. ويتكەنى، ءبىزدىڭ بيلىك - ول ءبىزدىڭ بيلىك! مۇنداي وتباسىلاردى ەسىگىنەن سىعالاتپايتىن،قاجەت بولسا مۇنداي ىستە وزگەنى «سپوكوينو» ايىپتاي سالاتىن،16 مىڭ تەڭگەگە بايىپ كەتەدى دەپ جۇرگەن بەيشارا،جاۋاپسىز بيلىك!»
ۇسىنعان: نازەركە لابيحان
پىكىر قالدىرۋ