باياعىدا قىتايدا لي-لي اتتى ءبىر قىز تۇرمىسقا شىعىپتى. بىرنەشە ايدان كەيىن-اق ەنە مەن كەلىن اراسىنداعى ايقاي-شۋدان ول ۇيدە تۇرۋ قيامەتكە اينالادى. ەنەسىنەن ءقايتىپ قۇتىلارىن بىلمەي دال بولعان كەلىن دارىلىك شوپتەر جاساۋمەن اينالىساتىن اكەسىنىڭ ءبىر دوسىنا بارىپ، "ۋ جاساپ بەرىڭىز" دەپ جالىنادى. قارت كىسى وعان ۋىتى وتكىر شوپتەن جاساعان ارنايى ءدارىسىن بەرىپ تۇرىپ، ونى ءۇش اي بويى كۇن سايىن از-ازداپ ەنەسى جەيتىن تاماققا قوسىپ بەرىپ وتىرۋدى تاپسىرادى. قارت كىسى جاس كەلىنگە ەشكىم سەزىكتەنبەۋى ءۇشىن ەنەسىنە جاقسى قاراپ، وعان ەڭ تاماقتاردى جاساۋدى ەسكەرتەدى.
قۋانا ۇيىنە كەلگەن لي-لي قارت كىسىنىڭ ايتقاندارىن بۇلجىتپاي ورىنداۋعا كوشەدى. ەنەسىنىڭ تاماعىنا از-ازداپ ۋ قوسىپ جۇرەدى. "ەشكىم مۇنىمدى ءبىلىپ قويماسىن" دەپ، ەنەسىن قاتتى سىيلاپ-قۇرمەتتەي باستايدى. وزىنە اناسىنداي قاراپ، سىيلاپ، قۇرمەت كورسەتىپ جۇرگەن كەلىنىنە ءجونسىز ۇرىسىپ، تىرناق استىنان كىر ىزدەپ جۇرگەن ەنەسى دە ءوز ارەكەتىنىڭ دۇرىس ەمەستىگىنە كوزى جەتىپ، كەلىنىنە باسقاشا كوزقاراسپەن قاراپ، سۇيسىنە باستايدى.
كوپ وتپەي-اق ۇيدە تىنىشتىق ورناپ، جانۇيا مۇشەلەرى بىر-بىرىمەن ءتاتۋ-تاتتى تۇرىپ كەتىپتى. جاس كەلىن ەنەسىنە ءوز قولىمەن ۋ بەرىپ كەلگەنىنە ەندى وكىنە باستايدى. ۋدى ەنەسىنىڭ قانىنان قايتا تازالاتقىسى كەلەدى. ويتكەنى، جاقسى كورىپ كەتكەن ەنەسىن ولىمگە قيمايدى. دەرەۋ الگى شوپپەن اينالىساتىن قارتقا جۇگىردى. وزىنە بۇل جولى باسقا وتىنىشپەن كەلىپ، كوزىن جاسقا بۇلاپ وتىرعان جاس كەلىننىڭ ايتقانىن ەستىگەن قارت كوزىنەن جاس اققانشا كۇلەدى. سويتەدى دە: -"شىراعىم، لي-لي، - دەدى، - مەنىڭ ساعان بەرگەنىم ۋ ەمەس، كەرىسىنشە، دارۋمەندەر بولاتىن. سەن وسى ءۇش اي ىشىندە ەنەڭنىڭ دەنساۋلىعىن بۇرىنعىسىنان دا جاقسارتتىڭ. بار بولعانى، سەن ونى سىيلاپ، قۇرمەتتەگەن سايىن ارالارىڭداعى اشۋ سەيىلە بەردى، تاتۋلىق پەن سۇيىسپەنشىلىك ورنادى. سەن ەندى ناعىز اقىلدى كەلىن بولدىڭ!" – دەگەن ەكەن.
ۇسىنعان: ماقپال سەمباي
