جاستار تەاترى ۇلى وتان جەڭىسىنىڭ 70 جىلدىعىنا وراي «تىراۋ-تىراۋ، تىرنالار...» دراماسىن ۇسىنادى

استانا قالاسىنىڭ جاستار تەاترى 7 مامىر كۇنى م.گوركييي اتىنداعى مەملەكەتتىك اكادەميالىق ورىس دراما تەاترىنىڭ ساحناسىندا س.ءجۇنىسوۆتىڭ «تىراۋ-تىراۋ، تىرنالار...» دراماسىنىڭ پرەمەراسىن وتكىزەدى.

اتالمىش سپەكتاكل قازاقستاننىڭ حالىق جازۋشىسى، دراماتۋرگ ساكەن ءجۇنىسوۆتىڭ «جارالى گۇلدەر» تۋىندىسىنىڭ نەگىزىندە ساحنا تورىنە شىعىپ وتىر. سپەكتاكلدىڭ قويۋشى رەجيسسەرى - قازاقستاننىڭ ەڭبەك سىڭىرگەن قايراتكەرى نۇرقانات جاقىپباي.

جەتپىس جىل بۇرىن ۇلى وتان سوعىسىنىڭ اكەلگەن تاۋقىمەتى بالالاردىڭ دا ارقاسىنا ايازداي باتقانى اقيقات. بالانىڭ ءبارى باقىتتى بولۋى ءۇشىن جارالعانىمەن، سول داق تۇسپەگەن ءمولدىر الەمدى سۇم سوعىستىڭ ىزعارى قارىپ وتسە، امالسىز ەرەسەكتەر كوتەرەر ءزىل باتپان اۋىرتپالىق، جوقشىلىق، اتا-اناسى، تۋعانىنان قاپيادا ماڭگىلىككە كوز جازىپ قالۋ – بالاڭ تانىمدى ءبىر-اق ساتتە ەسەيتىپ جىبەرەرى ءسوزسىز. ءيا، ولار سۇراپىل سوعىس بالالىعىن ۇرلاعان جارالى گۇلدەر. ولار جىلايدى، قابىرعاسى قايىسا قايعىرادى، ءبىراق ءبىر ساتكە دە ارمانىنان الىستاعان ەمەس. تىراۋلاپ ۇشقان تىرنالار لەگىنە ءۇن قاتادى، ارمان-تىلەگىن جولدايدى، كەلەشەككە زور ۇمىتپەن كوز تىگەدى. باقىت باستاعان جاس جەتكىنشەكتەردىڭ حالىق باسىنا قارا بۇلت ۇيىرىلگەن قىسىلتاياڭ شاقتاعى ارمان مەن ۇمىتكە تولى ىشكى پسيحولوگيالىق كۇيىن ءجىتى ساراپتاعان پەسا بالالىعىن سۇراپىل سوعىس جالماعان بۋىننىڭ بوياماسىز كۇيىن بۇكپەسىز بايان ەتەدى.