10 ناۋرىز قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ لاۋرەاتى، اتاقتى كينورەجيسسەر سۇلتان قوجىقوۆتىڭ تۋعان كۇنى. قازاق حالقىنا «قىز جىبەكتەي» كلاسسيكالىق تۋىندىنى سىيلاعان كينورەجيسسەر كوزى ءتىرى بولعاندا 90 جاسقا تولار ەدى. دۇيسەنبى كۇنى الماتى قالاسىندا سۇلتان قوجىقوۆتىڭ مەرەيتويىنا وراي ەسكە الۋ كەشى وتەدى. بەلگىلى رەجيسسەردىڭ تولىق اتى ءجونى - سۇلتاناحمەت قوڭىرقوجا ۇلى. ءبىراق كينەماتوگرافيا تاريحىندا سۇلتان قوجىقوۆ اتىمەن بەلگىلى بولىپ قالدى. كينومەن ول سوعىستان كەيىن اينالىسا باستادى. 18 جاسىندا مايدانعا اتتانىپ، سەگىزىنشى گۆارديالىق پانفيلوۆشىلار ديۆيزياسىنىڭ قاتارىندا سوعىستى. جاس كەزىندە ول بەلگىلى سۋرەتشى اعالارىمەن بىرگە سۋرەت سالۋمەن اينالىسىپتى. ونىڭ كاريكاتۋرالارى جانە ساياسي شارجدارى «شمەل»، «يزۆەستيا» جانە باسقا دا باسىلىمداردا جارىق كوردى. اعاسى قۇلاحمەتتىڭ كەڭەسىمەن ول بۇكىلرەسەيلىك مەملەكەتتىك كينەماتوگرافيا ينستيتۋتىنىڭ رەجيسسۋرا بولىمىنە تۇسەدى دە، بەلگىلى ۇستاز الەكساندر دوۆجەنكودان شەبەرلىك ساباقتارىن الادى. العاشقى جۇمىستارى - «مات ي سىن»، «مى يز سەميرەچيا» فيلمدەرىن رەجيسسەر الماتىنىڭ كوركەم جانە حرونيكالىق فيلمدەر كينوستۋدياسىندا تۇسىرەدى. كەيىننەن سۇلتان قوجىقوۆ ۇلتتىق ەپوستى قولعا الىپ، عابيت مۇسىرەپوۆ، وپەراتور اسحات اشراپوۆ جانە كومپوزيتور نۇرعيسا تىلەندييەۆپەن بىرگە ۇلتتىق كينوونەرىنىڭ جاۋھارىنا اينالعان «قىز جىبەكتى» تۇسىرەدى. بۇل ءۇشىن رەجيسسەر قازاقستان مەملەكەتتىك سىيلىعىنىڭ لاۋرەاتى اتاندى. «قىز جىبەك» سۇلتان قوجىقوۆتىڭ كينوداعى ەڭ ۇزدىك تۋىندىسى. ول وتاندىق كينەماتوگرافيا تاريحىنداعى ەڭ كوپ قارجى كوپ تۇسىرگەن فيلم بولدى. ءالى كۇنگە دەيىن كورەرمەننىڭ سۇيىكتى فيلمدەرىنىڭ ءبىرى بولىپ كەلەدى. سۇلتان قوجىقوۆ لولا ابدىكاريموۆا، كەنەنباي قوجابەكوۆ، مۇلىك سۇرتىبايەۆ، مەرۋەرت وتەكەشەوۆا، قۇمان تاستانبەكوۆ سىندى ارتيستەردىڭ اتتارىن تانىتقان. ولاردىڭ كينوداعى جولى رەجيسسەردىڭ فيلمدەرىنەن باستالعان ەدى. الداعى دۇيسەنبى كۇنى الماتىدا سۇلتان قوجىقوۆتى ەسكە الۋ كەشى بولىپ، وندا ۇلى رەجيسسەر تۋرالى دەرەكتى فيلم كوپشىلىك نازارىنا ۇسىنىلماق. Khabar.kz