رەسەي مادەنيەتىنىڭ شىڭىن شىن تالانتىمەن مويىنداتقان ساناۋلى قازاق بولسا، سونىڭ ءبىرى - باتىرحان ەدى. اقىرى جات جەردە ءجۇرىپ، جۇرەك تالماسىنان قايتىس بولدى. سول كۇنى بۇكىل رەسەيدىڭ ونەر جۇلدىزدارى تايلى-تۇياعىمەن كۇڭىرەندى. قازاق ۇلىنىڭ قازاسىنا قايعىردى، قابىرعالارى قايىستى. ب ا ق بىزگە سونى كورسەتتى. قازاقستاننىڭ بارلىق ايماقتارىنداعى باتىردىڭ ونەرىنە تابىنۋشى، جانكۇيەرلەرى بەلسەندىلىك تانىتىپ، ەسكە الۋ شارالارىن ۇيىمداستىردى. ءسويتتى دە، اسىرەدىنشىلدەردىڭ سىن ساداعىنا ءىلىندى. ءجا، ونى قويشى. مەن باتىردىڭ اندەرىن ءسۇيسىنىپ تىڭدايتىنمىن. قۇرمەتتەۋگە دە جوق ەمەس ەم. الايدا سوڭعى كەزدەرى الەۋمەتتىك بەلسەندىلەر الماتىدان، دالىرەك ايتسام، كوكتوبەدەن باتىرحانعا ەسكەرتكىش اشۋ تۋرالى باستاما كوتەرىپ، قول جيناۋعا كىرىسىپ كەتىپتى. بۇل ەندى، ارتىق. باتىر شىن تالانت. الايدا، قازاقتا ەسىمىمەن كوشە اتالۋى، ەسكەرتكىش ءمۇسىنى ورناتىلۋى ءتيىس قانشاما الىپتار بار. سوعان توقتالا كەتەلىك. تاۋەلسىزدىكتىڭ 24-جىلىندا بوركىمىزدى اسپانعا اتىپ، جارىسا قاۋمالاسىپ، ماقتانا جازىپ جەر-كوككە سىيماي جاتىرمىز. الايدا، سانامىز بەن رۋحانياتىمىز تاۋەلسىزدىك نىشاندارىنا ۇيلەسە الىپ جاتىر ما؟ ساياسي-ەكونوميكالىق ماسەلەلەردى ايتپاعاندا، رۋحانيات پەن ۇلتتىق سانا سەرپىلىسى كوڭىل جۇباتپايدى. ەلىمىزدىڭ كەزىندە تالاي جىل استاناسى بولعان، قازىرگى مادەنيەت پەن عىلىمنىڭ وشاعى الماتى قالاسىنداعى كوشە اتاۋلارىنا كوز جىبەرسەڭىز، تاپتاۋرىن بولعان سەڭنىڭ ءالى كۇنگە سوگىلە قويماعانىنا كۋا بولاسىز. الماتى كوشەلەرى وتارشىلدىق اتاۋلاردان ارىلا الماي وتىر. سەڭ بولىپ تۇرعان فۋرمانوۆتىڭ كوشەسىن كىم ءۇشىن ساقتاپ وتىرمىز. شيەۆشەنكو، پولەجايەۆا، داگەستانسكايا، گەتە، ا.ەيريح ت.ب. تىزبەلەي بەرسەڭ اۋىز تالادى. باستاماشىلداردىڭ باتىرحانعا كوشە اتىن بەرۋ، ەسكەرتكىش ءمۇسىنىن ورناتۋ يدەياسى جاقسى عوي. ءبىراق، قازاق رۋحانياتىنا، ادەبيەتى، مادەنيەتىنە، قوعامىنا ەلەۋلى ەڭبەك سىڭىرگەن، ەسىمدەرى نە ءبىر كوشەگە، نە ءبىر مەكەمەگە بەرىلمەگەن اياۋلى ازاماتتار بار ەمەس پە؟! قادىر اقىن مىرزا ءالى، تۇمانباي مولداعالييەۆتەر شە؟ الماتى قالالىق اكىمدىگىنە، احمەتجان ەسىموۆ مىرزاعا دەيىن حات جازىلعانىمەن، ماسەلە ءالى شەشىمىن تاپقان جوق. قۇرعاق ۋادە. باتىرحانعا ەسكەرتكىشتى كوكتوبەدەگى "The Beatls" توبىنىڭ تاس ءمۇسىنىىڭ جانىنا بەرۋدى ۇسىنىپتى. ءبىراق، ەرتە. ءبىر ونەرپازعا ەسكەرتكىش وناتا سالۋ ويىنشىق ەمەس قوي. ەسكەرتكىش ول - تاريح. ال تاريحتا باتىرحاننان دا داڭقتى، لايىقتى ازاماتتار بار.

نۇرگەلدى ءابدىعاني ۇلى، Facebook پاراقشاسىنان